23
Jei Okumugwem, Nte n̄a mè Ogwukaan̄ ugwem n̄a,kachieek ibe ukpọk otu n̄a mè alọm n̄a esa emi erọ nkeek kiban̄,
kachieek ibe ǹgọọk mije kiban̄,
mè ǹnan̄a ǹrọn̄!
2 Ekene obosa njijan̄ isulu ekiket n̄a,
mè isa ikan̄-inu eyi iriọọn̄-inu ikana ichit ejit n̄a,
inyi ekatele ubọk me lek inu nrọbe ilọ,
mè ekasan̄a chieen̄ me lek ijo inu n̄a?
3 Ire kperọ ikeyi, nrọ-nlọ n̄a ìbokiwawa,
ijo inu n̄a ìbokitatap inu isọkọ me lek,
mâneninan̄a irọn̄ me isi ebi oriara n̄a,
ogwu ochicha n̄a môkekibele ejit.
4 Jei Okumugwem, Nte n̄a, mè Awaji eyi ugwem n̄a,
kachieek ibe ǹsa chieen̄ ugumulek m̀kpọ inu.
5 Da ijo ulọk
san̄a emi me lek.
6 Kachieek ijo ebek mè ulọk ebibaan̄ itet emi itọbọ,
kayayaka si emi ìtap me ubọk ijo ulọk òkup esip esip.
Itetet alọm ikaan̄
7 Nsabọn n̄a, ìgban̄ nteme ofolek otu itumu-ikọ;
ogwu òlilibi igọọk nteme yi ìkponin̄ me ufe.
8 Otu ogwu ijo ene okitap ogwukaan̄ me ufe,
ọmọ okirak ogwu itiik mè ogwu ugumu ibọn̄.
9 Kachieek ibe isasa otu kwun̄ ikinyan̄a ibot iraka owu lek,
kachieek ibe ikekigwen erieen̄ Ogwu Mbuban ire eru kwun̄.
10 Mije, ogwu usun̄ ogwu chieen̄ ene ìkakinan̄a me lek,
ọmọ ke ekisut lek ikpukpuku;
ikeya si, ogwu òkigwen Erieen̄ ya mgbọ geelek isa ikinyan̄a ibot
ìkponwọnọ ikekirọ ijo inu.
11 Ene geelek òkpọkpọ ikinyan̄a ibot, ijo inu ìjojot lek;
osusut keya ìkponan̄a me uwu kan̄ isibi.
Ire inyan̄a ibot ilọ, ijo kan̄ îbia me ibot kan̄;
ire ikpọ chieen̄ ilọ me lek, îrọ ijo inu mgbọ iba;
ire inyan̄a ibot ofiaan̄, ikọ ìkponwọnwọn ọmọ,
mije, ùrioon̄ ìbojojot uwu kan̄ gbak.
Ijo Usem
12 Îkaan̄ ubọk itumu ikọ eyi môkọtbe isa mkpa inu;
kè ekamumun̄ ojelek keya me owot iman kè Jekọp!
Mije, ebi ìriọọn̄ Awaji mêda lek kiban̄ ijọn̄ọ ere me lek keya,
ema kpebefufuku ikana me emen ijo inu.
13 Kasa otu kwun̄ ìnyi ikpọkpọ ikikpa ukpatu emen ekwut
mè njijọ usem,
mije, ukpatu kecha ìre ukpatu ijo inu.
14 Keek nte kwun̄ mè nga kwun̄
mgbọ osikibe ikweek irek me etete ebi ilile,
inyi owu okawuuk lek me isi kiban̄,
mè ìrọ ijo eru ogwu mbubut;
mônenikup owu me lek kubọk ke kpememaman owu,
owu mônenifieek otu inyi usen emanbe owu.
15 Ebi ìkitumu ijo usem iraka lek,
kpebekọt isan̄a lek me lek otutuuk usen ugwem kiban̄.
Ijo inu eyi barabat mè ugan-nwa
16 Ukpa ene iba ekirọ ijo inu imumana,
òso ukpa ita ekisa unaan̄-ejit Awaji inu.
Uyok uyok ijo ulọk òkisak kubọk ukan̄,
kpebekọt iniin̄ mege òlomo mè òniin̄ me lek kan̄ gaalek;
ogwu òkirọ barabat melek ogwu ngwan̄,
ìkpotele mege ukan̄ ya òtaka ọmọ òriọk.
17 Inorie geelek ìkitotop me lek ogwu barabat,
ìkpowọ lek me lek mege mkpa òben ọmọ.
18 Ogwu òkisa ofifi enenwaan̄ inilaak me inyọn̄ mkpilaak
ọmọ mè ogwu nwa ekilaak,
mè itumu inyi lek kan̄ ibe, “Ekene obomun̄ emi?
Udun îkana emi okokop, agba uwu îlet emi,
ene geege ìkamun̄ emi.
Keke orọ mâkisisaak lek ni?
Ogwu Òbebene Ichit ìkpokeek ijo inu n̄a geege.”
19 Inu îkitet ukpook me lek ìre chieen̄ ebilene gaalek,
ìkariọọn̄ ibe ke chieen̄ Okumugwem îtoon̄ akọp obop mgbọ igak ura;
ke ìkekikpọ eru geelek ebilene ekaan̄be,
mè ikimọọn̄ ire ntutun̄ ere geelek òlelet ichit.
20 Sabum enirorom linyọn̄, ọmọ îriọọn̄ inu geelek ofolek isan̄a,
mè ikiriọọn̄ si ire mgbọ keyi îrombe isan̄a.
21 Ogwu enerieen̄ yi môbọkọ osusut me eden̄ ama,
ere ikakpọkpọge chieen̄ ke ebetet ọmọ.
22 Inu yaage okup inyi nwa òtetele ogwu olom isi isi ugan,
mè iben owot me lek ofifi ene isa iniman inyi ogwu olom.
23 Me adasi irek, îchaka Ikan Ogwu Òbebene Ichit;
òso iba, îrọ ogwu olom nlilọ inu;
òso ita, îsi ugan sa me lek barabat îrọbe,
mè imaan̄ bọn inan̄a me lek ofifi enerieen̄.
24 Mêsa ọmọ me lek kan̄ isibi inu me isi ama,
osusut kan̄ si môre lek nsabọn kan̄.
25 Bọn kan̄ kpebetibi ugwun̄-ijọn̄ me emen ama ya,
agọọk kan̄ ìkpoto mfut.
26 Ijo otu môgọọk ọmọ me udun̄,
esip isi kan̄ kpebekọt igwọk isan̄a.
27 Ebi mêgatbe ugwem me udun̄ kan̄ mêneniriọọn̄ ibe
ke kpunu inu ònwọnwọn igak itetet ukpook Okumugwem,
ke kpunu si inu òtotop igak
isusun̄ Ikan Okumugwem.
Awaji isibọkọ ene itap, îra ikinyi ene ujọn̄ọ ugwem.]a