Ikan mè ngwugwa
35
Ogwu isun̄ Ikan Okumugwem,ene ya îra igwa owuwa ngwugwa,
irọrọ inu îtọbe ìre igwagwa ngwugwa esuuk.
2 Ikakaan̄ ata ejit me useen̄ ata ejit ofifi ene okaan̄be,
ìbet lek igwagwa ngwugwa akpa,
icheche inu inyi ebi ugbọọn̄,
ìbet lek igwagwa ngwugwa onirọ.
3 Isasan̄a lek me ijo inu ìkibele Okumugwem ejit,
isasan̄a lek me inu ikatatge ìre irọrọ esuuk.
4 Kasibi ìnu me isi Okumugwem ukpọk ubọk,
5 mije, ngwugwa geelek osabe inu ìre ubọk ikan otumube.
6 Ngwugwa ogwu ata irọrọ ìkijaan̄ isi ntook,
utop olu kan̄ ìkinene ire isi Ogwu Òbebene Ichit.
7 Okumugwem ìkibọbọkọ ngwugwa ogwu ata irọrọ itap,
ìkakiwuuk mgbọ geege.
8 Chili ubọk gwa ngwugwa sa nyi Okumugwem umin,
kachit ubọk me lek adasi mfut obonyi ọmọ.
9 Ngwugwa geelek obonyi, otu kwun̄ ikup imọm imọm;
irek ge me akọp irek kwun̄, nyi me ubelejit.
10 Nyi Ogwu Òbebene Ichit ike ubọk înyibe owu,
mè chichili ubọk nyi ike okọtbe.
11 Okumugwem okitap ichit,
môtap ichit itoon̄ me inyọn̄ mgbọ jaaba inyi owu.
Unen Oyerebet Awaji
12 Karie Okumugwem udun̄ me ubọk, ìkpobọkọ;
kasa ngwugwa ngan ìtoon̄ ejit,
mije, Okumugwem ìre ogwu oyerebet,
ìkakisibi oyerebet ulibi chieen̄.
13 Ìkakilibi chieen̄ ìfeen̄ ogwu ugbọọn̄,
ìkinọnọ uriaak ogwu erọbe ilọ.
14 Ìkakikpọ mbeek ogwu kpà-nte ìlọ chieen̄,
mè ìre uriaak ogwu nwakpa okigbuku igwook.
15 Mun̄ ito òkigbọọk nwakpa me chieen̄ igwook me isi kan̄,
ìkito ito ikeme ogwu òrọrọ ibe nwakpa ito ito?
16 Awaji ìkibọbọkọ ogwu òsa otutuuk
ejit irọ ikwaan̄ inyi ọmọ itap,
uriaak ene ya ìkirere akpabin inyọn̄.
17 Uriaak ogwu òsisiki lek ìkekichim akpabin inyọn̄ itibi iraka,
ìkpowọ efuuk mege òre isi Awaji;
ìkpoyaka ikeke mege Ogwu Òbebene Ichit ofọọk otu,
mè ofieek unen oyerebet onyi ogwu ata irọrọ,
mè onyi ogwu ijo ene osusut.
18 Okumugwem ìkpobofiat mgbọ,
ìkpokakaan̄ si nsan me lek kiban̄;
mege òfan̄a ebi kpekikaan̄ nsan ebon,
mè orọ ebi ido cha useen̄ inu ema erọbe;
19 mege òkpan̄ urum ebi ugumulek òsan̄a,
mè òfaan̄ okuba ebi ijo irọrọ;
20 mege môkpebe ogwu ebilene mkpukpe
ikpọ me ubọk irọrọ kan̄ odobe,
mè inu ene orọbe, igọọk me ekiket ene ya okaan̄be,
21 mege môsibibe oyerebet inyi ebi kan̄,
mè irọ ema enwọọn̄ unwọọn̄ sa me nsan kan̄.
22 Ekibọbọkọ nsan kan̄ itap me mgbọ ufialek,
kubọk ekibọkọ oduku inyọn̄ òkirep ibot itap me mgbọ una ibot.