Uriaak me ibot ebi Ijeren
36
Jei Okumugwem, Awaji ogwukaan̄ inu geelek,kana chieen̄ kpọ eji, mè kaan̄ nsan me lek kiji.
2 Rọ inyi ukpook kwun̄
igwook me lek ebi ido geelek.
3 Bene ubọk kwun̄ sulu ebi ofifi ido osusut,
mè rọ inyi ema emun̄ unye kwun̄.
4 Owu osa eji ijeen̄ ema ibe ke owu òkup me mbuban,
ikeya si, sa ema jeen̄ eji ibe ke owu omin enenen.
5 Jei Okumugwem, rọ ema eriọọn̄, ike orọbe eji eriọọn̄,
ibe ke kpunu Awaji geege ilọ me lek kwun̄.
6 Jeen̄ ema aya inu ijejeen̄, mè rọ aya uyeke uyeke inu;
rọ inyi ubọk ulom kwun̄ ikup mgbugbo.
7 Jibi unaan̄-ejit bene,
mè gbuku uyok uyok unaan̄-ejit kwun̄ gwook;
jijaka ebi oriara, mè kpan̄ ebi ochicha san̄a kpai.
8 Rọ usen ya igwat lek inu,
mè keek inyan̄a-ibot onyan̄abe ibak mgbọ ya,
inyi ebilene mêkpa ikpele inu orọbe.
9 Tele uyok uyok unaan̄-ejit kwun̄ iyok
kubọk ukan̄ itaka ebi ìsisik ikpan̄,
mè mfufiat irọn̄ ikeme ebi ìtututuku ebi kwun̄ itap unan me lek.
10 Kpukpuku ibot ebi mkpulu ìkirọ nnaan̄,
ebi ìkitumu ibe, “Kpunu ene geege ilọ me lek kiji!”
11 Teen̄ otutuuk otoko kè Jekọp gbaan̄ titiin̄,
mè yaka ìrot kiban̄ nyi ema, kubọk îkupbe me ibebene.
12 Jei Okumugwem, kaan̄ nsan
me lek ebi esabe erieen̄ kwun̄ ikigwen,
me lek Ijeren ogwu owu osabe irọ adasi gwun̄ kwun̄.
13 To njijin me lek ama ere Uwu Mbuban kwun̄ okupbe,
to njijin me lek ama ya, òrere Jeruselem, ere owu okiluk.
14 Rọ inyi edimi okwa eso ama Sayọn
esa etọn̄ owu mije uyeke ikwaan̄ osibe,
mè rọ inyi ujamgbugbo kwun̄ ijot Uwu Mbuban kwun̄.
15 Keke ata-ikọ nyi ebi orombe me ibebene,
mè rọ ibe nriran ebenbe me erieen̄ kwun̄ irọ iso.
16 Nyi ebi ìkikup ikikpọ owu mkpukpe kiban̄,
mè rọ inyi ebi nriran kwun̄ egbe utoon̄-ejit.
17 Jei Okumugwem, soso, rọ otu uriaak ebi ikwaan̄ kwun̄ so,
igọọk me lek ata ejit okikaan̄ me lek ebi kwun̄,a
inyi otutuuk ebi ìkup me linyọn̄ mêriọọn̄ ibe
ke owu ore Okumugwem,
Awaji akarake akat.
Isasan inu
18 Owot ìkibọbọkọ inorie geelek itap,
ire, usini inorie înwọn igak usini.
19 Ike inyọn̄ alọm okiriọọn̄ utop esese esese anam,
ikeya si ke ogwu òriọọn̄ inu okiriọọn̄ lek ikọ ataak.
20 Ogwu ejit ikpak ìkinyi ene ufieejit,
ire, ogwu òkween̄ inu okiriọọn̄ ubọk ìbosa ikpe ọmọ mkpukpe.
21 Enenwaan̄ môkọt ibat enerieen̄ geelek me lek olom,
ire, enenwaan̄ ge înwọn igak ge.
22 Uja eyi enenwaan̄ ìkitọn̄ọ enerieen̄ isi,
kpunu inu geege enerieen̄ omabe igak eya.
23 Ire enenwaan̄ ya ikisiki lek itumu ikọ, mè ikaan̄ ata ejit,
ogwu olom îkaan̄ atisi igak otutuuk ofifi ebirieen̄.
24 Enerieen̄ òkaan̄ nwa îkaan̄ inu, îkaan̄ inu ònwọnwọn ichit;
îkaan̄ si ogwu ntap-ubọk ògbegbe, mè ikaan̄ si atà ibieen̄ lek.
25 Ire ene ìkawak ogọ ìkana inu îkaan̄be, mêchichiin̄ isan̄a;
enerieen̄ ikakaan̄ge nwa,
ìbokinyinyinya ikana, mè ikifiọọk.
26 Ekene obotoon̄ ejit me lek ogwu inọ
òkinween̄ lek ilibi ikana me ama me ama?
Ikeya si, ekene obotoon̄ ejit me lek
ogwu enerieen̄ ikakaan̄ge ototun̄ ukan̄ eyi kan̄,
ogwu òkilaak me ere geelek egwe ofitbe ọmọ.