33
Kpunu ijo inu geegeòborọ ogwu òkitet ukpook Okumugwem,
me emen uyọrọlek,
Okumugwem môkinyan̄a ọmọ mgbọ geelek mgbọ geelek.
2 Ogwu òriọọn̄ inu ìkakicha Ikan Okumugwem,
ogwu òkirọ inu ifiọk ifiọk me lek ikan ya
ìkup kubọk uji egwijo okitọọn̄ ikana.
3 Ogwu òkaan̄ ngobo-ntet môsa ikan itoon̄ ejit,
me lek kan̄, ikan ìre inu mêsabe ibieen̄ ejit
kubọk ìre nriroon̄ eyi Awaji.
4 Nen̄e inu obotumu sun̄, ke mêgban̄ owu utọn̄ me lek,
wọlọ inu okween̄be tet kaan̄, sabum òbene itutumu ikọ.
5 Ejit ogwu burubut ìkiyak ikana kubọk ekpirikpo,
ekiket kan̄ ìkigbagba iyak ikana okokop.
6 Unene òkirọ unene ochak ìkariọọn̄ ulom mè ujit,
ìkup kubọk inyinya òkitaan̄ ukpo inyi ene geelek òkikọp ọmọ.
7 Keke orọ usen ge imin igak ge,
me mgbọ ura yaage okibum itoon̄ me lek usen geelek me acha?
8 Îre sa me iriọọn̄-inu Okumugwem ke ema esa inwunween̄,
îre Okumugwem si osun̄ esese ibot mgbọ mè esese ijọk.
9 Usini usen ke îrọ usen ile mè isun̄ usini me mbuban,
echichilọ ke îsa irọ usen ikike.
10 Otutuuk ebilene enan̄a me ijọn̄ isibi,
Adam me lek kan̄, esa mfuun̄ ijọn̄ irom.
11 Okumugwem ìsa òjot òjot iriọọn̄-inu kan̄ inwunween̄ ebilene,
mè isun̄ irek kiban̄ esese esese.
12 Usini ene ke îgbana mè isun̄ me irek òbebene,
usini ke îsun̄ mbuban, mè ito iriaak me lek kan̄;
sà ebibilọ cha ke îfieek otu inyi, mè igele isiki,
mè isan̄a isan̄a me irek kiban̄.
13 Ike arika okupbe me ubọk ogwu òbot ugọn̄,
inyi isa ọmọ ibot inu geelek òneneme ọmọ;
ikeya si ke ebilene ekup me ubọk Ogwu Òrom kiban̄,
inyi isa ema irọ inu geelek òneme ọmọ.
14 Ire ìkare ata môre ijo, ìkare ugwem môre mkpa,
ikeya si, ire ene ìkare ogwu òriọọn̄ Awaji, môre ogwu ijo.
15 Kpọ otutuuk ikwaan̄ Ogwu Òbebene Ichit orọbe;
ema ekije iba iba, ire ìkare eyiyi môre eyiyilọ.
16 Emi nre òta ene me lek ebi ìbebem ere;
ǹkup kubọk ogwu òkirọọn̄ uko òkigọọk ebi ìkigbeme gerep me udun̄.
17 Sa me nsan Okumugwem, emi ndasi inire,
mè itap gerep ijot ere ichimi-gerep n̄a
kubọk ogwu òkigbegbeme gerep.
18 Riọọn̄ ibe ke ǹkarọ ikwaan̄ ìnyi lek n̄a gaalek,
ire, ke ǹrọ inyi otutuuk ebi ìkiweek ikwekween̄ inu.
Ikaan̄-lek
19 Enyi ebi ilile me etete ebi ene, ìgban̄ emi;
enyi ebi ibot me etete urum ene, ìgbala utọn̄ ìnọ!
20 Me otutuuk ugwem kwun̄,
kanyi ene unye ibe ikana ogwu ibot inyi owu,
mè ìre gwun̄ mè ìre nwa, mè ìre ngwan̄ mè ìre unene;
kayaka inu okaan̄be ìnyi ofifi ene,
kperiọọn̄, owu môkọt inwene ejit, mè ibe iyaka inyi owu.
21 Mgbọ okupbe me ugwem, mè ikifuuk efuuk,
kanyi ene unye ibe ibọkọ irek kwun̄.
22 Mije, ìgbe ibe bọn kwun̄ ekebeek owu inu me ubọk,
igak owu ikekikpọ chieen̄ ibọbọkọ inu me ubọk bọn kwun̄.
23 Re ogwu isi me lek inu geelek okirọ,
kachieek okpa geege iken umin kwun̄.
24 Usen ugwem kwun̄ isiso,
mgbọ mkpa kwun̄ isire, tolek che ìrot kwun̄.
Ebi Usun̄
25 Mbubet, mè uti, melek akpan ìkup inyi inyinya,
inorie, mè ikan̄-inu, melek ikwaan̄ ìkup inyi ogwu usun̄.
26 Ire onyi ogwu usun̄ ikwaan̄, owu môsiki efuuk;
ire otele ọmọ ikup ukpọk ubọk, môweek ikaan̄-lek.
27 Ọgbọn mè igbọ môrọ anam igele ibot,
ire, mgba-mfiik mè tukutuku okup inyi ogwu usun̄ unye-ibot.
28 Tap ọmọ ikwaan̄ me ubọk, inyi ikakup ukpọk ubọk,
mije, ikukup ukpọk ubọk ìkijeen̄ ene irọrọ owuwa inu ikpak.
29 To ọmọ me ere ikwaan̄ kan̄, ere ògbegbe ibe ikup,
ire inye ibot, sa mkpọn gon ọmọ kam.
30 Ire, karọ ene geege me lek unye unye,
mè karọ si inu geege eyi ikanenge.
31 Ire okaan̄ ogwu usun̄ ge gaalek,
kpọ ọmọ kubọk okikpọ lek kwun̄,
mije, òkwọkwọkọ eje me isi isa ilep ọmọ.
32 Ire okaan̄ ogwu usun̄ ge gaalek,
kpọ ọmọ kubọk ìre ngwan̄ kwun̄,
mije, owu môweek ọmọ kubọk okiweek lek kwun̄.
33 Ire orọ ọmọ me lek ikpak ikpak, mè ire ilibi inan̄a,
ere owa ke obosi iweek ọmọ imun̄?