42
Katet esip me lek inu kechi,kagọọk otu ene, mè ìrọ ijo inu:
2 Katet esip me lek Ikan Ogwu Òbebene Ichit melek inyan̄a-ibot kan̄,
katet si me lek isisibi oyerebet inwọn ogwu ikariọọn̄ge Awaji;
3 mè isusun̄ ifuk melek ogwu melek kwun̄ ekigbaan̄ irọ mbubek,
mè ìre ebi melek kwun̄ egbaan̄be isi ije,
mè icheche ìrot melek ebi ofifi ene
ìgọgọọk ikaan̄ uche me lek.
4 Katet esip isasa okwukwut òtatat mè ewuuk òlolobo ikem itọ inu;
mè irerie oruru, mè ìre ilile, mè ìre sọntiik;
5 mè ikakaan̄ oruru me lek mbubek orọbe melek ebi mbit,
mè igagana ere inyi nsabọn kwun̄ mgbọ geelek,
mè isusulu udun̄ ogwu usun̄ òkinye ibot ibak isibi eje.
6 Kalibi esip itatap iman̄ òriọọn̄ me lek inu,
ire nwa kwun̄ ìkagbe utoon̄-ejit,
mè igọgọbọ mkpọn ikwek inu kwun̄,
me ere ene owabe.
7 Kalibi esip ibebe efuk ikpoko okpebe itap,
mè etọ,
mè igege ifuk ikpoko geelek obọkọbe
mè geelek okpebe itap me ikpa.
8 Katet esip inenen̄e ogwu ètele mè ogwu mbubut isun̄,
mè ìre ebi oka ugane ìkirọ barabat ikana.
Owu mônenijeen̄ ibe ke okween̄ inu,
otutuuk ene mêkekitọn̄ owu.
Ute mè bọn ebibaan̄ kan̄
9 Me nlelet, ute ìkikakaan̄ saasaak-ejit
me lek ogwu gwun̄ enenwaan̄,
ekiket ofolek kan̄ ìkitata nte kan̄ ilaak me chieen̄:
mgbọ îrebe ijija, ogwu ute ìkitetet ukpook ibe
ke ìkpokaan̄ olom;
ire ikaan̄ olom,
ogwu ute ìkitet ukpook ibe ke ogwu olom ìkpoma;
10 ire obaak, ìkitet ukpook ibe ke mêtet igan,
mè òkup me uwu ogwu ute ònin̄ owot;
ire ikaan̄ olom, ìkitet ukpook ibe ke môje ije ilọ,
mè ìre, ibe ke môkọt ire ora, ìkpoman gwun̄.
11 Gwuun̄ chieen̄ re ijọn̄ me lek gwun̄ enenwaan̄ òkinye ibot,
inyi ikasa owu ìnyi ebi ochicha erọ ochak,
mè esa owu ekerọk urọk me emen ama mè ere ebi ene etitiin̄be;
inyi ikasa esip ìtet owu me ere ogbogbo ene ekupbe.
Mun̄ ibe ke agwut kan̄ ìkakaan̄ nruruk,
ke kpunu ere òbobook geege
eyi ekikup imọọn̄ oyet me agan̄ isi uwu.
12 Kanyi irek ibe isa uja kan̄ ikinya ikana me isi enerieen̄ geege,
kanyinyi si irek ibe ikigọọk ikweek ikikpa ukpatu
me ere ebibaan̄ ekikup.
13 Mije, mwuwu òkitaka ekwut ìkinan̄a me emen ekwut,
ikeya si, inu ikpak ebibaan̄ ekirọ ìkinan̄a me lek ebibaan̄.
14 Inu ikpak eyi enerieen̄ înwọn igak ata inu eyi enenwaan̄;
îre enenwaan̄ okisa ochak mè esip inu.
Ikwaan̄ Awaji mè inu îrombe
15 Mgbọ keyi, mâkeek owu ikwaan̄ Okumugwem orọbe,
mè ikpa inu mmun̄be.
Okumugwem ìsa ikọ kan̄ ikirọ ikwaan̄ kan̄,
otutuuk inu îrombe okekirọ nkeek kan̄,
16 Utoon̄ ura ìkitoon̄ igwook me lek inu geelek,
mè inirọ umin Okumugwem ijot me lek ikwaan̄ kan̄ geelek.
17 Okumugwem ìkanyi ebi osat kan̄ ìkup mbuban unye
ikpakpa otutuuk uyeke ikwaan̄ kan̄,
echi ọmọ Okumugwem Ogwu Òkaan̄ Unye Geelek osun̄be inye,
inyi linyọn̄ ikeke inye me irek sa me lek umin kan̄.
18 Ọmọ okiwọlọ ugwuuk okwaan̄ mè emen ejit ebilene ikpọ,
mè ikiriọọn̄ nlelet inu geelek òkup me ere cha.
Mije, Ogwu Òbebene Ichit îriọọn̄ inu geelek eberọriọọn̄,
ìkikup me akarake akat ikimọọn̄ inu
echi òborọ me mgbọ ònu me isi.
19 Ọmọ okitumu inu òkukup mè echi òbokukup isibi,
mè ikichili ubọk nlelet inu geelek okupbe ibook.
20 Kpunu ekiket ene geege eyi ọmọ ikariọọn̄ge,
otu usem ge ikeyi òlelet me lek kan̄ kpunu.
21 Ujuja ikwaan̄ îsabe iriọọn̄-inu kan̄ isi,
ìsun̄ me onineen̄ me onineen̄;
ọmọ ìkukup karake akat,
môkup si isi ire mgbọ ikakaan̄ge itata.
Kpebetap inu geege isọkọ me lek kan̄,
kpebesasan̄a si inu geege me lek kan̄,
ìkakido nteme me ubọk ene geege.
22 Otutuuk ikwaan̄ kan̄ ìkilọlọk ene,
mè ikup ukebe ukebe me chieen̄ ene.
23 Otutuuk inu chi ebekiluluk, mè ikweek ire mgbọ geelek,
geelek me lek kiban̄ îkaan̄ inu ebakbe me lek irom.
24 Otutuuk inu geelek ìje iba iba, ìkare eyi, môre eyilọ;
ire, kpunu inu geege eyi Okumugwem ikaromge ìso.
25 Ge ìkitap uja isọkọ inyi eyilọ.
Ekene ke efuuk obota me owot ikekikpọ uja kan̄?