Umin Awaji
18
Okumugwem ogwu òkiluk ire mgbọ geelekorom otutuuk linyọn̄;
2 Okumugwem gaalek ore ogwu ata irọrọ. [
Kpunu ofifi Awaji, isan̄a me lek kan̄;
3 Ọmọ okisa ubọk kan̄ ikijeen̄ linyọn̄ oniin̄,
otutuuk inu geelek ekekigban̄ utọn̄ ikirọ nkeek kan̄;
ọmọ ore ogwu ubọọn̄ inyi otutuuk inu geelek sa me unye kan̄,
ọmọ okiche inu òkup mbuban me etete kiban̄
isan̄a me lek inu ikakupge mbuban.]a
4 Ìkanyi ene geege unye ibe ikpa ikwaan̄ ọmọ orọbe isibi;
ekene obokọt iweek uyeke ikwaan̄ kan̄ iriọọn̄?
5 Ekene obokọt itọ ikeke ikpele unye kan̄ iriọọn̄?
Sà ìre ekene obokọt ikpa inu ofolek ejit nsan kan̄ isan̄a?
6 Kpebekọt isan̄a igele me lek,
kpebekọkọt si itap isọkọ me lek;
ìkafefet si ikọkọt ikween̄ uyeke inu Okumugwem itet.
7 Mgbọ ebilene erebe itata, mgbọ keya ke ọmọ okibebene;
mgbọ etelebe ubọk me lek,
mgbọ keya ke chieen̄ okike ema ichit.
Ebilene kpekup me lek inu geege
8 Keke ke ebilene ere? Keke ke ekisa ema irọ ni?
Keke ore nnwọn òkup me emen kiban̄, sà keke ore ijo?
9 Me otu ifuk acha ugwem ebilene,
ogwu iluk iso efit acha,
îluk ugwem ijọn̄ọ mgbọ enenen.
[Ire, mkpa ene ge me etete kiban̄
ìkekiwuwọlọ otutuuk ene ibot.]b
10 Ire isa acha inen mè inen kechi
itọ me lek mgbọ ikakaan̄ge itata,
ìsip ikup kubọk otu mun̄ ge òrọrọn̄ọ me lek mun̄ emen awaji,
mè ikup si kubọk nkwukwuuk achiaan̄ ge
me lek achiaan̄ agba awaji.
11 Eya orọ Okumugwem okikaan̄ ime me lek kiban̄,
mè ikigbuku nsan kan̄ igwook ema me lek.
12 Ọmọ îkimun̄, mè iriọọn̄ si ibe
ke okputut kiban̄ ìkup nsak nsak;
eya orọ ikpọkpọ ikinyi isi ikitele ijo kiban̄ inyi ema.
13 Ebilene ekikaan̄ njijin me lek ebilene ogbo kiban̄,
ire, Okumugwem ìkitoto njijin
me lek inu geelek òkaan̄ ugwem.
Ìkekigana ikọ inyi ema, mè òkonen̄e ema òtat,
mè òkojeen̄ ema inu,
mè òkosa ema òkogwu okom òkonu me lek kan̄,
kubọk ogwu òkpukpo arọọn̄ okirọ me lek arọọn̄ kan̄.
14 Ìkekikaan̄ njijin me lek ebi ìbobọkọ ikan̄-inu kan̄ itap,
mè ikaan̄ ikpele ulọk irọrọ orọmijọn̄ kan̄.
Ubọk ògbegbe ibe ekeche inu enyi ene
15 Gwun̄ n̄a, karọ ene nnwọn ìsan̄a mè ìyaka ìrọ ochak,
kasa usem ikpak ìfiat uche onyibe ene.
16 Ìre mbat ìkafat ìkisuuk ene unye otu uyok me lek?
Ikeya si, ata otu usem ge
înye otu ewe igak uche echebe inyi ene.
17 Me atikọ, ìre otu usem ge ìkagak uche ònwọnwọn eyi enyibe ene?
Ire, ogwu ata ejit îkaan̄ iba cha iso.
18 Ogwu mbubut ìkaan̄ otu itiik, ìkakaan̄ ata ejit;
uche enyibe me nuunuun̄, ekichichit chieen̄ ibọkọ.
Igbagbala chieen̄
19 Sabum obotumu ikọ, kidadasi kween̄;
sabum oborọn̄ orukan̄, kikpọ chieen̄ me lek kwun̄.
20 Sabum oyerebet ònu, dasi wọlọ emen kwun̄ kpọ,
inyi usen ya isire, owu mômun̄ etelebe ijo kwun̄ inyi owu.
21 Sabum Awaji ònosa orukan̄ onyi owu osusut, siki lek kwun̄;
mè mgbọ orọbe ijo inu, gwu kom.
22 Kachieek ibe inu geege igban owu
irọrọ otu inyan̄a-ibot kwun̄ iso;
kachieek ibe mkpa iniben owu
sabum oborọ otu inyan̄a-ibot onyan̄abe iso.
23 Sabum ònyan̄a ibot, bebem lek;
kakup kubọk ogwu ònitọtọ Okumugwem ikpọ.
24 Keek unaan̄-ejit Awaji
eyi mônube inyi owu me usen mkpa kwun̄,
me mgbọ irọrọ useen̄ ya, mgbọ ọmọ môdabe isi kan̄ isan̄a.
25 Mgbọ okaan̄be inu iwa ijot ere, keek mgbọ akan̄;
mè usen obọọn̄be ubọọn̄, keek usen ugbọọn̄ mè usen una-lek.
26 Bene me ewelegwe re ikakwun̄, inu ìkinwenwene;
inu geelek ìkije ugwat ugwat me isi Okumugwem.
27 Ogwu òriọọn̄ inu ìkigwọgwọk chieen̄ me lek inu geelek;
ijo inu isikana ọmọ okokop,
ìkigbagbala chieen̄, inyi ọmọ ikarọn̄ ìnin̄ emen.
28 Ogwu geelek òkaan̄ ifuk-ibot îriọọn̄ lek iriọọn̄-inu;
mè ikinyi ogwu geelek òweweek iriọọn̄-inu imun̄ ulibi.
29 Ebi ìkigobo ikọ itet ekikana ebi ìriọọn̄ inu me lek kiban̄,
mè ikito urọk ògbegbe igwook ijot ere.
Itetet lek ikaan̄
30 Kagọọk ijo ulọk òkilọk owu,
ire, tet ijo ebek kwun̄ kaan̄.
31 Ire osa ugwem kwun̄ inyi ijo ulọk kwun̄ cha,
môrọ owu òkana inu ochak me isi ebi ochicha kwun̄.
32 Katap lek me lek iluluk ugwem utop otu,
ikpoko îkido môrọ owu òrọn̄ ugbọọn̄.
33 Mgbọ okakaan̄ge ikpoko geege me akpa kwun̄,
kafọọk ikpoko ìsa ìkito ijọk,
inyi owu okakana ogwu mbeek.