Ijo inu òkup esese esese
21
Gwun̄ n̄a, ìre orọ ijo inu? Kayaka ìrọ.Ire, beek ibe etele ijo inu echi orọbe iraka enyi owu.
2 Libi nan̄a me lek ijo inu kubọk ekilibi inan̄a me lek ijijinu;
mije, ire oje igbet me lek ijo inu, môlom owu.
Ejeek kan̄ ìreke kubọk ejeek egbe àtat,
mè ikijijaka ugwem ebilene.
3 Ichachaka ikan ìbet lek oge isi iba,
unan kan̄ kpekikọt igwa ichep.
4 Unyechieen̄ mè ugumulek ìkijijaka inu ubọọn̄,
ikeya ke ebejijaka uwu ogwu ugumulek.
5 Uriaak ogwu ugbọọn̄ ìkinan̄a me otu kan̄ ire utọn̄ Awaji,
ufọọk-otu kan̄ ìkinu mgbọ yaage.
6 Ogwu ikamage ikan̄-inu ìkije me akpat ukot ogwu ijo ene,
ire, ogwu òkitet ukpook Okumugwem
ìkigwu ikom me ejit kan̄.
7 Ogwu otu okinye itutumu ikọ ìkakire nlelet ene;
ire, otu kan̄ isilọ, ogwu òriọọn̄ inu okiriọọn̄.
8 Ogwu òsa ikpoko ofifi ene inama uwu kan̄,
ìbet lek ogwu òkititiin̄ ewuuk môsabe irọ udọn̄-ufuun̄ kan̄.
9 Ntitiin̄ ebi ikpak ìkup kubọk efit nkirika,
okputut kiban̄ ìre itataka ita me ukan̄.
10 Oniin̄ ogwu ijo ene echọchọkọ irọt,
ire, òta kan̄ ìre ama ekwukwu.
Iriọọn̄-inu mè mbubut
11 Ogwu òkisun̄ ikan ìkitọ ikọ inyi ekiket kan̄,
ikakaan̄ iriọọn̄-inu ore itetet ukpook Okumugwem òjot òjot.
12 Kpebekọt ijeen̄ ogwu una ifuk-ibot inu,
ire, ifuk-ibot òkinyi ene ufieejit ọmọ òwa.
13 Ifuk-ibot ogwu òriọọn̄ inu ìbokisọsọkọ inu me lek
kubọk mun̄ obaak ijot ere,
nteme kan̄ môbet lek ibot mun̄ òkigbugbuk.
14 Ejit ogwu mbubut ìbet lek ugọn̄ òbubum,
ifuk-ibot geege ìkakikeke me emen.
15 Ogwu ònọ lek isinọ ikọ iriọọn̄-inu,
ìkitọtọn̄, mè otap osọkọ me lek;
ogwu mbubut isinọ, ìkichachak,
mè òtọp òto me udun̄ kan̄.
16 Ikọ ogwu mbubut ìkikup ene me lek ifi ifi
kubọk ebeme ulobo akpan isi ije,
ire, igbagban̄ ikọ ogwu ifuk-ibot ìkitotop.
17 Ekiweweek ikọ ogwu òriọọn̄ inu me ere ebi ene etitiin̄be,
inu îtumube ekitọtọp ikana me ejit ene.
18 Iriọọn̄-inu ìkup me lek ogwu mbubut
kubọk uwu ògbugbugbọ irọn̄,
me lek ogwu ètele, ifuk-ibot ìre ikọ kpunube ibot me lek.
19 Me lek ogwu ètele, ikween̄-inu ìkup kubọk mkpọn ebek ukot,
mè ikup kubọk mgba-mfiik ebek ubọk.
20 Ogwu mbubut ìkitataan̄ ukpo ichak imọm,
ogwu òriọọn̄ inu ìkifọfọọk otu imọm ususuk.
21 Me lek ogwu òriọọn̄ inu, ikween̄-inu ìbet lek inu ǹken eyi alata araran̄,
mè ibet lek alata ebek ubọk îtapbe me ubọk agan̄ ulom.
22 Ogwu mbubut ìkisasaba ukot iraka inin̄ uwu ene isi ge,
ìkakitọbọ ubọk;
ire, ogwu òkween̄ inu ìbokekeke me oyet itọbọ ubọk me ulibi.
23 Ogwu ebot ìkitaak chieen̄ me agbagba afọn̄ ikpọ emen uwu,
ire, ogwu ònọ lek ìkikekeke me oyet.
24 Ilelet me agba isotu inween̄ lek ikigban̄ ikọ ìre ijo eru,
ogwu òriọọn̄ lek ìbotetet esip irọrọ inu òkup ikeya.
25 Ogwu ìkakikọt ìtet otu kan̄ ìkaan̄
ìkitumu ikọ eyi ìkagbaan̄ ọmọ me lek,
ire, ogwu òriọọn̄ inu ikitọtọ ikọ kan̄ iriọọn̄ ulobo.
26 Ogwu mbubut ìkitumu ejit kan̄ isibi me otu,
ire, ogwu òriọọn̄ inu ìkitumu ikọ kan̄ me emen ejit.
27 Ogwu ikariọọn̄ge Awaji isifieek otu inyi ogwu ochicha,
ìkifieek otu inyi lek kan̄ gaalek.
28 Ogwu òkpa ene ìkisa okpa iken lek kan̄,
mè osa lek kan̄ otap ochicha oso otutuuk ere îlukbe.