19
Ire okifọọk ikpoko isa ito ijọk, owu òkponin̄ ubọọn̄,ogwu òkikpọ asabọn inu isiki chieen̄ môkikwala irọn̄ sọnja sọnja.
2 Miin̄ mè ebibaan̄ ìkisa ogwu òriọọn̄ inu ije ilọ oniin̄,
ogwu òkibubat ikana melek ebi òje oyet ìre ogwu wuruwuru.
3 Ogwu wuruwuru môfiin̄ ugwem kan̄,
môkwu ijọ, ebi kè mkput mêrerie ọmọ me ìrot.
Ikpọkpọ ikọ itumu
4 Ogwu òkigwat lek itoon̄ ene ejit me lek ìre ogwu wewe,
ogwu òrọ ijo inu ìrọ lek kan̄ ikan̄.
5 Ogwu irọrọ inu ikpak okitop me lek,
oyerebet môtip;
[ire, ogwu òkitet lek ikaan̄ me lek utop otu,
môrie ugwem kan̄ òjot òjot.
Ogwu òtetet otu alọm kan̄ ikaan̄
môluk ugwem kpunube ibaak.]a
6 Ogwu òchacha ikpakpa ene
ìkponin̄ me ufialek.
7 Kaben ikọ etumube inyi owu ìsi ìkpa,
inyi owu okanin̄ me ichep geege.
8 Ikerere ogwu une kwun̄ mè ìre ogwu ochicha kwun̄, kakpa ìnyi,
îtata mè ìre môre ijo inu ire òkakpa, ilọ ikeya, kakpa.
9 Mije, ene ge môkọt inọ me otu kwun̄,
mè igwuun̄ chieen̄ ikpọ owu;
mgbọ isiraka me lek, môchacha owu.
10 Ikaan̄ inu onọbe, men tap me owot;
tet ejit nye, ìkaborọ inyi owu òrama òbum.
11 Ikọ ekpabe inyi ogwu mbubut ìkifiak ọmọ kubọk uman,
kubọk enenwaan̄ uman okitet.
12 Ogwu mbubut isinọnọ ikọ ge, mè ìkakpa, lek ìkakisiki,
ìkikup kubọk oraan̄ òfuun̄ inin̄ ene owut-ukot.
Kagban̄ inu geelek onọbe
13 Ire ebe ke une kwun̄ îrọ ijo inu, dodo ọmọ; usini mgbọ, ìkarọ;
ire irọrọ, do si, inyi ikayaka ìkpọk ìrọ si ofifi.
14 Ire ebe ke ogwu melek kwun̄ îtumu ikọ ge, dodo ọmọ;
usini mgbọ, ìkatumu;
ire itutumu, do si,
inyi ikayaka ìkpọk ìtumu si ofifi.
15 Ire onọ ijo ikọ ibak ogwu une kwun̄, dodo ọmọ,
mije, owuwa mgbọ ìkire ifafiat ene;
kachieek ikọ geelek onọbe.
16 Ene môkọt itumu ikọ ilọ me otu, me ikagegenge ibak ìtumu;
ìre ekene ke ikọ ìkakilọ me otu?
17 Ire ikọ onọbe ibe ogwu melek kwun̄
otumu ibak owu inaan̄ owu ejit,
dodo sabum òriak lek onyi;
mè tele ibe Ikan Ogwu Òbebene Ichit ikpọ chieen̄ me lek,
[mè kanaan̄ ejit.
18 Itetet ukpook Okumugwem
ore adasi inu òborọ ibe
Okumugwem ibọkọ owu itap;
ikakaan̄ iriọọn̄-inu môrọ ibe ọmọ ima owu.
19 Ikwekween̄ Ikan Okumugwem iriọọn̄
ìre ikan̄-inu òkinyi ene ugwem;
ebi ìkirọ inu òkibele ọmọ ejit
eberie mfut uti eyi ugwem ikakaan̄ge itata.]b
Atata iriọọn̄-inu mè eyi ijijo
20 Itetet ukpook Okumugwem
ore otutuuk ibot ibot inu iriọọn̄-inu orebe,
inu òkup me emen otutuuk iriọọn̄-inu geelek
ìre irọrọ Ikan Awaji iso,
[mè irọriọọn̄ inu òfo me lek ubọk ikpele unye kan̄ osabe ikup.
21 Ire ogwu ibe ogwu ute-uwu,
“M̀kparọ inu obe emi ǹrọ,”
ikerere ibe ke îgwu ikom isi irọ inu ya,
ogwu ute-uwu ìbonanaan̄ ejit.]c
22 Irọriọọn̄ ike ekirọ inu ikpak ìkare iriọọn̄-inu;
ebi ijo ife inyinyi ene nteme ìkare iriọọn̄-lek.
23 Iriọọn̄-lek òwa eyi òchachaka mbuban me lek,
ogwu mbubut òwa si ogwu ònan iriọọn̄-inu.
24 Ogwu òkitet ukpook Awaji mè inan ngobo-ntet
înwọn igak ogwu òkaan̄ ifuk-ibot òmimin enenen
mè ikichaka Ikan Awaji.
25 Îkaan̄ iriọọn̄-lek ònenen, ire, mè ikaan̄ mfeen̄ me emen;
îkaan̄ si ogwu môchichakabe nnwọn erọbe ọmọ,
inyi oyerebet inwọn ọmọ.
26 Îkaan̄ ogwu ikpak òkigele isi ikwuun̄ ikije kubọk ogwu ufieejit,
ire, me emen kan̄, ọmọ ìre atalek ogwu ofiaan̄;
27 môben isi kan̄ ilet, mè ifiaan̄ ikirọ kubọk ọmọ ìre ìnan,
ire, mgbọ okakpọge chieen̄, îra ifiaka owu ubọk.
28 Ikerere ibe ke ìkakaan̄ unye ìbosa irọ ijo inu,
ìkpolọ irọrọ ijo inu mgbọ geelek irek osibibe inyi ọmọ.
29 Ekisa ubọk lek ene okupbe iriọọn̄ ene,
adasi mgbọ ochichinibe ene isi mè isi
ke oboriọọn̄ ibe ke ene ya îriọọn̄ lek.
30 Ubọk ene obalabe lek, mè ubọk ene okibook otu ichak imọm,
mè ubọk ene okije ije, ke ekisa iriọọn̄ ogwu ene orebe.