Ikpukpukpo bọn
30
Ute òma ogwu gwun̄ môkisut gwun̄ ya mgbọ geelek,inyi môkisa ọmọ igugo lek mgbọ isimin isibi.
2 Ogwu òsa ikan̄-inu ikpukpo gwun̄ isibi
mômun̄ oruru me ubọk ogwu gwun̄,
mè isa ikirọ otu me etete ebi òriọọn̄ kan̄.
3 Ogwu òjejeen̄ ogwu gwun̄ inu môrọ ebi ochicha kan̄ eto mba,
mè òkosa gwun̄ ya ogugo lek me etete ebi unene kan̄.
4 Mgbọ ogwu ute isikwu, ìkpokup kubọk îkwu;
mije, înwene lek kan̄ ito.
5 Mgbọ îkupbe me ugwem, gwun̄ ya îkinyi ọmọ unwọọn̄,
eyi îkwube ye, ìkakaan̄ saasaak.
6 Ene òwa me udun̄ kan̄ ogwu òborọ ebi ochicha kan̄ useen̄ inu,
mè ikpe ebi unene kan̄ mkpukpe ata inu erọbe ọmọ
7 Ogwu òfafiat ogwu gwun̄
môkibọp unan òbokisak ogwu gwun̄ me lek,
mgbọ geelek gwun̄ ya obọn̄be ukpo, ejit kan̄ îra ifieek.
8 Inyinya ekajeenge ikwaan̄ ìkikana anam unye-ibot,
ikeya si, gwun̄ kpekikan̄ inu inyi ìkikana ogwu òkpaka ibot.
9 Orireek gwun̄, môtap owu ukpook me lek,
ogọọk ifit ifit, mônyi owu ufieejit.
10 Kagọọk ọmọ ìchak imọm, inyi okagọọk ọmọ ìkaan̄ ufieejit,
me mgburudun̄, owu mônenikitaka ejeek.
11 Kanyinyi ọmọ irek mgbọ îrebe ijija,
kakpọkpọ si chieen̄ ilọ me lek inu geelek îrọbe ilọ.
12 Keme ọmọ ebek siki mgbọ îrebe ijija,
mè sulu agba udun̄ kan̄ bak mgbọ îrebe nsek;
ire òkarọ ikeya, môkinye ibot, mè ikikpaka ibot inyi owu,
mè inyi owu ufieejit me ibot ejit kwun̄.
13 Kan̄ inu nyi gwun̄ kwun̄ mè nyi ikwaan̄ ikirọ,
inyi ejit ikanaan̄ owu me lek ọmọ ikakaan̄ge esip me isi.
Unye-lek
14 Ogwu ugbọọn̄ lek onyebe mè iso,
înwọn igak ogwu ubọọn̄ emen kan̄ okikup orukan̄ orukan̄.
15 Lek ònyenye ene mè iso kwok kwok
înwọn igak alata araran̄ geelek,
akpalek òsoso ifuk mè ikeke inye
înwọn igak inu ubọọn̄ ikakaan̄ge otu ifuk.
16 Kpunu inu ubọọn̄ ògak anam akpalek ònyenye,
kpunu si ubelejit ògagak unwọọn̄ emen ejit.
17 Mkpa înwọn igak ugwem tukutuku,
ilalaak ilaak ire mgbọ ikakaan̄ge itata
înwọn igak kọbọkọbọ orukan̄.
18 Ata inu egwookbe itap me otu òchichit,
ìbet lek ngwugwa inorie esun̄be me inyọn̄ udọn̄-ufuun̄.
19 Keke ke mkpọmfaka obosa ngwugwa irọ?
Mije, ìkporerie, ìkponọnọ si olu.
Ogwu Okumugwem okinyi osusut
ìkup si ikeya.
20 Môkọọn̄ chieen̄ ikpọ inorie kan̄, mè ifiọọk,
kubọk ogwu esan̄abe òsok okifiọọk
mgbọ isikat obaak enenwaan̄.
Ubelejit mè ufieejit
21 Kajit lek ìtele ìnyi ufieejit,
kagegen si ibak ìnin̄ ugwuuk.
22 Ubelejit ore ugwem ene,
unwọọn̄ ìkirọ ugwem ene ijọn̄ọ.
23 Nwọọn̄ lek kwun̄, mè kaan̄ ukarajit,
mè bieen̄ ufieejit jọn̄ọ ere me lek kwun̄,
mije, ufieejit îfiat owuwa ene,
ìkakakaan̄ oruru geege îkisibi ene.
24 Mba-ejit mè unaan̄-ejit ìkirọ ugwem ene ifieek mgbidim,
ogbogbo ekiket ìkirọ ene ikup nsek nsek ikan.
25 Ebi isi otọn̄ọbe, ejit obelebe
ke inorie okirọ oruru inyi.