Unene ataak
37
Unene geelek ìkibe, “Emi si ìre une kwun̄,”ire, usini unene ekire unene me erieen̄ gaalek.
2 Ufieejit unene òkakana ogwu ochicha ene,
ìbet lek ufieejit mkpa okinyi ene.
3 Jei, ekiket ikpak, keke orọ okupbe mọnọ,
mè òsa ofiaan̄ òtap òchit linyọn̄?
4 Usini unene ekire unene mgbọ inu isinwọn me lek unene,
ire, ufialek isitet unene, mîra igwu ikom ikirọ ikeme.
5 Usini unene ekigọọk unene isak ofaak mije inorie,
akọn̄ isitoon̄ unene, mîra iteen̄ nroon̄ akọn̄ kiban̄
igọọk itim ikeme ogwu ochicha ya.
6 Kalululuk ìwuuk unene ògọgọọk owu ikeke itim akọn̄,
kache inu ofumbe me akọn̄ ìlọ ọmọ.
Gbala chieen̄ me lek nteme obobọkọ
7 Ene geelek ìkitọn̄ nteme ọmọ onyibe ene,
ire, usini ene ekinyi nteme
ikpọ me lek nnwọn eyi akpalek kiban̄.
8 Gwuun̄ chieen̄ me lek ogwu ònyi owu nteme,
dasi week riọọn̄ ere ulọk kan̄ okupbe,
mije, môkaan̄ ekiket òfo me lek kan̄,
mè okọt ofit òkan̄ owu,
9 mè òbe owu, “Agan̄ okije ya otat,”
mè oje oda òbọkọ orieen̄ lek òkokpọ owu.
10 Kabọkọ nteme me otu ogwu ìkatoon̄ owu ejit me lek,
let otitọt kwun̄ me lek ebi ìkito owu mba.
11 Kabọkọ nteme me otu enenwaan̄, òfo me lek ogwu uwuk,
mè ogwu ukpook owot, òfo me lek akọn̄,
mè ogwu mbit, òfo me lek otu ewe inu,
mè ogwu ulep, òfo me lek inyanyam,
mè ogwu afaak, òfo me lek ichichili ejit iche inu inyi ene,
mè ogwu ìkariọọn̄ nsan, òfo me lek ata ejit,
mè ogwu ugbek, òfo me lek isisi ikwaan̄,
mè ogwu ọkọ, òfo me lek mgbọ ìbosi ikwaan̄ isan̄a
mè ogwu una efuuk, òfo me lek ikpele ikwaan̄ isisi,
kabọkọ nteme geege me otu kè ebibi.
12 Ire, kigbaan̄ inu rọ melek ogwu òrọriọọn̄ Awaji,
ogwu owu oriọọn̄be ibe ke îkisun̄ ikan,
ogwu òkaan̄ ejit ge melek kwun̄,
ogwu môtobe owu njijin, ire onan̄a irọn̄.
13 Òta kan̄, gban̄ nteme ejit kwun̄ gaalek okinyi owu,
kpunu nteme ene geege òbotat igak eyi keya.
14 Mije, usini mgbọ, ejit kiji îkinyi eji ata nteme
igak ene jaaba ìkup me inyọn̄ uwu-oket
ere ebi mbem ekikup ikpọ ere.
15 Ògak ge, beek Ogwu Òbebene Ichit
ibe isa owu ikije me oniin̄ eyi atikọ.
Ata iriọọn̄-inu mè iriọọn̄-inu mbubut
16 Dasi gọọk ebi ofifi ife bubọkọ otu,
sabum ònobene ikwaan̄ geelek,
dasi week nteme,
sabum ònobene orọ inu geelek.
17 Ekiket ejit ene,
ọmọ ore ugwun̄ ijọn̄ inu geelek ene orọbe.
18 Ìkitibi agọọk ini:
ata mè ijo melek ugwem mè mkpa;
otu alọm ene,
ọmọ okikpulu ema mgbọ geelek.
19 Ene môkọt iriọọn̄ inu enenen, mè ikijeen̄ ebi ofifi ife inu,
ire, ìkakọt ìrọ ata inu geege ìnyi lek kan̄.
20 Ene môkọt ikinye otu itutumu ikọ,
ire, ebi ene mêkọt icha ọmọ ire lek, kpokaan̄be inorie irerie;
21 bak me lek ìkakaan̄ iriọọn̄-inu,
mije, Okumugwem ìkanyi ọmọ iriọọn̄-inu.
22 Ene môkọt iriọọn̄ inu, mè ikaan̄ oruru me lek,
ebi ene isigban̄ ikọ iriọọn̄-inu kan̄, mîra ikitọn̄ ọmọ.
23 Ogwu òriọọn̄ inu ìkijeen̄ ebi kan̄ inu,
mfut eyi ifuk-ibot kan̄ îra ikikup ifiin̄.
24 Ebi ene ekitọtọn̄ ogwu oriọọn̄ inu,
ebi imun̄ ọmọ ebekigwen ọmọ ogwu ubelejit.
25 Ugwem ene îkaan̄ otu ifuk usen,
ire, usen eyi ebi Ijeren ìkakaan̄ otu ifuk.
26 Ogwu ikaan̄ iriọọn̄-inu me etete ebi kiban̄, môkaan̄ umin,
erieen̄ kan̄ ìbokukup ire mgbọ geelek.
Itetet ebek ikaan̄ me lek inorie
27 Gwun̄ n̄a, tọ ugwem kwun̄ kpọ ike okiluk ije,
inu geelek mônyibe owu unan, katap lek me lek.
28 Ìkare inu geelek okitat me lek ene geelek,
ìkarere si otutuuk ene ekima inu geelek.
29 Kakaan̄ ebek ile me lek utop inorie geelek,
orie inorie, yaka tet ebek kaan̄;
30 mije, irerie inorie igak owot ìre orukan̄,
omin ebek irie, owu môgbọ ifiin̄.
31 Ijo ebek inorie îkpan̄ owuwa ene,
ogwu ògbagbala chieen̄ me lek môluk ugwem ijọn̄ọ.