Ubọk irọ inu me irek ijọk
32
Ire esa owu ito ogwu ibot me irek ijọk, kabene lek kwun̄;kup melek ebi ene kubọk ene ge me etete kiban̄.
Dasi kpọ chieen̄ me lek kiban̄ san̄a,
sabum ònosiki òkweek irek.
2 Osirọ ikwaan̄ kwun̄ otutuuk iso, mọnọ irek eyi kwun̄,
inyi owu ògọọk ema òbele ejit,
mè ema enyi owu umin
me lek ata ogwu ibot owu orebe.
3 Enyi ebi ugane, ìtumu ikọ,
mije, îre unen kinyi;
ire, ìriọọn̄ lek ikọ enyi ebetumu,
mè ikagban okwa melek nkwukwak.
4 Ere ijọk inorie mè miin̄ okupbe, katumu ikọ ìwa;
mgbọ keya ìkare ata mgbọ owu ijejeen̄ ibe owu oriọọn̄ inu.
5 Okwa me ere ijọk miin̄ ìkije inin̄,
kubọk iman̄ òriọọn̄ ewuuk rubi esabe alata araran̄ ikpa ikana.
6 Okwa òtotop melek ata miin̄ ìkijaan̄
kubọk iman̄ òriọọn̄ ewuuk emeran
esabe alata araran̄ ikpa ikana.
7 Enyi nsabọn irieen̄, ìtumu ikọ, ire ikup me uyọt,
ire, ire enyi enyi irek, ikatumu ìraka mgbọ iba.
8 Tumu mgbidim mgbidim, otu ikọ inen mè inen òbeben inu iwa;
rọ kubọk ke oriọọn̄, ire, òkaweek itutumu.
9 Me etete ebi ilile, karọ kubọk owu melek kiban̄ ìre ogbo;
katap otu mgbọ ofifi ene okitumu ikọ.
10 Omumen-inyọn̄ okidasi ije me isi nsook-isinyọn̄,
ikeya si, sabum ogwu òriọọn̄ lek oborere,
ebi ene mîra ibebene ikinyi ọmọ umin.
11 Nan̄a me irek ijo ya fo me ata mgbọ, kaje udun̄;
gwat lek raka fo uwu, kagbugbaan̄.
12 Rie utop ugwem me ere ya ike ejit kwun̄ omabe,
ire, katumu usem ìgugo lek, mè ìsa me ikeya ìrọ ijo inu.
13 Ògak ge, tọn̄ Òrom kwun̄,
ogwu ònyinyi owu owuwa uche.
Ubọk Awaji okisa ikpọ chieen̄ me lek inu îrombe
14 Ogwu òkitet ukpook Awaji okibọkọ ikan̄-inu kan̄ itap,
ebi ìkinan̄a ilaak ewelegwe ewelegwe ikigwen ọmọ
mêmun̄ nnwọn kan̄.
15 Ogwu òweek Ikan Awaji ke ìbojot owot,
ire, ogwu isi iba ke ìboda ito.
16 Ebi ìkitet ukpook Okumugwem ekiriọọn̄ unen oyerebet,
ata irọrọ kiban̄ môsibi kubọk utoon̄.
17 Ogwu ijo ene ìkakima ikan̄-inu,
ìkififila ikan, inyi ọmọ ikọt irọ inu òneneme ọmọ.
18 Ogwu òriọọn̄ inu ìkakijit ata nkeek enyibe ọmọ,
ire, ogwu ugumulek ikariọọn̄ge Awaji ìkakitet ukpook.
19 Karọ inu geege ire òkadasi ìkpọ ìkpan̄,
osirọ isan̄a, kabọnọ lek.
20 Kalululuk ìrọ inu mônyibe owu unan,
karọ chieen̄ nlilọ inu yaage mgbọ iba.
21 Kamalek ìsa lek kwun̄ ìtoon̄ ejit,
ubọk geelek oniin̄ orọtbe ire.
22 Gbala chieen̄ kpọ oniin̄ okije,
[mè gwuun̄ chieen̄ me lek nsabọn kwun̄.]a
23 Gwọk chieen̄ kpọ lek kwun̄ me inu geelek okirọ,
mije, eyi ore isusun̄ Ikan Awaji.
24 Ogwu òsa ikan itoon̄ ejit okigban̄ inu ikan otọbe ibe erọ,
ogwu òtoon̄ Okumugwem ejit me lek ìkponin̄ me ichep.