Ebi ìjeen̄ Ikan
39
Ire, ogwu òsa ugwem kan̄ inyiikwekween̄ Ikan Ogwu Òbebene Ichit,
ọmọ okiwọlọ emen iriọọn̄-inu otutuuk ebi ukot ikaan̄,
mè ikitap lek ichep me lek ikọ nriran.
2 Ọmọ okisun̄ ikọ ebi eriọọn̄be erieen̄,
mè ikibak ibot urọk.
3 Ọmọ okiweek nlelet inu òkup me emen urọk isibi,
mè ikima ifofolo emen owot urọk iriọọn̄.
4 Ọmọ okisi ikwaan̄ inyi ebi ilile,
mè ikikeke me isi ebi mkpulu;
ìkijijen̄e ije ikana me ofifi ido,
mè ikikween̄ ata inu mè ijo inu òkup me emen ebilene.
5 Ìkima inanan̄a ilaak me obum egwe,
initọbọ ebum inyi Okumugwem ogwu òrom ọmọ,
mè ikibeek Ogwu Òbebene Ichit mbeek;
ìkichili otu iriaak uriaak
ikibeek nsan me ibot ijo inu kan̄.
6 Ire ineme Okumugwem ogwu ilile,
môtap ekwukwu ngobo-ntet ijot emen kan̄;
ikọ iriọọn̄-inu eyi Okumugwem
môkekigbuku me otu kan̄ isibi,
mônenikiriaak uriaak itọn̄ Okumugwem.
7 Ọmọ môkaan̄ ifuk-ibot mè nteme,
mè ikikeek inu òfo me lek
nlelet udọk udọk atikọ eyi Okumugwem.
8 Mônijeen̄ iriọọn̄-inu òfo me lek inu îkween̄be,
mè ikisa Ikan inyan̄a-ibot Okumugwem igugo lek.
9 Owuwa ene mêkekitọn̄ ngobo-ntet îkaan̄be,
eyi kpebewuuk;
ikekeek ọmọ ìkakaan̄ itata,
erieen̄ kan̄ môkup inan̄a me ukot ire me ukot.
10 Ido geelek mêkitumu ikọ ibak iriọọn̄-inu kan̄,
urum ebi ntitiin̄ mêkekitọn̄ ọmọ.
11 Ire iluk ugwem ijọn̄ọ,
erieen̄ kan̄ môtaan̄ etip igak echi obop obop ene;
ire ikwu, môjot ọmọ owot ibe erieen̄ kan̄ òwa.
Okwa isasa itọn̄ Okumugwem
12 Nkaan̄ inu me ejit n̄a mbatap isọkọ inu nkikpa,
inu chi ìninin̄ ijot emen n̄a kubọk òjot òjot onyan̄.
13 Bọn n̄a, enyi ebi ìkekeke inye, ìgban̄ inu nkitumu,
mè ìtibi ìjaan̄ lek kubọk ajakajak rôs òkitibi me agba mun̄.
14 Ìdun̄u utop olu kubọk nsensi,
mè ìgwook ìchit ere kubọk ajakajak oron.
Ìchon utop olu kinyi ìkana, mè ìkọt okwa itọn̄;
ìtọn̄ Okumugwem me lek otutuuk ikwaan̄ îrọbe.
15 Ìtumu umin ikpele erieen̄ kan̄ ìsibi,
mè ìkọt okwa ìsa ìtọn̄ ọmọ ìbe ọmọ onirọ;
ìsa otu kinyi ìkọt okwa, mè ìsa si uneen̄ ìtọn̄ ọmọ;
okwa enyi ebekọt isa itọn̄ ọmọ ìre ikeyi:
16 “Otutuuk ikwaan̄ Okumugwem ìjajaan̄ iso,
inu geelek îtọbe, ìkirọrọ iso me mgbọ kan̄.
17 Kpunu ene geege òbodo ibe, ‘Keke ire eyi?’
mè ìre, ‘Ìjeje ikup ikeya?’
Mgbọ mgbọ isire,
mêfọọk otutuuk idodo kecha.
Sa me ikọ kan̄, mun̄ òkigbugbuk îkwọọk ititiin̄ ibene me èdọ,
mun̄ îyik me irek inan̄a me ikọ otu kan̄.
18 Isinyi ida, inu geelek îtọbe îra irọ;
kpunu ogwu òbokọt ikwek ibe ikasa unye kan̄ ìnyan̄a ene.
19 Inu geelek ebilene erọbe ìkikukup me isi kan̄,
kpunu geege òbokọt ilet me chieen̄ kan̄.
20 Bene me ibebene ire itata mgbọ, ọmọ ìkimumun̄ inu geelek;
kpunu inu geege òkiyọyọt igak ọmọ.
21 Kpunu ene geege òbodo ibe, ‘Keke ire eyi?’
mè ìre, ‘Ìjeje ikup ikeya?’
Inu geelek erombe, îkaan̄ inu ebakbe me lek irom.
22 “Ugbana kan̄ ìkichichit nchat ijọn̄
kubọk okwaan̄ obaak imeen̄ ere,
mè inin̄ idek ijọn̄ kubọk mun̄ ile.
23 Uyok uyok unaan̄-ejit kan̄ ìkirerieen̄ ebi ofifi ido isan̄a,
kubọk mgbọ îrọbe mudim ikana ala.
24 Oniin̄ kan̄ ìtatat me lek ebi ìkekeke inye,
mè ikup ufe ufe me lek ebi ikpak.
25 Bene me ibebene, erom ata inu inyi ebi ata ene,
mè irom ijo inu inyi ebi ijo ene.
26 Inu òkup me uyọt me ugwem ebilene
ìre mun̄, mè ukan̄, mè okwukwut, melek uchi,
mè akpa ekọkọk, mè mun̄ ebe, mè aran̄ akwọọk,
mè miin̄, mè aran̄, melek ekwut.
27 Otutuuk inu chi geelek ìre ata inu inyi ebi ata ene,
ire, inu chi ìkikana ijo inu inyi ebi ijo ene.
28 “Îkaan̄ efet echi erombe inyi isasa ikisulu osusut,
ire ejit inaan̄ efet cha, mêkọt ijibi ogoon̄ isan̄a me akpat;
me usen oyerebet, ema ebegbugbugbọ unye kiban̄ igwook,
mè isiki unaan̄-ejit Ogwu Òrom kiban̄.
29 Awaji îrom si ofifi inu, inyi ọmọ môkisa isan̄a useen̄ ijo inu:
ukan̄, mè ibot mgbọlọ, mè akan̄, melek ijo orukan̄,
30 mè ejeek ijo anam, mè iwot eferen̄, mè ijijinu,
mè oge akọn̄ òkikpan̄ ebi kperiọọn̄ Awaji.
31 Otutuuk inu chi ekibebele ejit
irọrọ inu Okumugwem onyibe ida ibe erọ;
ebebem lek mgbọ geelek îweekbe ema
isasa irọ ikwaan̄ me linyọn̄;
mgbọ ya isire,
ema kpekikpaka ida kan̄.”
32 Eya orọ, bene me ibebene, nriọọn̄ ibe ke otutuuk inu chi ìre ikeya,
nneniwọlọ emen ikpọ, mè ige isun̄ itele:
33 Otutuuk ikwaan̄ geelek Okumugwem orọbe, ìnwọnwọn;
inu geelek eweekbe, ọmọ mônyi me ata mgbọ kan̄.
34 Kpunu ogwu òbotumu ibe,
“Eyiyi ìkanwọn kubọk eyi keyilọ,”
mije, inu geelek môkaan̄ oruru kan̄ me mgbọ eyi kan̄.
35 Eya orọ, mgbọ yi, sa otutuuk ejit kwun̄ mè ida kwun̄
kọt okwa tọn̄ erieen̄ Okumugwem.