Nyanya òkup inyi ebilene
40
Erom kwulukwulu ikwaan̄ ito inyi ene geelek,ọgbọn òlolobo ke esa ikwaan̄ me ebek bọn kè Adam,
bene me usen ema enan̄abe me akpa gwun̄ nga kiban̄ isibi,
mege ema ègwu ekom efo ijọn̄, òrere nga otutuuk ene.
2 Ekiket mè ufieek-owot okikup ema me ejit,
melek ukpook usen mkpa kiban̄.
3 Bene me lek ogwu òkweek me inyọn̄ ogboon̄ ubọọn̄ òjajaan̄,
re lek ogwu nyanya òkifufuku ikana me emen mfuun̄ mè ntọn̄,
4 bene me lek ogwu òkitap irio irio ofọnti ubọọn̄
mè ikwuun̄ okpibot ubọọn̄,
re lek ogwu òkikwun abaka,
5 unaan̄-ejit, mè mba-ejit, mè ufialek, mè jikijiki,
mè ukpook mkpa, mè ujat ejit, mè ibaak okup inyi.
Ikerere eririeen̄ mgbọ îlaakbe me inyọn̄ mkpilaak kan̄,
ilaak ìkiwuwuwọlọ ọmọ ejit.
6 Ìkakisiki efuuk mgbọ geege,
ìkisasa ikana me emen ilaak kubọk ikarek.
Inu îkimumun̄ me ilaak ìkiraran ọmọ lek,
kubọk ogwu ònan̄a me isi akọn̄ ilibi.
7 Mgbọ isilibi inwọnọ, îra ibolo chieen̄,
mè inimun̄ ibe ke ukpook kan̄ ìre ukpọk ukpọk ikike,
mè iriki.
8 Inu òkukup inyi otutuuk inu Awaji orombe,
mè ìre ebilene mè ìre anam,
mè ikup mgbọ jaaba inyi ebi ijo ife, ìre:
9 mkpa, mè ifafiat eje, mè gọlọgọlọ, mè oge akọn̄,
melek ùrioon̄, mè akan̄, mè jakajaka, melek ijo orukan̄.
10 Otutuuk inu chi, ebak me lek ebi kperiọọn̄ Awaji irom,
bak me lek kiban̄ ke mun̄ ile onu.
11 Otutuuk inu ònan̄a me ijọn̄ môfo ijọn̄,
echi ònan̄a me mun̄ môfo okwaan̄.
Mkpukpe ijo inu
12 Inu geelek òje me lek ikpoko udun̄ mè mfeen̄ ìkpofuk,
ire, ata ichechieek môkup ire mgbọ geelek.
13 Inu ubọọn̄ ebi ijo ife môchiaak ita kubọk mun̄ orak me okolo,
mè iseme ikpọk iyat kubọk isinyọn̄ osook me emen egwijo.
14 Ogwu òkichili ubọk iche inu inyi ene mônwọọn̄ unwọọn̄,
ogwu òfiat ikan môrọn̄ atalek irọn̄.
15 Bọn ebi kperiọọn̄ Awaji kpekitibi agọọk iwa,
ekikup kubọk ugwun̄ ijọn̄ òkup orukan̄ orukan̄
òkitibi me inyọn̄ ewuuk.
16 Anyiaan̄ òtibi me emen oyô mè ìre agba okwaan̄
ke ekidasi isọp sabum mbubet kechilọ geelek.
17 Ata ejit ìbet lek uko òkisibi ugbana;
icheche inu inyi ebi ugbọọn̄ îkaan̄ oruru ire mgbọ geelek.
Unwọọn̄ me ugwem ene
18 Ibọbọọn̄ ubọọn̄ mè ikakaan̄ ukot mbọm òkinyi ene ikpoko
ìkirọ ugwem itop;
ire, eyi ònwọnwọn igak inu iba chi
ìre ene imumun̄ inu ubọọn̄ òlelet.
19 Ikakaan̄ bọn mè ichichili ama
ìkirọ erieen̄ ene itaan̄ etip;
ire, eyi ònwọnwọn igak inu iba chi
ìre ene iweweek iriọọn̄-inu imun̄.
Ikakaan̄ eriembuuk mè uko gerep
ìkirọ ene ibọọn̄ ubọọn̄;
ire, eyi ònwọnwọn igak inu iba chi
ìre ene ikakaan̄ nwa ikakaan̄ge nrọ-nlọ.
20 Miin̄ mè ifit
ìkibele ene ejit;
ire, eyi ònwọnwọn igak inu iba chi
ìre imama iriọọn̄-inu.
21 Òja mè uneen̄
ìkirọ okwa itop;
ire, eyi ònwọnwọn igak inu iba chi
ìre atalek utop ida.
22 Inu òkup òrirọ òrirọ mè inu òjajaan̄
ke chieen̄ ene okiweek ikpọkpọ;
ire, eyi ònwọnwọn igak inu iba chi
ìre ujuja utọn̄ inwan̄ akpa òkitibi ayaya.
23 Unene mè ogwu òriọọn̄
ìre ebi ìgbegbe igọgọọk ikije mgbọ geelek;
ire, eyi ònwọnwọn igak ema ene iba ìre nwa òkaan̄ ngobo-ntet.a
24 Bọn ulọk mè ebi ntap-ubọk
mînwọn ikakaan̄ me mgbọ uyọrọlek;
ire, eyi ònwọnwọn igak ema iba
ìre icheche inu inyi ebi ugbọọn̄.
25 Alata araran̄ mè alata okuket
ìkirọ ene ikeke inye;
ire, eyi ònwọnwọn igak inu iba chi
ìre ata nteme.
26 Ibọbọọn̄ ubọọn̄ mè ikakaan̄ unye
ìkirọ ejit ene inye;
ire, eyi ònwọnwọn igak inu iba chi
ìre itetet ukpook Okumugwem.
Ogwu òtetet ukpook Okumugwem ìkponan inu,
me lek ogwu òkakaan̄, iweweek ntap-ubọk ìkayaka ìkup me uyọt.
27 Itetet ukpook Okumugwem ìbet lek uko òkisibi ugbana;
ìkichit ene lek igak umin geelek ene okaan̄be.
Ibebeek inu ìre esip
28 Gwun̄ n̄a, kare ogwu mbeek me ugwem kwun̄;
ene ikwukwu mkpa înwọn igak ene irere ogwu mbeek.
29 Ogwu chieen̄ kan̄ okikpọ irerie inorie me inyọn̄ ikasi ofifi ene,
ugwem kan̄ ìkarere ugwem kubọk ge.
Isasa ebek ito me lek inorie ofifi ene ìkakaan̄ ulibi,
ogwu ònọ lek, ekpukpobe ijaan̄, ìkporọ.
30 Ibebeek inu ìkitop me otu ogwu kpunube esip me isi,
ire, ìkekisọk ọmọ ukan̄ me emen.