Orukan̄ mè ugwun̄
38
Nyi ogwu ofia ulibi ògbegbe mije ikwaan̄ îkirọ,mije, îre Okumugwem orom ọmọ si.
2 Uche eyi igwagwa ọmọ okaan̄be
ìnan̄a me ubọk Ogwu Òbebene Ichit,
îre ogwu ubọọn̄ okikpe ọmọ mkpukpe.
3 Inu ogwu ofia okween̄be orọ ọmọ isibi isi,
ebi ilile ekimimin ọmọ.
4 Okumugwem ìrom ugwun̄ inan̄a me ijọn̄,
ogwu òriọọn̄ inu ìkpokpọ isiki chieen̄.
5 Ìre kpesa uti irọ mun̄ itop
inyi esa eriọọn̄ unye kan̄ ni?
6 Okumugwem înyi ebilene ikween̄-inu,
inyi esa me lek ikpele ikwaan̄ kan̄ ekenyi ọmọ umin.
7 Ogwu ofia ìkisa ugwun̄ igwa ene, mè ikirọ ibe ufiak ita;
ogwu òwọlọ ugwun̄ okiwọwọlọ ugwun̄.
8 Ubọk ikwaan̄ Awaji ìkakaan̄ itata,
sa me lek kan̄ ke unye-lek okana otutuuk linyọn̄ iso ichak.
9 Gwun̄ n̄a, osifiak orukan̄, kafiat mgbọ,
riaak uriaak, ke Okumugwem môgwa owu.
10 Jit nrọ-nlọ orọbe, mè tet ubọk tat,
mè gwọk otutuuk ijo inu geelek san̄a me ejit kwun̄.
11 Gwa ngwugwa òkidun̄u utop olu,
mè nyi si okpọkọ emen akpan eyi atalek akpa ekọkọk,
gwook aran̄ me lek ngwugwa kwun̄,
gwook wa ike geelek ubọk kwun̄ osoon̄be.
12 Owu môneninyi ogwu ofia irek kan̄, mije,
îre Okumugwem orom ọmọ;
kachieek ibe inan̄a itele owu, mije, ọmọ îkup owu me uyọt.
13 Usini mgbọ, lek kwun̄ inyenye
ìbokup me ubọk ebi ofia;
14 mije, ema si ekibeek Okumugwem
ibe irọ ema ekọt esuuk ufiak,
mè egwa owu, inyi enyan̄a ugwem.
15 Ogwu òrọrọ Òrom kan̄ ijo inu,
ìborọn̄ orukan̄ inin̄ me ubọk ogwu ofia.
Itoto ogwu òkwukwu
16 Gwun̄ n̄a, to ito nyi ogwu òkwukwu,
bene fieek ejit sa jeen̄ ibe ke îtet owu me lek enenen;
maan̄ ene ya, mè rọ orirọ òje me lek,
mè gọọk ben ọmọ tap me udọn̄.
17 To ito ujat ujat, to kubọk mkpa ya îyọt owu me lek;
fieek ejit ògbegbe nyi ogwu òkwukwu,
to usen ge, mè ìre usen iba, inyi otu ene ikare owu lek,
mè kat ejit me lek ufieejit kwun̄.
18 Mije, ifefieek ejit ìkisan̄a ene unye me lek,
uga ufieejit môkọt ikpan̄ ene.
19 Isiben ene isan̄a, tele ufieejit iraka,
ujọn̄ọ ufieejit ìre ufialek inyi ejit ene.
20 Kakpọkpọ ìsa ejit kwun̄ ìnyi ufieejit,
lap jọn̄ọ ere, mè keek òta usen eyi kwun̄.
21 Kawuuk ibe ke ogwu òkwukwu ìkpoyaka inu,
ufieejit kwun̄ ìkporọ ọmọ ata inu geege,
owu ke ìbotap unan me lek.
22 Keek inyọn̄ kan̄, mije, eyi kwun̄ ìkup si ikeya,
iyakwut ore eyi kan̄, chereyi ìre eyi kwun̄.
23 Isiben ogwu òkwukwu ifuun̄, inyi isiki efuuk,
yaka ekiket ofolek kan̄ to si;
mije kan̄, kat lek kwun̄ ejit, mije, ekwukwu kan̄ îra inan̄a.
Ikwaan̄ ubọk
24 Mgbọ isasa itap efuuk
okinyi ogwu òjeen̄ Ikan irek îkisa ikaan̄ iriọọn̄-inu,
ogwu ìkakaan̄ mbubek ìwa me ubọk
gaalek obokọt ikaan̄ iriọọn̄-inu.
25 Ogwu òkisa okwukwut ibak ijọn̄ uko ìborọrọ iriọọn̄ inu,
ogwu otutuuk ubelejit kan̄ orebe
itetet uti ikililaba anam òkibak ijọn̄;
ogwu òkililaba ebi kè eriembuuk,
otutuuk ejit kan̄ ìkikup me lek ikwaan̄ ema ekisi,
otutuuk ukpatu kan̄ ìre ukpatu òfo me lek eriembuuk?
26 Ejit kan̄ ìkup me lek ibabak ijọn̄ isa iwop inu,
egwe isifit, îra ikinyi bọn uman eriembuuk cha inorie.
27 Ubọk yaage ke îkup inyi ogwu ikwaan̄
mè ogwu usọ geelek,
ìkirọ nninaan̄ kan̄ ikarek mè eririeen̄;
ebi ìkirọkọ mkpọtubọk iman̄ òriọọn̄,
ekigwuun̄ chieen̄ irom echi ayaya me chieen̄ me chieen̄;
ema ekisa me otutuuk ejit kiban̄ igwook inu,
inyi ibet lek eyi njijoon̄ ema ekikpọ me lek,
mè ètop chieen̄ erọn̄ eririeen̄ erọ ikwaan̄ èsan̄a me lek.
28 Ikeya si ke îkup me lek ogwu usọ okwukwut
òkikup iriaak ebon otik ibọn̄-inu kan̄,
ikidọmọ inu ìbosa okwukwut irom;
unye ukan̄ ya îra ikitet akpa kan̄ iruk,
ike ikirurumu melek uyok unye ukan̄;
ida abaracha îra ikitap ọmọ ìnan,
chieen̄ kan̄ îra ikigwuun̄ me lek mbet inu îkiweek irorom;
ejit kan̄ ìkup me lek irọrọ ikwaan̄ kan̄ isan̄a,
îra ikisi ikwaan̄ irọn̄ eririeen̄,
inyi ọmọ ikọt irọ itet, mè irọ isan̄a.
29 Ikeya si ke îkup inyi ogwu òbot ugọn̄ òkup me lek ikwaan̄ kan̄,
mè ikisa ukot iyaka ekpirikpo kan̄ ikana;
mgbọ geelek, ìkigwọgwọk chieen̄ me lek ikwaan̄ kan̄,
mè ikirom inu owuwa owuwa.
30 Ìkisa ukot ijak arika imem,
mè ikisa ubọk ibot;
ejit kan̄ ìkup me lek irọrọ lek inu cha ikimumọọn̄,
mè òkorọ ikwaan̄ orọn̄ eririeen̄,
mè òkogwọk uchieen̄ iwọp-ugọn̄ kan̄.
31 Otutuuk ife chi ekisa ubọk kiban̄ itoon̄ ejit,
otutuuk kiban̄ ìre ebi usọ me lek chieen̄ ikwaan̄ kiban̄.
32 Ire ema kpunu, kpebekọt iluk me emen ama,
kpunu ebi ìbeluk, ebi ichen si kpebejeje igba ama ya.
33 Ire, kpekigobo ema itap me ntitiin̄ ama,
ema si kpekikakaan̄ isi me ere ogbo ene etitiin̄be.
Ema kpekikup me inyọn̄ ikasi ebi oyerebet,
kpekirọriọọn̄ si inu geege òfo me lek ikan.
Ema kpekaan̄ ikween̄-inu,
kperọriọọn̄ si ema kubọk ebi ìriọọn̄ inu;
ebi ene kpekinọnọ si urọk geege
ònan̄a me otu kiban̄.
34 Ire, îre ema etet linyọn̄ ikaan̄ inye,
otutuuk inu òkup ema me uyọt
ìre inu òfo me lek ikwaan̄ kiban̄.