Ebi itọn̄ ogbebe:
25
Îkaan̄ inu ita òkitop emi me lek,inu chi îjaan̄ me isi Awaji mè ijaan̄ si me isi ebilene:
inu chi ìre, ngwan̄ mè ngwan̄ irere ejit ge,
mè ene irere unene melek ebi melek kan̄,
mè olom mè nwa ìgbagbaan̄ iluk me ubelejit.
2 Îkaan̄ ukpa ebi ene ita nchabe,
ugwem kiban̄ îjọ emi ejit:
ife cha ìre, ogwu ugbọọn̄ òkigugo lek, mè ogwu ubọọn̄ òkikan̄ ataak;
mè welewele oka ugane òkigan nwa ene.
3 Ire òkakween̄ inu geege mgbọ orebe ijija;
òbomun̄ keke mgbọ owu môkanbe?
4 Îjaan̄ enenen ibe ogwu isọọn̄ ibot ikaan̄ ata ifuk-ibot,
mè ogwu òkakan ikinyi ata nteme!
5 Îjaan̄ enenen ibe ogwu òkakan ikaan̄ iriọọn̄-inu,
mè ogwu ekinyi ulibi ikaan̄ ngobo-ntet mè ata nteme!
6 Ujọn̄ọ mgbọ esabe ikween̄ inu ore umin ebi ìkakan ekaan̄be,
gogolek kiban̄ ìre ke ema
mîkaan̄ ukpook me lek Okumugwem.
7 Ene onaan̄ge ke mâkeek ibe mîkaan̄ atisi,
òso akọp mâsa otu n̄a itumu isibi:
ema ìre, ene ogwu òkaan̄ unwọọn̄ me lek ebi bọn,
mè ogwu òluluk isoon̄ mgbọ ebi ochicha kan̄ enan̄abe irọn̄.
8 Ubelejit okup inyi ogwu òsa nwa òriọọn̄ lek iluk uwu,
mè ogwu ìkakisa eriembuuk melek inyinya akpan
ìgbaan̄ ìkibak ijọn̄ uko.
Ubelejit okup inyi ogwu ìkasa otu alọm kan̄ ìrọ ijo inu,
mè ogwu ìkasi ikwaan̄ me irak ogwu ọmọ obenebe igak.
9 Ubelejit okup inyi ogwu òkaan̄ ata unene,a
mè ogwu owuwa ene ekiriọọn̄ ubọk igban̄ utọn̄
mgbọ îkitumu ikọ.
10 Ogwu òkaan̄ iriọọn̄-inu îmin ene enenen,
ire, ogwu òkitet ukpook Okumugwem omin ichit.
11 Ukpook Okumugwem ogak inu geelek,
kpunu ogwu mêsabe itọ me lek ogwu òkakaan̄.
Nteme òfo me lek ijo enenwaan̄
ore ibebene imumechieen̄ ekikaan̄ me lek kan̄,
igọgọọk ọmọ me udun̄ ìbene me lek ikakaan̄ ichechieek.]b
13 Kpunu unan geege ògagak unan ònin̄ me ibot ejit ene!
Kpunu inu ikpak geege ògagak inu ikpak enenwaan̄ orọbe!
14 Kpunu ufialek geege ògagak ufialek ebi ochicha ekitap!
Kpunu irọrọ useen̄ geege ògagak irọrọ useen̄ ebi oriara ekirọ!
15 Kpunu iwot geege òfefieek igak iwot ijijinu,
kpunu si unaan̄-ejit geege òfefieek
igak uyok uyok unaan̄-ejit enenwaan̄.
16 Kpan̄asi ngọọkbe ijo enenwaan̄ iluk uwu,
mâgọọk egbe àtat mè ijo anam iluk.
17 Inu ikpak ìkinwene enenwaan̄ akparalek,
mè orọ isi kan̄ idun kubọk isi ibo nriọk.
18 Ogwu olom isisibi igọọk ebi melek kan̄ ikweek ikirie inorie,
îra ikup me ere ya ikigwuku mfi ujat ujat.
19 Inu ikpak geelek ìre ijija me lek eyi enenwaan̄ okirọ,
kè enenwaan̄ keya ibọkọ osusut ogwu ijo ene!
20 Olom ogwu ìkakisan̄a amọn òkakaan̄ nwa òkinyi okput,
ìkup kubọk oka ugane òkinene orioon̄ furufuru achiaan̄.
21 Kachieek ibe uja eyi enenwaan̄ ifiat owu ibot,
kasa lek ìgọọk enenwaan̄ mije inu ubọọn̄ îkaan̄be.
22 Mgbọ geelek enenwaan̄ isikibieen̄ ogwu olom inye,
unaan̄-ejit, mè ugumulek, mè esip ìkakilọlọ ikukup.
23 Ijo enenwaan̄ ìkinyi ogwu olom ufieejit, mè ugwuuk,
mè ofiat ọmọ ejit.
Ubọk mè ukot iwọwọ olom
ìnan̄a me ubọk nwa ikachieekge ibe ogwu olom ikaan̄ unwọọn̄.
24 Ijo inu ìbene me lek enenwaan̄,
mije kan̄ orọ otutuuk kiji mêkwaan̄be ita.
25 Kachieek ibe mun̄ imun̄ ere ilut itibi,
kanyi ijo nwa irek ibe inwe chieen̄ itumu ikọ.
26 Ire ogwu enenwaan̄ ìkakirọ ike obe ikirọ,
san̄a ọmọ san̄a me lek kwun̄.