Ufialek òkup me lek ikpoko
31
Itotop chieen̄ me lek inu ubọọn̄ ìkirọ lek ene itak ita,saasaak îkinyi ene ìkilap ilaak isan̄a ene me chieen̄.
2 Saasaak òfo me lek mbubek ìkigban ilaak,
kubọk unye unye orukan̄ si okirọ.
3 Ogwu ubọọn̄ ìkikwukwulu inyi ọmọ ikaan̄ inu ubọọn̄ ititiin̄ isun̄,
inyi ọmọ itap efuuk, mè iniluk ikirie utop otu.
4 Ogwu ugbọọn̄ ìkikwukwulu, ire, irerie kan̄ ìkiyọyọt,
isilululuk itap efuuk, una ubọk îra itet.
5 Ogwu òkimalek ima ikakaan̄ alata araran̄,
kpebefuk ibe ìre ata ene;
ogwu òkigọọk ikpoko me unye me unye,
ikpoko môtap ọmọ me ijo inu.
6 Owuwa ene mîchep lek kiban̄ mije alata araran̄,
mfufiat ìchichichini ema isi me isi.
7 Ikpoko ìre ufe inyi ebi îkilọk iraak iraak,
ogwu geelek òrere mbubut ke ufe kan̄ obotet.
8 Ubelejit môkup inyi ogwu ubọọn̄ emun̄be ibe ke ìkarọ ìlọ,
ogwu ìkasa lek kan̄ ìgọọk alata araran̄.
9 Ire oriọọn̄ ojelek ogwu òkup ikeya, tumu, inyi eji mêtọn̄ ọmọ;
mije, îrọ uyeke uyeke inu me etete ebi kiban̄.
10 Ekene oje itibi ntọ-mkpọ keyi, mè isibi me ata lek?
Ene ya igugo lek ma.
Ekene okaan̄ unye isasa ije ilọ, ire, ìkaje ìlọ,
mè ikaan̄ unye isasa irọ ijo inu, ire, ìkarọ?
11 Ubọọn̄ kan̄ môkeke inye ebon,
ebi ama si mêtọn̄ ọmọ me ata ejit kan̄.
Eru me ere inorie
12 Ìre orak ikup me lek ikasi inorie me uwu ebi ìbọbọọn̄ ubọọn̄?
Kachili otu ìbook ìrie,
mè kabe, “Iyak, inorie îwa me ere yi-o!”
13 Keek ibe ke chieen̄-ile ìre ijo inu;
kpunu inu geege erombe òkakaan̄ chieen̄-ile igak chieen̄.
Îre mije keya ke îkigbuk mun̄ ito
igwook mgbọ geelek.
14 Kanyana ubọk ìkana ìweek inu geelek chieen̄ kwun̄ omun̄be,
kabieen̄ ene ìsan̄a, inyi ubọk kwun̄ isoon̄ inorie.
15 Sa ubọk îkupbe owu me lek
dọmọ ubọk îkupbe me lek ogwu melek kwun̄,
mè kaan̄ ekiket ofolek kiban̄ me lek inu geelek.
16 Rie inorie geelek esun̄be me isi kwun̄
kubọk ogwu ejaan̄be ubọk ikpukpo,
karie ejit ge ejit ge, mônaan̄ ene ejit.
17 Re ogwu adasi ene orerie ifieek, ubọk îgbebe ibe ogwu ata eru irọ,
karie kubọk ogwu owot ìkakijot, mônaan̄ ene ejit.
18 Ire okup me etete owuwa ebi ene ikirie inorie,
kadasi ìchibi inorie sabum ebibilọ.
19 Sọntiik inorie îso ogwu ònọ lek,
ìkpofuuk efuuk unye unye mgbọ îkilaak.
20 Irerie inorie ekem ekem ìkitap ene ata ilaak me chieen̄,
mè ene onan̄a òkeke ata ewelegwe ewelegwe me unye-lek.
Ogwu òrerie igak owot ìkpokọt ilaak ilaak,
ejit môwuwot, mè owot si ònaan̄.
21 Ire orie inorie igak owot,
nan̄a keke si gbọ igbọ, ke lek kwun̄ môsiki.
22 Gwun̄ n̄a, gban̄ inu nkitumu, kakpọ emi ìlọ chieen̄,
usen ge, owu môbe emi nnirọ.
Inu geelek orọbe, rọ ekem ekem,
orukan̄ môje owu me lek agba agba.
23 Ebi ene ekitọn̄ ogwu òkigwook inorie ichit inyọn̄ ikasi,
ikọ ekitumu ibak ata ejit kan̄ îtat.
24 Ogwu ìkakichili ubọk ìnyi ene inorie,
ebi ama ekitutumu ikọ ofolek kan̄,
ikọ ekitumu ibak nchit-ubọk kan̄ îtat.
Gele otu me lek miin̄
25 Kasa unye kwun̄ ìsi ìtọ me lek inwọnwọ miin̄,
mije, miin̄ îfiat owuwa ene.
26 Ike ekisa ukan̄ iriọọn̄ unye òkup me lek okwukwut,
ikeya si ke ekisa miin̄ iriọọn̄ ejit ebi ugumulek
mgbọ ema isikibaak ibaak.
27 Miin̄ ìre ugwem inyi ebilene,
ire inwọ ekem ekem.
Ugwem ene ìbokukup, ire kpunu miin̄?
Erom miin̄ ibe ikinyi ene ubelejit.
28 Miin̄ enwọbe mgbọ îgbebe, mè ikeke îkembe
ìkirọ ejit ene itop, mè ekaan̄ unwọọn̄ me emen.
29 Miin̄ enwọbe iraka iman̄ ìkirọ ene ifieek ejit,
mè ikibaak ibaak, mè ikigbugbe.
30 Usa-miin̄ ìkirọ ogwu mbubut inaan̄ ejit unye unye,
mè iben unan;
ìkisan̄a ọmọ unye me lek mgbọ etim akpọ isire,
mè ikirọ ibe esak ọmọ unan ewa me lek.
31 Kagana ikọ ìnyi ogwu melek kwun̄ me ere ijọk miin̄,
kasisaak ọmọ mgbọ îkinwọọn̄ lek;
katumu usem ikpak ìnyi,
kado urieek, inyi ikanaan̄ ejit.