Mkpa
41
Jei mkpa, ikekeek ekiket òfo me lek kwun̄ ìre inu òjajatme lek ogwu òkisa inu îkaan̄be iluk me esuuk,
ogwu ìkakaan̄ saasaak, ogwu inu geelek okije ijaan̄ me lek,
ogwu òkakaan̄ unye ikọkọt ikisi ikwaan̄ isa ikirie inorie kan̄.
2 Jei mkpa, ogwu òkibọkọ ifieek-oyerebet kwun̄ itap ìre:
ogwu una, unye otabe me lek,
ogwu ukan oriebe lek, saasaak ogakbe lek,
inu geelek ojọbe ejit, ìkayakage ìkaan̄ ikpọchieen̄.
3 Katet ukpook oyerebet mkpa obofieek inyi owu;
keek ebi ìdadasi ije me isi kwun̄,
mè ebi ìbegọgọọk owu me udun̄.
4 Mkpa ìre Ikan Okumugwem otapbe inyi anam akpalek geelek;
keke oborọ inyi owu òjit inu òre nkeek Ogwu Òbebene Ichit?
Ìrere òluluk akọp acha, mè ìre efit acha, mè ìre obop acha,
kpebedo inu ofolek me ama ekwukwu.
Inyọn̄ ebi ikpak
5 Bọn ebi ijo ife ìre bọn echabe,
ema ekijijen̄e ere ebi kperiọọn̄ Awaji.
6 Ìrot bọn ebi ijo ife ìbochechieen̄ ita,
bọn bọn kiban̄ mêkup me emen esip ire mgbọ geelek.
7 Bọn mêfieek ute ikariọọn̄ge Awaji ikọ,
mije, îre bak me lek kan̄ ke ema ekibọkọ esip.
8 Môfieek inyi enyi ebi kperiọọn̄ Awaji,
ebi ìjijit Ikan Awaji Ogwu Òbebene Ichit itele.
9 Ire okaan̄ bọn, ùrioon̄ môtoon̄ ema,
owu òboboon̄ ema igwook inyi ufieejit;
ire okwaak irọn̄, môre unwọọn̄ mgbọ geelek,
ire okwu, ufieek-otu obobia owu me lek.
10 Inu geelek ònan̄a me ijọn̄ isibi ìbogwu ikom ifo ijọn̄,
ikeya ke ogwu ikariọọn̄ge Awaji
okinan̄a me ufieek-otu isi inin̄ me mkpa.
11 Akpalek ebilene ìre inu ìkpokup ifiin̄,
ire, ata erieen̄, kpebekọt itutuku ichit.
12 Gbala chieen̄ me lek erieen̄ kwun̄,
mije, môfuk ugwem igak owu;
môkup ijọn̄ọ mgbọ igak obop obop èdọ alata araran̄.
13 Ata ugwem îkaan̄ otu ifuk usen kan̄,
ire, ata erieen̄ ìbokukup ire mgbọ geelek.
Itetet esip
14 Bọn n̄a, ìkirọ inu ubọk njeen̄be enyi,
mè ìkup me esuuk;
iriọọn̄-inu òlelet mè inu ubọọn̄ ekasan̄age ìsibi,
kpunu oruru geege òkukup me lek inu iba chi.
15 Ogwu òlelet mbubut kan̄
înwọn igak ogwu òlelet iriọọn̄-inu kan̄.
16 Eya orọ, ìkaan̄ ulibi ìnyi ikọ n̄a;
mije, ìkanwọn itetet esip me irek geelek,
ìkarere si otutuuk inu esip geelek
ke ebi ene ebọkọ itap ibe ìre inu esip.
17 Tet esip irọrọ barabat, me isi nte kwun̄ mè nga kwun̄,
mè ikakan̄ ataak, me isi ogwu ilile mè ìre ogwu mkpulu.
18 Tet esip me lek ikan òtetet owu,
me isi ogwu oyerebet mè ìre ogwu ibot oyerebet;
mè irọrọ inu ikan ogbanbe,
me isi ogbo ama mè ìre isi ebi ntitiin̄;
mè irọrọ ene mfeen̄, me isi ogwu unene kwun̄
mè ìre ogwu melek kwun̄;
19 mè ichichiin̄ inọ,
me etete ere owu olukbe.
Tet esip me ichichichaka inyan̄a-ibot
mè mgbaan̄-nchieek,
mè ibebieen̄ akpatubọk me inyọn̄ ikasi
mgbọ okirie inorie,
mè ikakaan̄ ijo ugwem mgbọ okiche inu inyi ene,
mè ìre mgbọ okibọkọ inu me ubọk ene.
20 Tet esip irariaan̄ ebi ìkitọp owu amọn,
mè ikekikpọ enenwaan̄ òje oyet.
21 Tet esip ijijit ngwan̄ kwun̄ inu îbeekbe,
mè ibeben inu edọmọbe inyi ofifi ene,
mè ìre uche inu ofifi ene, isak;
tet esip ikpọkpọ nwa ofifi ene,
22 mè ikekifufet me lek ogwu usun̄ kan̄ enenwaan̄
kajeje ìriaak me lek mkpilaak kan̄.
Tet esip ititiik ene itiik, me isi ebi unene,
mè kanye chieen̄ ìnyi ene mgbọ osiche inu inyi ene ya.
23 Tet esip me lek ikpakpa inu onọbe,
mè ikpọkpọk mbum nlelet ikọ.
Owu môneniriọọn̄ inu ata itetet esip orebe,
otutuuk ene mêkekinyi owu ulibi.