28
Okumugwem òkisun̄ ifuk ijo inu kwun̄;eya orọ, ire orọ ene useen̄ inu, ọmọ môrọ owu useen̄ si.
2 Tele nrọ-nlọ ogwu melek kwun̄ orọbe owu nyi,
inyi, osiriaak uriaak, Awaji môtetele si ijo kwun̄ inyi owu.
3 Ire ene iben unaan̄-ejit me ejit ikeme ofifi ene,
ìre ene ya môkpọ chieen̄ ibe
ke Okumugwem môto ọmọ nsan ni?
4 Ire ìkakaan̄ nsan me lek ogwu ebilene ogbo kan̄,
ìre ene ya môbeek ibe Awaji irọ ọmọ nsan me lek ijo kan̄ ni?
5 Ire ogwu ebilene ikike òbokwukwu
iben uyok uyok unaan̄-ejit me ejit,
ìre ekene obotele ijo kan̄ inyi ọmọ?
6 Keek òta usen kwun̄, mè yaka ochicha to;
keek ibe ke owu môkwu, mè ijọ,
mè sa me ikeya sun̄ Ikan Okumugwem nye.
7 Keek Ikan Okumugwem,
mè kanaan̄ ejit me lek ogwu melek kwun;
keek inyan̄a-ibot Ogwu Òbebene Ichit,
mè kpọ ijo inu ogwu melek kwun̄ orọbe owu lọ chieen̄.
Ibaak
8 Kpebe lek me lek ibaak, ke ijo kwun̄ ìkpowa;
mije, ogwu uyok-ejit ìkito ibaak.
9 Ogwu ijo ene ìkifiat unene,
mè otap ochicha me etete ebi ìkup me esuuk.
10 Ike iye owabe ke ukan̄ okilomo;
ike unye-ibot ominbe ke ibaak okiyok.
Ike unye ene ominbe ikup ke unaan̄-ejit kan̄ okimin si ikup;
ike ene obọọn̄be ubọọn̄ ire
ke uyok uyok unaan̄-ejit kan̄ okimin ire.
11 Ibaak ònunu gbei ìkitap ukan̄ me ere,
ikeya si, okput òsisibi gwam ìkisa mkpa inu.
Ijo otu alọm
12 Ofuuk ukan̄, môbeen̄; ocho ataak igwook me lek, môniin̄;
agan̄ iba cha ìkinan̄a me otu kwun̄ isibi.
13 Môfieek inyi ogwu òkikpa ene mè ogwu ataak,
mije, ema mîyiyala owuwa ebi ìluk me esuuk.
14 Ogwu òfiat ene îrọ owuwa ene efieek owot,
mè irọ ema eyiyala enan̄a me ido ge efon ofifi ido;
îjijaka ama ile ònyenye igwook,
mè igbugbọ uwu ebi ilile itutọmọ.
15 Ogwu òfiat ene îlilaba ebi ata nwa isibi me uwu ebi olom,
mè irọ ema ekarie oruru unye ikwaan̄ ema erọbe.
16 Ebi ìkigban̄ ikọ ogwu òfiat ene kpebekaan̄ isiki-efuuk,
kpebekọt si ikpọk iluk me esuuk.
17 Otu njijan̄ ge itoon̄ ene me lek, ìkisibi nlilip,
ire, otu alọm òfiat ene ge ire ene lek, ìkifaan̄ ene ukwuuk.
18 Owuwa ene mîkwaan̄ me otu oge akọn̄,
ire, ebi ìkwakwaan̄ me otu alọm ewa igak.
19 Ubelejit okup inyi ogwu ekwekbe, inyi alọm ikare ọmọ lek,
ogwu ìkarọriọọn̄ ubọk unaan̄-ejit eyi alọm onyebe ire,
ogwu ìkabebeme-nu ọgbọn kan̄,
kpetatap ọmọ si mkpọn eyi alọm me ukot.
20 Mije, ọgbọn alọm ìre ọgbọn okwukwut,
mkpọn kan̄ si ìre mkpọn ekwe.
21 Mkpa ònan̄a me otu alọm ìre ijo mkpa,
ifofo ama ekwukwu înwọn igak.
22 Ire, otu alọm ìkakaan̄ unye me lek ebi ìrọriọọn̄ Awaji,
ukan̄ kan̄ ìkpotaka ebiba.
23 Ebi ìjijit Okumugwem mêrọn̄ inin̄ ubọk kan̄,
môlomo isak me etete kiban̄, kpebekọt iniin̄.
Mêria ijet ema ibe ichim ema kubọk egbe àtat,
mè igwak ema iche kubọk egbe ntọọk ntọọk lek.
24 Ike osabe ukpak iwak ogọ ikana ijọn̄ kwun̄,
mè igon alata okuket kwun̄ mè alata araran̄ kwun̄ isun̄;
25 ikeya si, tọ ulobo ikọ owu okitumu,
mè tap afọn̄ melek olọkọrọ sa gon otu kwun̄ gọm.
26 Gbala chieen̄, inyi okasa otu alọm kwun̄ ìrọ nlilọ inu,
mè ìrọn̄ ìnin̄ me ubọk ogwu òkukup ikikpọ owu ibotet.