Ifọfọọk ikpoko
29
Ogwu òkaan̄ ejit nsan ìkifọọk ikpoko inyi ogwu melek kan̄,ogwu òtatap ubọk inyi ogwu melek kan̄,
îsun̄ Ikan Okumugwem.
2 Fọọk inu nyi ogwu melek kwun̄ mgbọ îkupbe me una;
ire ogwu melek kwun̄ ifọọk inu inyi owu,
mgbọ isikem, yaka kpe.
3 Sun̄ use kwun̄, mè karọ ọmọ ofiaan̄,
ire osun̄, owu môkikaan̄ inu òkup owu me uyọt
mgbọ geelek oweekbe.
4 Owuwa ene ekimọnọ inu efọọkbe kubọk inu ubọọn̄ ebesusun̄,
mè ikisa me ikeya itap ufialek me lek ebi ìtatap ubọk inyi ema.
5 Usini ene ekirọ ene me lek rererek, inyi ifọọk ọmọ ikpoko,
mè otumu ikọ utop utop obak ikpoko ene ya okaan̄be,
mgbọ îboyaka ikpoko ya ikpe isire,
mônenikidudulu,
mè ikpọkpọ ikifiaan̄ ogwukaan̄,
mè ikinina lek ibe ke mgbọ keya ìre ijo mgbọ.
6 Ire ibokọkọt ikpekpe,
ogwukaan̄ ìkpobọkọ iso ìkike iba me lek,
sọntiik keya mônenire atisi inyi ogwukaan̄.
Ire ìkakọt ìkpe, îfeen̄ ogwukaan̄ ikpoko;
mônenimọnọ ogwa me chieen̄ ochicha
me kpunube ibot me lek,
mè inisa ufieek-otu mè unyechieen̄ ikpe ogwa;
kpan̄asi ìbonyi ogwa ulibi, ìbokikpọkpọ isiki chieen̄.
7 Mije keya, owuwa ene kpeyaka ikima ifọfọọk ene ikpoko,
ìkare mije ema kpekichili ubọk,
ire, îre mije ukpook ibe ke mêfeen̄ ema me oniin̄ ikagbege.
Inyinyi me ata ejit
8 Ubọk geelek si, kaan̄ ata ejit me lek ebi irek kiban̄ ofieekbe,
katet ema ìkaan̄ ìfiin̄ mgbọ sabum ònoche inu onyi ema.
9 Sa mije Ikan Awaji tap ubọk nyi ebi ugbọọn̄,
katele ibe ema eje ukpọk ubọk efo
mgbọ inu oyọtbe ema me lek.
10 Tele ikpoko kwun̄ ichep inyi ngwan̄ kwun̄ mè ìre unene kwun̄,
kachieek ibe ikpoko kwun̄ ikup me irak ewuuk
itaka achiaan̄ ichep.
11 Sun̄ inu ubọọn̄ kwun̄ gọọk me lek ikan Ogwu Òbebene Ichit,
ke môsibi owu oruru igak alata araran̄.
12 Sun̄ inu icheche inyi ebi ugbọọn̄ me uwu isun̄-inu kwun̄,
ke môtaba owu isibi me ufialek geelek.
13 Ọmọ onwọn igak agbọ ònyenye mè otunwa òlolobo lek,
môtim akọn̄ ibot kwun̄ me lek ebi ochicha kwun̄.
Ikekeke ata-ikọ ifọọk ikpoko
14 Ogwu ata ene môkeke nsọọn̄
inyi ogwu melek kan̄ ikọt ifọọk ikpoko,
ire, ire ogwu ikakaan̄ge esip me isi,
môleke ogwu ata ene ya ifiin̄.
15 Kawuuk ata inu ene orọbe inyi owu
me ikekeke nsọọn̄ inyi owu òkọt òfọọk ikpoko,
îre ugwem kan̄ ke îsa inyi me ibot kwun̄.
16 Ogwu ijo ene ìkirọ inyi
inu ogwu òkekeke nsọọn̄ inyi ọmọ ichep,
ogwu inu ìkakinin̄ chieen̄ ìkiwuuk ogwu ònyanyan̄a ọmọ isibi.
17 Ikekeke nsọọn̄ îrọ owuwa ebi ìbọbọọn̄ ubọọn̄ enan̄a erọn̄,
mè ikibeen̄ ema itọọn̄ ikana kubọk ekoon̄ me okwaan̄.
18 Ikekeke nsọọn̄ îlilaba ebi ilile isibi me uwu kiban̄,
mè irọ ibe ema esi ekenyinya ekana me ofifi ido.
19 Ogwu ijo òtap lek me ikekeke nsọọn̄,
inyi ọmọ isa me ikeya irie oruru,
ìsa lek kan̄ itap me ikọkọp ikọ.
20 Tap ubọk nyi ogwu melek kwun̄ ike okọtbe,
ire, gbala chieen̄, inyi owu okanan̄a ìrọn̄.
Uwu mè itetet ichen
21 Inu òkup me uyọt ichit me ugwem ene
ìre mudim, mè inorie, mè ekwut,
melek uwu isasa ikilet lek.
22 Ugwem ogwu ugbọọn̄ òluluk me emen uwu oga kan̄
înwọn igak ene irerie ata otu inorie me emen uwu ofifi ene.
23 Tele eyi okaan̄be iso owu chieen̄, mè ìre ìwawa, mè ìre ìkawawa,
inyi okanọ ekichak owu ochak ibe owu ìre ogwu òsi ichen.
24 Ikekije ikana me isotu uwu ene ikirie ichen ìre ijo ugwem;
ere geelek osibe, òkpokọt isan̄a amọn.
25 Owu môbọkọ ebi ichen itap, isa miin̄ isan̄a ala me ukot,
kpebetọn̄ owu;
ire, inu obokinọ ìre ijo usem kechi:
26 “Ogwu ichen, na me ere keyi, na bala ikasi;
nyi emi inu okaan̄be me ere keya ǹrie.”
27 “Ogwu ichen, ngwa, fo, nyi emi agwut ya;
ke ngwan̄ n̄a enerieen̄ òkinu inenigọọk eji ikup.”
28 Îyọt ogwu ònọnọ lek imumun̄ ejitbe ọmọ ichen,
mè ikililaba ọmọ kubọk ogwu òkaan̄ urieek.