27
Owuwa ene mîrọ ijo inu inyi ema ekaan̄ oruru,ogwu iweek ibọbọọn̄ ubọọn̄, ìbofifiik chieen̄ ikam.
2 Ike ekigon okpọ̀kọ inwaan̄ ikam me agbagba ewuuk iba,
ikeya si ke ijo inu okinin̄ inwaan̄
ikam me agbagba ilelep mè inyanyam.
3 Ire ene ìkakeke ìnye itetet ukpook Okumugwem,
uwu kan̄ môgwat lek igbuku icho.
Usem ìkikpọk mbum ene
4 Isisisik ugen̄, mkpukput îra isibi;
ikeya si, ene isitumu ikọ, nrọ-nlọ kan̄ îra isibi utoon̄.
5 Abọt ukan̄ ke ekisa itọ ugọn̄ ogwu òbot ugọn̄ obotbe ikpọ,
ikeya si, ukpatu ene okpabe ke ekisa itọ ogwu ene orebe.
6 Mfut uti otobe ke ekisa iriọọn̄ ubọk ekpukpobe uti,
ikeya si, ikọ ene otumube ke ekisa iriọọn̄ ejit ene.
7 Katọn̄ ene mgbọ ìkatutumu ikọ nu,
mije, ikọ kan̄ ke ebesa iriọọn̄ ogwu ọmọ orebe.
Ata eru
8 Ire olibi igọọk unen oyerebet, môre owu ubọk,
owu môkekitap ọmọ kubọk ofọnti awudu ekisa irie ijọk.
9 Ebi kè unọn ekigọọk echi mbet kiban̄ igbaan̄ ilaak me ere ge,
ikeya si, ugwem kpunube ofiaan̄
ìkika igọọk ebi kpekaan̄ ofiaan̄ me emen.
10 Egbe àtat ìkitutuun̄ ikpọ anam ìbochim,
ikeya si, ijọ inu ìkikup ikpọ ebi ìkirọ nlilọ inu.
11 Ukpatu iriọọn̄-inu ke ogwu òriọọn̄ Awaji okikpa mgbọ geelek,
ire, ikọ ogwu mbubut ìkinwunween̄ kubọk onyan̄.
12 Ire onin̄ me etete ebi mbubut, week oniin̄ gwat lek sibi,
ire, ire onin̄ me etete ebi ìriọọn̄ inu, fiat mgbọ kup fiin̄.
13 Ukpatu ebi mbubut ìkinanaan̄ ene ejit,
mbele miin̄ mè òje oyet cha ema ekibele isa ikichak imọm
ìre ijo inu.
14 Ifieek-otu kiban̄ mè inyan̄a-ibot kiban̄ ìkikama ene ibot,
ibaak kiban̄ si ìkirọ ebi ene efan̄a uti enwaan̄ utọn̄ echit.
15 Ibaak ebi ugumulek ìkisa mkpa inu,
itiik kiban̄ ìkare inu ekikọt igban̄.
Isusun̄ nlelet ikọ me nlelet
16 Ogwu òkpa nlelet ikọ, îfiin̄ utoon̄-ejit ekaan̄be me lek kan̄;
ìkpokọt imun̄ ata unene iyaka ikaan̄.
17 Ma ogwu une kwun̄, mè keke nye me lek,
ire, ire owu okpọk mbum nlelet inu kan̄, kayaka ìgọọk ìje.
18 Mije, owu ojijaka irek unene kwun̄ melek kan̄,
kubọk ene okijijaka ogwu ochicha kan̄.
19 Ike otelebe ofut inan̄a me ubọk kwun̄ iwulu ifo,
ikeya si ke otele ogwu unene kwun̄ ifo,
owu òkpokọt ikpọk ikaan̄ ọmọ ofifi.
20 Kamamalek ìlibi ìgọọk ọmọ, mije, ọmọ îje ijọn̄ọ ere;
îlibi ichep kubọk òso ònwọnwọnọ me otu ufe.
21 Mije, mêkọt ibọp unan,
mè ètele unyechieen̄ enyi ene,
ire, me lek ene geelek òkpakpa nlelet ikọ,
kpunu ikpọchieen̄ geege òyayaka ikup.
Isi iba
22 Ogwu òkifiik chieen̄ îkaan̄ ijo ekiket me ejit,
ebi ìrọriọọn̄ ọmọ ebekije nsọn nsọn me lek kan̄.
23 Me isi kwun̄, môtumu ikọ utop utop ibak owu,
mè itọn̄ ikọ kwun̄ enenen;
ire, me udun̄ kwun̄, môgwu ikọ kan̄ ikom,
mè osa ikọ kwun̄ gaalek òtọp okana okeme owu me ibot.
24 Ọmọ ke ncha ichit me lek otutuuk inu nchabe,
Okumugwem si ìchacha ọmọ.
25 Ogwu itọbọ mgbọlọ itat ifo inyọn̄,
inyọn̄ ibot kan̄ ke mgbọlọ ya oborọn̄,
ogon ene akpọ me nnaan̄, owu si môben unan.
26 Ogwu irọkọ udọn̄, môrọn̄ inin̄ me emen,
ogwu itip ufe, môjeen̄ me otu ufe kan̄.
27 Ogwu irọ ijo inu, ijo inu ya môkat ikana initoon̄ ọmọ me ibot;
ire, ìkporiọọn̄ ubọk îjebe.
28 Ebi ugumulek ekichak ene ochak mè ikitiik ene itiik,
ire, useen̄ kan̄ òwa okilet ituun̄ ikpọ ema kubọk egbe àtat.
29 Ebi ìkibele ejit ibe ogwu eyi Awaji înan̄a irọn̄,
ebejeen̄ me otu ufe,
ufiak ìbotataka ema lek itak ita sabum mgbọ mkpa kiban̄.
30 Unaan̄-ejit mè unye unye uyok-ejit ìre si òchichaka inu,
ire, ogwu ijo ene ìkikakaan̄ iba chi iso.