Mgbọ irariaan̄ otu mè mgbọ itutumu ikọ
20
Ikan̄-inu ekikan̄ me ulọ mgbọ ọmọ òwa,ogwu òrọriọọn̄ inu, ire, ìkakisan̄a amọn, ọmọ òwa si.
2 Isasan̄a amọn ikan̄ inu
înwọn igak iwuwuku inyi unaan̄-ejit.
3 Ogwu òchechieek ibe ke ọmọ îrọ ilọ
ìkpoben esip.
4 Ogwu etetbe me unye ibe irọ inu ònenen,
ìkup kubọk ogwu esan̄abe òsok
òkakaan̄ ulọk itetet obaak enenwaan̄ ilaak.
5 Usini ene kpekisan̄a amọn,
ebi ene mîra ikibe ke ife cha mîriọọn̄ inu,
ire, usini ene ekitumu ikọ, kpekikọt iriaan̄ otu,
ebi ene mîra ikicha ema.
6 Usini ene ekiriaan̄ ere
mije kpekaan̄ inu ebetumu,
sà usini ene ekiriaan̄ ere
mije mîriọọn̄ mgbọ ògbegbe ibe etumu ikọ.
7 Ogwu òriọọn̄ inu ìkirariaan̄ ere ikpọ mgbọ òtatat,
ire, ogwu mbubut òkigugo lek
ìkakiriọọn̄ mgbọ ìbotumu ikọ.
8 Ogwu òkitumu ikọ iwa, ìkijọjọ ene ejit,
ogwu òkirọ kubọk ọmọ îkaan̄ unye, ekichacha.
Inu agan̄ iba
9 Atisi môkọt irọn̄ inyi ogwu òkup me emen ufialek,
inu môkọt inwọn ene me lek enenen, mè otap ene me ichep.
10 Îkaan̄ uche eyi ìkposibi owu oruru,
mè ikaan̄ uche eyi òbosibi owu oruru mgbọ iba.
11 Îkaan̄ ichep eyi ene obonin̄ mije umin ene okaan̄be,
mè ikaan̄ si ebi ene ebi ìnan̄a me irek òsisiki
ibene isi ikup me irek umin.
12 Ene môkọt isa sọntiik ikpoko ilep inu iwa,
ire, mè iyaka inikpe ikpoko mgbọ jaaba itoon̄ me inyọn̄.
13 Ogwu òriọọn̄ inu môkọt isa otu ikọ inen mè inen ikaan̄ ebi òma,
ire, ogwu mbubut môtọn̄ ebi ene ichep me ikike.
14 Uche ogwu mbubut ìkponin̄ owu oruru geege,
mije, chieen̄ kan̄ ìbokikpọ ibọbọkọ useen̄ mgbọ jaaba.
15 Ìkinyi ene inu sọntiik, ire, mè ikigana ere inyi ene ogbogbo;
ìkichili otu itumu ikọ kubọk ogwu òkilook etip ama.
Ifọọk inyi ene chereyi, iyakwut ìbe enekpe;
ogwu òkup ikeya, kpekimama.
16 Ogwu mbubut môbe, “Ǹkakaan̄ unene;
ata inu n̄a kpekitọn̄.
Ebi ìkirerie inorie n̄a
ìre ebi ìkitumu ijo otu.”
17 Owuwa ene mêrọ ọmọ inu ochak,
mè ichak ọmọ ogbogbo mgbọ.
Usem ikatatge
18 Ukot ene ilọlọ ikwaak me agba oyet
înwọn igak otu ene ilọlọ me lek ikọ;
ikeya si ke ogwu ikpak okigwat lek irọn̄ me uwuuk lek.
19 Ogwu òkitumu ikọ unyechieen̄ unyechieen̄
ìkup nsebe nsebe,
kubọk ijo urọk eyi ebi mbubut ekikpa mgbọ geelek.
20 Urọk ogwu mbubut otobe, ekijijit,
mije, ìkato me mgbọ îtatbe.
21 Ugbọọri môkọt irọ ibe ene ikarọ ijo inu;
ene òkup ikeya isilaak, ejit kan̄ ìkakifieek ọmọ ikọ.
22 Ene môkọt ifiin̄ ugwem kan̄ mije esip;
môkọt ifiin̄ si sa me inyinyi ene umin.
23 Ene môkọt isa me isi esip ichieek ogwu une kan̄ use,
mè isa me ikeya ikana ogwu ochicha me ikakaan̄ge ibot.
Ikakan̄ ataak
24 Ikakan̄ ataak ìre ijo akpat okibia me lek ene,
ìkakinan me otu ebi kperiọọn̄ inu.
25 Ogwu inọ înwọn igak ogwu òkikan̄ ataak mgbọ geelek,
ire, inu òkukup inyi ema ene iba ìre mfufiat.
26 Ogwu ataak ìbobọkọ esip,
ochak ìbobabia me lek kan̄ mgbọ geelek.
Ikọ urọk
27 Ogwu òriọọn̄ inu môkana ene inan̄a me otu ikọ kan̄,
ogwu òkaan̄ ifuk-ibot môrọ inu òkibele ebi ilile ejit.
28 Ogwu òrọrọkọ ijọn̄ iwop inu oborọkọ inu ijot ere,
ogwu irọ inu òbele ebi ilile ejit, mêtele inu îrọbe ilọ inyi.
29 Nnwọn mè uche ìkichit ebi ìriọọn̄ inu chieen̄,
mè ikikwek ikan̄-inu kubọk olik esabe itobo otu anam ichit.
30 Iriọọn̄-inu òlelet mè inu ubọọn̄ eyi kpesa chieen̄ imun̄,
kpasi oruru okup me lek?
31 Ene ilelet mbubut kan̄
înwọn igak ene ilelet iriọọn̄-inu kan̄.
efuuk ìkata me emen,
înwọn igak ene isasa me nlilọ ifuk-ibot kan̄
ikikọp lek kan̄ ije otuuk ugwem kan̄.]a