15
Ogwu òkitet ukpook Okumugwem môrọ ikeyi,ogwu geelek òtetet Ikan Okumugwem inye môkaan̄ iriọọn̄-inu.
2 Iriọọn̄-inu mônu inichichini ọmọ kubọk uga,
mè ibọkọ ọmọ itap kubọk obaak enenwaan̄ òbat olom.
3 Mônyi ọmọ ngobo-ntet irie kubọk inorie,
mè inyi ọmọ iriọọn̄-inu inwọ kubọk mudim.
4 Ọmọ môbieen̄ lek me lek iriọọn̄-inu, ìkporọn̄,
môbieen̄ ejit me lek, ìkporie esip.
5 Iriọọn̄-inu môbene ọmọ ifo inyọn̄ isaba iraka ebi melek kan̄,
mè inyi ọmọ ikọ ìbotumu me emen ntitiin̄ òninin̄ ijot.
6 Ọmọ mômun̄ ubelejit mè unwọọn̄ òjojot,
mè ikaan̄ erieen̄ môkupbe ire mgbọ geelek.
7 Ogwu mbubut ìkpokọt ikaan̄ iriọọn̄-inu,
ogwu ijo ene ìkporieen̄ chieen̄ me lek.
8 Iriọọn̄-inu ìkakikup ìgbet lek ogwu ugumulek,
ogwu ataak ìkakikeek inu ofolek kan̄.
9 Ogwu ijo ene ìkpokọt ikitọn̄ Okumugwem,
mije, Okumugwem ìkatap ọmọ itọn̄ me otu.
10 Mije, îre iriọọn̄-inu ke ekisa inyi itọn̄,
Okumugwem me lek kan̄ okirọ itọn̄ ikaan̄ ibot.
Ene geelek môkọt igobo inu geelek
11 Katumu ìbe, “Îre Okumugwem obieen̄ emi itap me ijo inu;”
mije, Okumugwem ìkpokọt irọ inu îchabe.
12 Katutumu si ìbe, “Îre ọmọ orọ njebe ilọ oniin̄;”
mije, ìkakaan̄ inu ìbosa ogwu ijo irọ.
13 Okumugwem ìchacha òchichaka inu geelek;
ebi ìkitet ukpook kan̄ kpekimama si inu kecha.
14 Îre ọmọ orom ebilene me ibebene,
mè itele ibe ema esa nkeek kiban̄ ekerọ inu òneneme ema.
15 Ire ineme owu, owu môsun̄ Ikan Okumugwem,
ikekeke inye me lek kan̄ ìkup me ubọk kwun̄ itutumu ifieek.
16 Îben ukan̄ mè mun̄ ito owu me isi,
nyana ubọk kwun̄ ben eyi òneneme owu.
17 Ugwem mè mkpa okup ene geelek me isi,
geelek îgobobe ke ebenyi ọmọ.
18 Mije, iriọọn̄-inu Okumugwem îmin enenen;
Okumugwem îkaan̄ ikpele unye, mè ikimun̄ inu geelek.
19 Chieen̄ kan̄ òwa me lek ebi ìkitet ukpook kan̄,
îriọọn̄ irọrọ geelek ogwu ebilene okirọ.
20 Ìkanyi ene geege ida ibe ikirọ inu ikpak,
kpunu si ene geege înyibe irek ibe ikirọ ijo inu.