Ata enenwaan̄
26
Ubelejit okup inyi olom òkaan̄ ata nwa;mêsọkọ usen ugwem kan̄ iso mgbọ iba.
2 Òjot òjot nwa ìre unwọọn̄ inyi olom,
ogwu olom môluk otu ifuk usen ugwem kan̄ iso me esuuk.
3 Ata nwa ìre ugbana òmimin,
esun̄ ọmọ inyi ogwu enerieen̄ òkitet ukpook Okumugwem.
4 Ogwu enerieen̄ ya, ejit kan̄ ìkibebele,
mè ìre ogwu òbọbọọn̄ ubọọn̄, mè ìre ogwu ugbọọn̄,
isi kan̄ ìkire imọm imọm mgbọ geelek.
Ijo enenwaan̄ ore ijo inu òfefieek ichit
5 Îkaan̄ inu ita nkilibi lek,
mè òso inu ini eyi nkitet ukpook me lek:
inu cha ìre, itutumu ene ifiat me emen ama,
mè ebi ene ìtititiin̄ me unaan̄-ejit iberọ afa,
mè itotoon̄ ene uraamọn;
otutuuk inu chi îfieek igak mkpa.
6 Ire, enenwaan̄ òkimin ejit me lek ogwu uwuk
ìkinyi ene sasaak mè ufieejit;
otu kan̄ ìkirereke me lek ene geelek.
7 Ijo nwa ìbet lek uti ibeme-inu òkigbọọn̄ ene oguga,
itetet ọmọ igba ijọn̄ ìbet lek itetet eferen̄.
8 Nwa ònwọnwọ miin̄ isa ìkitap ikpele unaan̄-ejit,
ìkakikọt ìlet inu esip îkirọ.
9 Nwa barabat, ekisa emen chieen̄ îkisa ikpọ ene iriọọn̄;
ubọk îkikpọ ene agba agba ìkakichieek ibe ilet.
10 Keme gwun̄ kwun̄ enenwaan̄ òkinye ibot kaan̄,
ire ìkare ikeya, irek geelek îkaan̄be, ìborọrọ inu òneme ọmọ.
11 Gwọk chieen̄ kpọ chieen̄ kan̄ òkimumen ikana,
ire itọbọ owu ilọ, ikake owu chieen̄.
12 Ike ogwu ije ebek orakbe okichili otu
inwọ mudim geelek îmun̄be,
ikeya si ke gwun̄ ya obokweek irek me isi uwu ọfọ geelek
ichili otu akpa oraan̄ kan̄ ibook inyi esook oraan̄ geelek etap.
Inu ata nwa orebe
13 Uja emen isi enenwaan̄ okaan̄be
ìkekitap ogwu olom ulọk me emen,
inu îriọọn̄be ikirọ ìkekirọ lek ogwu olom ijaan̄.
14 Nwa, ogwu ìkakisan̄a amọn,
ìre uche ònan̄a me ubọk Okumugwem,
kpunu inu geege ònyenye otu ewe
igak ubọk îkisa itet lek kan̄ ikaan̄.
15 Nwa, ogwu ìkakifiat ikpoko, ìre inu ònwọnwọn itoon̄ urot,
itetet lek ikaan̄ kan̄, kpunu inu itọ-inu geege ebekọt isa itọ.
16 Kubọk ura okibum itoon̄ me lek ogoon̄ Okumugwem;
ikeya ke uja eyi ata nwa òkup me emen uwu esun̄be ijaan̄.
17 Kubọk ukan̄ òkilomo me inyọn̄ ngugọọn̄ mkpukan̄ mbuban,
ikeya ke uja isi òkup me akparalek òsisibi ìkeke okup.
18 Kubọk atà alata araran̄ òkikeke me inyọn̄ urak alata okuket,
ikeya ke ukot òtatat òkeke me ebek ukot ònyenye okup.
Inu òkifieek ene ejit
kasa unye kwun̄ ìfiat me lek ebibaan̄ barabat.
20 Chiaan̄ ubọk kana otutuuk ere week ijọn̄ òkisibi mfut,
mè wop mfut eyi kwun̄, toon̄ ejit me lek ata mfut kwun̄ owopbe.
21 Sa me ikeya, nsabọn kwun̄ mêrọ ijaan̄,
mè itibi imiin̄, mè itoon̄ ejit me lek ata ute mè ata uga
ebi ìsasa ema inu inyọn̄.
22 Enenwaan̄ òje oyet ìre ìkike melek ataak echobe;
enenwaan̄ òkaan̄ olom ìre udọn̄ mkpa
isa inyi ebirieen̄ ebi îkisi ugan me lek.
23 Nwa ikariọọn̄ge Awaji ìre uche òkup inyi enerieen̄
ogwu ìkakisun̄ Ikan Awaji,
ire, nwa òrọriọọn̄ Awaji ìre uche òkup inyi enerieen̄
ogwu òkakaan̄ ukpook Okumugwem.
24 Enenwaan̄ ikakaan̄ge esip me isi
ìkisa ochak ijet lek kan̄ mgbọ geelek,
ire, òjot òjot gwun̄ enenwaan̄ îriọọn̄ lek,
ikerere me isi ogwu olom.
25 Nwa unye-ibot ìre ìkike melek ibo,
ire, enenwaan̄ òriọọn̄ esip
îkaan̄ ukpook Okumugwem me emen kan̄.
26 Nwa òkinyi ogwu olom umin
ìre ogwu òkaan̄ iriọọn̄-inu me isi otutuuk ene,
ire, ire isa me gogolek kan̄ ijit inyinyi ogwu olom umin,
otutuuk ene mêriọọn̄ ọmọ kubọk ogwu ikariọọn̄ge Awaji.
27 Nwa òkitaan̄ ukpo mè ikitumu ikọ mgbọ geelek,
ìbet lek otita òkigwen ene isi isi akọn̄,
me uwu kan̄, ogwu olom ìkiluk ugwem
kubọk ogwu akọn̄ otapbe welewele.]a
28 Îkaan̄ inu iba òkifieek emi ejit,
mè eyi òso ita òkinaan̄ emi ejit:
ema ìre, ogwu akọn̄ ogwu ugbọọn̄ okitap nyanya,
mè ogwu òriọọn̄ inu ekpọbe ilọ chieen̄,
mè ene ogwu òtetele ata irọrọ, mè ifo lek ijo inu,
Okumugwem môsun̄ ọmọ iban mkpa afa me otu oge akọn̄.
Ntọ-mkpọ ebi mbit
29 Ogwu mbit ìkakikọt ìtele irọrọ nlilọ inu,
ikeya si, ogwu ònyam ewe ìkpokọt itele irọrọ ijo inu.