Osusut Awaji obosulu ebi ijo ife
16
Kaweek ikakaan̄ ogbogbo bọn echi kpekup me lek inu geege,kabebele si ejit me lek bọn kperiọọn̄ Awaji.
2 Ema ikemumumana iwa, kabele ejit,
îtata ukpook Okumugwem ìkukup ema me emen.
3 Kakpọ chieen̄ ibe ema mêluk ujọn̄ọ ugwem,
katotoon̄ si ejit me lek ubọk ema ewabe ire,
mije, ibot gwun̄ ge môkọt inwọn igak obop,
melek si, ikwukwu kpekaan̄ gwun̄
înwọn igak ikakaan̄ bọn kperiọọn̄ Awaji.
4 Mije, ene ge òkakaan̄ ifuk-ibot môkọt iboon̄ ene ijot ama ile,
ire, ama ile môkọt ilaak ukpọk
inan̄a me lek otoko ge ebi kpekisun̄ ikan.
5 Chieen̄ n̄a îra imun̄ owuwa inu kecha,
utọn̄ n̄a si înọ inu òkup nke nke igak echichi.
6 Okumugwem môchim ukan̄ itap me ere ebi ijo etitiin̄be,
mè uyok uyok unaan̄-ejit kan̄ obumu me ido òkinye ibot.
7 Awaji ìkatele ijo ìnyi ebi ujọn̄ọ ile ukot ikaan̄ cha,
ebi ìsasa me lek unye ema ekaan̄be ikpaka ibot.
8 Ìkawuwọk ubọk me lek ebi Lọt ogọọkbe iluk,
ebi ìjọjọ ọmọ ejit bak me lek ugumulek kiban̄.
9 Ìkato nsan me lek ebi ido ya ebejijijaka isan̄a,
ebi ekpan̄be isan̄a mije ijo inu kiban̄.
10 Ikerere efit obop ebi akọn̄
gweregwen cha ìkije me emen èwê,
ebi ìgbagbaan̄ ichieek inyenye ibot inyi ọmọ, ìkatele.
11 Ikerere ogwu unye-ibot ge gaalek mokup,
kè òke ene chieen̄ ire ìkabọkọ osusut.
Mije, Okumugwem ìkekikaan̄ nsan mè òkonaan̄ si ejit uyok uyok;
ọmọ îmin me itetele ijo, mè imin si me inanaan̄ ejit uyok uyok.
12 Ike nsan kan̄ ominbe, ikeya si ke osusut kan̄ olobo,
ìkisibi oyerebet inyi ene geelek igọọk me inu ene ya orọbe.
13 Ogwu inọ ìkpochiin̄ inu, mè isa ilibi inwọnọ,
ukarajit ogwu òkekeke inye me lek Awaji okaan̄be
ìkpochep me ikike.
14 Ogwu ata irọrọ geelek môbọkọ mkpukpe,
ogwu ikup ìbobọkọ igọọk me irọrọ kan̄.
inyi otutuuk ebi linyọn̄ esa me ikeya eriọọn̄ ubọk ikwaan̄ kan̄.
16 Îjeen̄ otutuuk inu îrombe ejit nsan kan̄,
mè isa otitọ itọ-inu-itat iche utoon̄ isan̄a me lek udun.]a
17 Katumu ìbe, “Ǹlelet me chieen̄ Okumugwem,
ekene obokup me akpabin inyọn̄ ikeek emi?
Me etete urum ene ìwa ikeyi, kperiọọn̄ emi isi,
mije, keke ke emi nre me emen ogbogbo inu Awaji orombe?
18 Kpọ, isinyọn̄ mè akpabin inyọn̄ òbebene ichit,
melek linyọn̄ mè ugwuuk okwaan̄ ekiraran mgbọ ọmọ isikinu.
19 Ebi kè ogoon̄ mè ọdọ irak irak linyọn̄
ekisisisik, mè ikinyinyọn̄ọ mgbọ ọmọ isikana isi ikpọ ema.
20 Kpunu ejit ogwu ebilene òbokọt igobo inu keyi itet.
Ekene oweek irọriọọn̄ ubọk Okumugwem okije?
21 Ike kpekimun̄ efet egwijo,
ikeya si ke owuwa inu îrọbe olet me chieen̄ ebilene.
22 Ekene obonyi ulook ofolek unen oyerebet kan̄?
Sà ìre ekene obokup ikikpọ? [
Inyan̄a-ibot keya ijọn̄ọ ere;
iwọwọlọ otutuuk inu ikpọ ìbonu me òta.”]b
23 Echicha ìre ekiket ogwu una ngobo-ntet okikeek;
ogwu mbubut ikariọọn̄ge agan̄ ìkikeek inu welewelewele.
Iriọọn̄-inu Awaji òwa me emen inu îrombe
24 Gwun̄ n̄a, gban̄ emi utọn̄ me lek, mè kween̄ iriọọn̄-inu,
riọọn̄ ubọk siki lek gban̄ ikọ n̄a.
25 Mâjeen̄ owu ijejeen̄ ògbegbe,
mè inyi owu ifuk-ibot òtatat.
26 Me ibebene, mgbọ Okumugwem orọbe ikwaan̄ kan̄,
ìdọdọmọ okike irek kiban̄ inyi ema,
27 mè isun̄ inu îrombe me onineen̄ òbokup ire mgbọ geelek,
mè idọmọ ema isun̄, ikukup ikeya ire ukot geelek.
Uraafiọọn̄ ìkakitaka ema, lek ìkakiwọ ema,
ema kpekitetele si ikwaan̄ kiban̄.
28 Ge kiban̄ ìkakigba ìnwan melek ogwu melek kan̄,
ema kpekikpakpaka si ikọ Okumugwem.
29 Okumugwem onenikana chieen̄ ikpọ linyọn̄,
mè itap ata inu kan̄ ijot gbak.
30 Îsa esese chieen̄ inu geelek òkifuuk efuuk ugwem
igwook ichit lek ijọn̄,
inu chi ekikwaan̄ si inin̄ ijọn̄.