Uja eyi ura
43
Inu akpabin inyọn̄ okisa ibaan̄ alọm ìre okwuun̄ inyọn̄ òtotoon̄,akpabin inyọn̄ ìre inu òjajaan̄ ene me echieen̄ ikpọkpọ.
2 Ura, isikibum, mè ikibene ifo inyọn̄,
îra ikilook ibe ke ọmọ ìre uyeke inu
eyi Ogwu Òbebene Ichit orombe.
3 Isire ikarek, îra itet ijọn̄ ichat,
ekene okikọt ikeke ida uyok kan̄ òbet lek ukan̄?
4 Ogwu òkisọk ukan̄ ekisa ikala okwukwut
ìkisi ikwaan̄ me emen uyok òkifiọọk ene akpa,
ire, uyok eyi ura îkiyok igak ikeya mgbọ ita me inyọn̄ ogoon̄;
ura ìkicho oruk ukan̄ òyoyok isibi,
mè utoon̄ kan̄ òkotoon̄ òchit ene chieen̄.
5 Okumugwem, ogwu òrorom ọmọ îmin enenen,
ura ìkije ije kan̄ me ugwat
ike Okumugwem otọbe inyi ọmọ.
Uja eyi onyan̄
6 Îre onyan̄ okitap òriọọn̄ isa ikinwunween̄ ibot mgbọ,
ọmọ okidọmọ ibot mgbọ,
mè ire si iman̄ òriọọn̄ òkijeen̄ ibot mgbọ ire mgbọ geelek.
7 Ekisa onyan̄ iriọọn̄ mgbọ ijọk,
isinyi utoon̄ òjojot isan̄a, îra ikigbeen̄.
8 Ọmọ ke ekisa ifuk ifuk onyan̄ me acha,
ubọk îkinwunween̄ lek kan̄ îkaan̄ mgbugbo enenen,
ọmọ ore òje isi inyi urum ntoronyan̄ òkup me akpabin inyọn̄,
ọmọ okitoon̄ me isi okwuun̄ akpabin inyọn̄.
Uja ebi kè ntoronyan̄
9 Utoon̄ ebi kè ntoronyan̄ ore uja eyi isinyọn̄,
urum inu òkikekebe
echi Okumugwem osabe ibala akpa isinyọn̄ kan̄.
10 Ema ekeke me irek kiban̄
igọọk me ida Ogwu Mbuban onyibe ema,
kpekiwọ lek me ibebem ere îbe ema ekebem.
Uja eyi egop ubọọn̄
11 Kpọ egop ubọọn̄, mè tọn̄ Ogwu Òrom ọmọ,
utoon̄ kan̄ îkijaan̄ uja enenen.
12 Ogwu Òbebene Ichit onwun ọmọ kubọk ogbaan̄,
mè ifan̄a ọmọ ikana igwook òrirọ òrirọ me akpabin inyọn̄.
Uyeke uyeke inu Awaji orombe
13 Îre me ida Okumugwem ke ibot awo okirep,
me ida kan̄ ke omumen inyọn̄ îkisa ifieek oyerebet kan̄
okije ugwat ugwat inu.
14 Ida kan̄ okigwuku uwu isun̄-inu me akpabin inyọn̄ ibook,
oduku inyọn̄ îra ikigbọọk isibi kubọk ebi kè unọn ekiwulu.
15 Okumugwem okinyi oduku inyọn̄ unye,
ọmọ okitọọn̄ ibot mgbọlọ ibak okpọkọ okpọkọ.
16 Ọmọ isiwọọk isibi, ebi kè ogoon̄ mîra ito ejit,
Efet agan̄ osiki ìkiwut sa me nkeek kan̄.
17 Ọmọ isisook ida kan̄ òkitaan̄ kubọk isinyọn̄, linyọn̄ îra ikisisik;
ikeya si ke egwijo mè ogbolodom agan̄ inyọn̄ okijibi.
Ọmọ okichon ibot awo iyat kubọk ebi kè unọn èbenisọọk me ijọn̄;
îra ikiduku inu kubọk ebi kè akaka ituuk èbenigwook ichit ijọn̄.
18 Uja okuket eyi ibot awo ìkikeke ene chieen̄,
ubọk îkirọn̄ọ igwook ìkitotop ene me ejit.
19 Okumugwem ìkigwogwook senesene mun̄ ewuuk ichit ijọn̄
kubọk uchi,
isinichat inye,
îra isisọn otu kubọk ukpak.
20 Efet utọọk agan̄ inyọn̄ isiwut,
mun̄ îra inye ikana ewut;
mun̄ ewuuk ya îra ikitoon̄ me inyọn̄ isi mun̄ me udọn̄ mun̄ geelek,
îra ikinye ikam, mè ichit isi mun̄ kubọk ukwek-ejit.
21 Awaji okisa uga uyok ijijaka inyọn̄ ogoon̄,
mè ikiwọp emen èwê ichat,
mè ikitaka inwan̄ ichiaak kubọk ukan̄.
22 Ire, oruk mônenirọ otutuuk cha ikpọk igat ugwem,
mbat môrururọn̄ọ igwook inisuuk ema uyok me lek.
23 Iriọọn̄-inu kan̄ ke îsa irọ ugwuuk okwaan̄ ilọkọ,
mè igwugwuun̄ achọ ichit emen awaji.
24 Ebi ìkikọp emen awaji ekikpa unan òkukup me emen,
ukpatu kiban̄ ìkikeke eji chieen̄.
25 Emen kan̄ ke owuwa inu erorom
òkup nke nke mè uyeke uyeke okup,
esese esese inu òkifuuk efuuk ugwem,
mè ikpele anam ejit okwaan̄.
26 Mije kan̄, ebi ikwaan̄ kan̄ geelek ekirọrọ ikwaan̄ kiban̄ itet,
sa me ikọ kan̄ ke inu geelek ogbaan̄ ikup ikam.
27 Eji mêkọt itumu ikọ igak ikeyi, ire, kpebekọt itutumu ire òta,
otutuuk ikọ ìre: “Okumugwem ore otutuuk inu geelek.”
28 Mọmọ ere eji ebekaan̄ unye isa ikitọn̄ ọmọ?
Mije, ọmọ îmin isaba iraka otutuuk ikwaan̄ kan̄.
29 Okumugwem îmin enenen ikaan̄ ukpook,
unye kan̄ îkup uyeke uyeke enenen.
30 Ìtọn̄ Okumugwem, mè ìjibi ọmọ ìbene ike enyi ekọtbe,
mije, ọmọ îmin enenen igak ikeya.
Osikitọn̄ ọmọ, sa otutuuk unye kwun̄,
kawọ lek, mije, owu òkpokọt itọn̄ ọmọ iso.
31 Ekene orak imun̄ ọmọ, mè ikọt ikikpa ubọk îkupbe?
Ekene obokọt itọn̄ ọmọ ubọk ògbegbe?
32 Owuwa inu òdọdọk igak echichi òwa oletbe ikup,
sọntiik inen mè inen gaalek ke eji emun̄ me lek ikwaan̄ kan̄.
33 Okumugwem orom otutuuk inu geelek,
mè inyi ebi ìrọriọọn̄ ọmọ iriọọn̄-inu.