Imumun̄ ilaak ìkasibi inu geege
34
Ogwu mbubut ìkikpọ chieen̄ me lek inu ikike mè inu ofiaan̄,ogwu tuntun isimumun̄ ilaak, îra ikiwulu.
2 Ogwu òchieek me lek ilaak emun̄be,
ìbet lek ogwu òtet ogugo, mè ikigọọk efet ibotet.
3 Inu emun̄be me ilaak ìre ogugo ikike,
ìkup kubọk ene okikpọ isi kan̄ me emen umọọn̄.
4 Keke ke inu òbabat obokọt irọ ibe itana?
Keke ke ataak oborọ ibe ire atikọ?
5 Ido-inu, mè nlilo, mè mun̄umun̄ ilaak, ìre inu ikike,
ema ebet lek nke nke ekiket òkinin̄ ene ejit,
kubọk ekiket òkinin̄ ejit enenwaan̄ uman okitet.
6 Îtata Ogwu Òbebene Ichit
osa mun̄umun̄ ilaak inyi owu ulook,
kasa lek ìgọọk mun̄umun̄ ilaak.
7 Mun̄umun̄ ilaak îfiaan̄ owuwa ene,
ebi ìsasa itoon̄ ejit, îtọbọ ema ilọ.
8 Ìkare ofiaan̄ ke ebesa irọ Ikan Awaji ijot,
iriọọn̄-inu îso ifuk me otu ebi ata irọrọ.
Ikwekween̄ inu inan̄a me isisi ije
9 Ogwu òjeje ije isi owuwa ere îriọọn̄ owuwa inu,
ogwu òmumun̄ inu iwa îriọọn̄ inu îkitumu ikọ ofolek.
10 Ogwu ikamun̄ge inu ìwa, ìriọọn̄ inu ìnen mè ìnen gaalek,
ire, ogwu òjeje ije ke chieen̄ obolo enenen.
11 Mmun̄ owuwa inu me oniin̄ ije n̄a,
inu nkween̄be îwa iraka inu mâkọtbe ikpa.
12 Owuwa mgbọ nchichini me lek mfat echi mosa mkpa ijet emi,
ire, îre inu nkween̄be me ije cha orọ nkinwọnọ.
Tet ukpook Okumugwem
13 Ebi ìkitet ukpook Okumugwem mêluk ugwem,
mije, ikpọchieen̄ kiban̄ ìkup me lek
ogwu òbokọt inyan̄a ema isibi.
14 Ogwu òkitet ukpook Okumugwem ìkpofieek owot,
ìkpore si ogwu ukpook owot,
mije Okumugwem ore ikpọchieen̄ kan̄.
15 Ubelejit môkup inyi ogwu òkitet ukpook Okumugwem.
Ekene ke îkitoon̄ ejit me lek? Ekene okitap ubọk inyi ọmọ?
16 Chieen̄ Okumugwem ìgwuun̄ me lek ebi ìmama ọmọ,
ọmọ ore ikput-lek ònyenye
mè ibieen̄-lek ònyenye inyi ema;
ọmọ okikwek efet òkinyiaan̄ ene akpa me lek kiban̄,
mè ikikwek ema ibot me unye ura ikarek;
ogwu òkibem ema, inyi ekakwaak ìrọn̄,
mè ikitap ubọk inyi ema, inyi ekanan̄a ìrọn̄.
17 Ọmọ okirọ ejit ikibele ema,
mè ikinyi chieen̄ kiban̄ utoon̄;
ọmọ okinyi ema igwagwa, mè ugwem, mè ugbana.
Igwagwa ngwugwa
18 Ogwu isa inu îkaan̄be me ngan igwa ngwugwa,
ngwugwa keya îchaka mbuban me lek,
ngwugwa ogwu ìkakisun̄ ikan,
Awaji ìkakibọkọ ìtap.
19 Ogwu Òbebene Ichit ìkakibele ejit
me lek ngwugwa ogwu ikariọọn̄ge ọmọ;
ìkposa me lek owuwa ngwugwa itele ijo.
20 Ogwu òmọnọ inu ogwu ugbọọn̄ isa inigwa ngwugwa,
ìbet lek ogwu òtet gwun̄ ofifi ene igwu
me chieen̄ nte gwun̄ ya gaalek.
21 Sọntiik inorie ogwu ugbọọn̄ oriebe ore ugwem kan̄,
ogwu geelek òtetet ikaan̄ ibe ikarie, ìre ogwu òkpan̄ ene.
22 Ogwu òtetet inu ogwu melek kan̄ okisa irie inorie ibọkọ,
ìre ogwu òkpan̄ ene,
ogwu òtetet mkpukpe ogwu ikwaan̄ ikaan̄, ìre ogwu òfiat eje.
23 Ene ge onama, ofifi ene ogbugbugbọ,
mọmọ oruru kiban̄, isan̄a me lek unye ikwaan̄?
24 Ene ge okigbana, sà ogwulọ okifieek otu,
ida ogwu owa ke Okumugwem obonọ?
25 Ene ochak ubọk me lek nkwukwu ene, mè igwọk lek,
mè ikpọk ichak si, mọmọ oruru igwọk-lek kan̄?
26 Ikeya si, ogwu ònin̄ ijin-otu mije ijo inu kan̄,
mè ikpọk isi irọ ijo inu cha si,
ekene obogban̄ uriaak kan̄?
Kpasi oruru ke îkaan̄
me irọrọn̄ lek me ijọn̄ eyi îrọn̄be?