Ogwu ugbek
22
Ogwu ugbek ìbet lek ewuuk okpa okenbe me lek,mgbọ esip isitet, ene geelek ìkifọfiọọk.
2 Ogwu ugbek ìbet lek okpukpuk ifin anam òkup me inyọn̄ otiton,
ogwu geelek îrebe ubọk, ikigegen̄ ifiin̄.
Ijo bọn
3 Îre inu esip ene ibobon gwun̄ enerieen̄ òkitọ ikọ ibot kan̄,
ire ire gwun̄ enenwaan̄, eya ìre ichep.
4 Gwun̄ enenwaan̄ òriọọn̄ lek obokaan̄ olom ubọk kan̄,
ire, gwun̄ enenwaan̄ kpunube esip me isi ìre ufieejit inyi ogwu ute.
5 Gwun̄ enenwaan̄ ogwu ìkakilibi ene
ìkisa esip itet ogwu ute mè ogwu olom,
isi mè udun̄ ekikpọkpọ ọmọ chieen̄ isiki.
6 Ikpakpa ukpatu me ulọ mgbọ ìbet lek ekifit ifit me ere mkpa ene,
ire, njijan̄ mè ikakan̄ inu inyi gwun̄ ìre iriọọn̄-inu mgbọ geelek.
Iriọọn̄-inu mè burubut
kpebekọt isa me lek kiban̄ iriọọn̄ ibe
ke ebi ute mè ebi uga ìre ebi ugbọọn̄;
8 ire, nsabọn ebi kpekpukpo ijaan̄,
ebi ìkigumu lek mè ikikpọ ene isiki chieen̄,
ekifafiat ata erieen̄ ebi ute mè ebi uga.]a
9 Ijejeen̄ ogwu mbubut inu ìkup kubọk iteteen̄ okpọkọ ugọn̄,
mè ikisa agba igba igọm,
mè ikup si kubọk ititimi ogwu òlalaak idek me ilaak.
10 Ikpakpa inu iwele inyi ogwu mbubut
ìkup kubọk ikpakpa inu inyi ogwu òlalaak,
osikpa isan̄a, îra ido owu ibe, “Òbe ìre keke njei?”
11 Fieek ejit nyi ogwu
òkwukwu, mije, înan̄a itele utoon̄;
fieek ejit nyi ogwu mbubut, mije înan̄a itele ifuk-ibot.
Kamalek ìfieek ejit ìnyi ogwu òkwukwu, mije, ìkup me iwọ-efuuk;
ire, ugwem ogwu mbubut îfieek igak mkpa.
12 Ekifieek ejit usen jaaba inyi ogwu òkwu mkpa,
ire, ufieejit ogwu mbubut, mè ìre ogwu ìkariọọn̄ Awaji,
ìkire otutuuk usen ugwem kiban̄.
13 Katumu ikọ ìwa melek ogwu welewele,
kajeje si ìchak ogwu ètele.
Da lek bọkọ me lek, inyi ikanyi owu ufialek,
mè ikaken owu okpa òkifufuku me lek kan̄.
Je agba agba me lek kan̄, inyi owu òsiki efuuk,
inyi mbubut kan̄ ikata owu efuuk me owot.
14 Keke olobo igak oporolo?
Keke ore erieen̄ kan̄, ire ìkare “Mbubut”?
15 Îfet ibebeme achiaan̄, mè uchi, mè okwukwut,
igak irọrọ inu melek ogwu mbubut.
16 Ogbugboon̄ uti etapbe ikam me lek uwu,
sikisik-ijọn̄ ìkpokọt isisik ikpọk;
ikeya si, ejit ene òkpọkpọ inu ikpan̄ mè ikana igwook,
ìkposisik ikerere ibe ere ìgbagbaan̄.
17 Ejit ene òsasa ifuk-ibot ikeek inu itet mè ikana igwook,
ìbet lek ngwugwat esabe ibala lek uwu echọkọbe irọt.
18 Ogọ ewakbe me inyọn̄ orioon̄,
ìkpokọt ikeke ida efet;
ikeya si, ogwu mbubut òsasa nlilọ ekiket kan̄ ikaan̄ ukpook owot,
ìkpokọt ikeke mgbọ inu ukpook isirọ.
Unene
19 Ogwu òchim ene chieen̄, ìkirọ mun̄ ito isibi;
ogwu òchim ene ejit,
ìkirọ ibe inu òkup ene me emen ejit isibi ijaan̄.
20 Ogwu òsa mgbọlọ itọbọ ofut,
ìkirọ ema efieek owot ewulu enan̄a;
ogwu ònye chieen̄ inyi ogwu unene, ìkirọ unene iyat.
21 Ikerere owu òwọwọọk oge igọọk ogwu une kwun̄,
kakeek ibe ikpọchieen̄ kpunu; ubọk ebenen̄e isun̄ òwa.
22 Ire otumu ikọ ilọ otu inyi ogwu une kwun̄,
kasisaak lek, mêkọt ikpọk itap esuuk inyi enyi.
Ire, ire onye chieen̄, mè igumu lek,
mè iben mbum kan̄ ikpọk,
mè igon ọmọ akpọ irak irak,
echichi môrọ ibe unene geelek ilibi inan̄a iweek agan̄ ìbonin̄.
23 Mgbọ ogwu melek kwun̄ orebe ugbọọn̄,
rọ mè îtoon̄ owu ejit me lek,
inyi owu ògọọk ọmọ ònwọọn̄ unwọọn̄
mgbọ inu isije ijaan̄.
Keke melek kan̄ mgbọ ukwook okitet ọmọ,
inyi owu ògọọk ọmọ òrie ìrot kan̄ mgbọ inu isinwọn.
24 Oruk mè oduku ekije me isi sabum ukan̄ òlomo,
ikeya si, unyechieen̄ okije me isi ifafiat eje ene.
25 Esip ìkpotet emi, ire ntap ogwu unene n̄a me uwu,
m̀kpamumun̄ si ọmọ, mè ilet.
26 Ire, ire unan ije me lek kan̄ ire emi lek,
ogwu geelek ònọnọ môlibi ọmọ lek.
Uriaak ibebeek ibe ekarọ ijo inu.
27 Ekene ke mêto ibe ikibem otu n̄a ni,
mè esa iman̄ òriọọn̄ ònyenye egba ukpọk otu n̄a egọm,
inyi ukpọk otu n̄a ikada emi ìto,
mè alọm n̄a ikasa emi ìnyi ejijaka?