14
Ubelejit môkup inyi ogwu ijo usem ikanan̄age me otu,ogwu ìkpobọnọlek ibe ọmọ îrọ ijo inu.
2 Ubelejit môkup inyi ogwu ejit kan̄ ikatipge ọmọ oyerebet,
ogwu ikayakage ikpọchieen̄ kan̄ ìto.
Ogwu afaak ìkifeen̄ lek kan̄
3 Ibọbọọn̄ ubọọn̄ ìkagbe ogwu òkiweek nnwọn inyi lek kan̄ gaalek,
ikpoko ìkakaan̄ oruru ìnyi ogwu afaak.
4 Ikpoko ogwu afaak okititiin̄ isun̄, mè ijit isasa inyi lek kan̄,
ìkititiin̄ isun̄ iban ebi ofifi ife
mêsabe iluk ugwem ikirie utop otu.
5 Ire ene ìkachili ubọk ìnyi lek kan̄,
ìre ekene ke ìbokichili ubọk iche inu inyi?
Ikerere inu ubọọn̄ eyi kan̄,
ìkaborie inọ utop.
6 Kpunu ogwu òfefieek kubọk ogwu òkifaak afaak inyi lek kan̄,
ikeya ke îbosa ibọkọ osusut nchit-ubọk kan̄.
7 Ire irọ ata inu, ìlọlọ ubọk;
me òta kan̄, afaak kan̄ môkpọk mbum.
8 Ogwu afaak ìre ijo ene,
ìkidada isi kan̄ isan̄a, ìkakibene chieen̄ ìkpọ ene.
9 Inu ogwu chieen̄-ile okaan̄be ìkakiso ọmọ chieen̄,
mfeen̄ chieen̄-ile ìkirọ inyi ene ichat.
10 Ogwu afaak ìkakibele ejit me lek inorie,
inorie ìkinanan me inyọn̄ ikasi kan̄.
11 Gwun̄ n̄a, kpọ lek kwun̄ jaan̄ ike ubọk kwun̄ osoon̄be,
mè sa inyinyi ògbegbe jet Okumugwem.
12 Kawuuk ibe ke mkpa ìkpofiat mgbọ inunu,
keek ibe ke kpekpọk mbum
mgbọ owu obofo ama ekwukwu inyi owu.
13 Kirọ ebi unene kwun̄ ata inu sabum owu òkwu,
chili ubọk kiche inu nyi ema ike okọtbe.
14 Kajit inyinyi lek kwun̄ inu ònwọnwọn me egwe usen,
kachieek ibe uche inu kwun̄ eyi owu omabe iraka owu.
15 Owu òbotetele mfut ubọk ikwaan̄ kwun̄ inyi ofifi ene,
mè itele inu okwukwulube ikaan̄
inyi ebi ene eneroon̄ nriroon̄ esa eche.
16 Eya orọ, kinyi, mè kibọkọ eyi enyibe owu, mè rie nwọọn̄ lek,
mije, utop otu kpunu me ama ekwukwu.
17 Inu geelek òkifuuk efuuk ugwem
môkan inin̄ oka kubọk ekwut,
mije, ikan òkukup akarake akat ìre, “Owu òbokwukwu!”
18 Ike inwan̄ òjojot lek uti òsasan agọọk okupbe,
ge iwaka irọn̄, ofifi òtibi,
ikeya si ke anam akpalek mè eje okup me ukot me ukot:
ene ge ikwu, mîra iman ofifi ene.
19 Inu geelek ebilene erombe, môtaka igwak, mè ijijaka,
ogwu òrorom si môgọgọọk ije.
Iriọọn̄-inu ìkinyi ene ubelejit
20 Ubelejit môkup inyi ogwu òkikaan̄ ekiket ofolek iriọọn̄-inu,
mè iriọọn̄ ubọk ikifuk ata ifuk-ibot;
21 ogwu òkiwọlọ oniin̄ eyi iriọọn̄-inu ikpọ me emen ejit kan̄,
mè ikikeek ekiket ofolek nlelet inu kan̄;
22 ogwu òkigọọk iriọọn̄-inu kubọk ogwu ota okigọọk anam,
mè ilet ikikpọ ọmọ me lek oniin̄ îkije;
23 ogwu òkitap chieen̄ itibi nruruk uwu iriọọn̄-inu ikikpọ ọmọ,
mè ikikup me isotu kan̄ ikigban̄ ọmọ;
24 ogwu òkiluk iriaak me lek uwu iriọọn̄-inu,
mè igwugwuun̄ okpọ̀kọ uwu
ọfọ kan̄ me lek agba uwu iriọọn̄-inu;
25 ogwu ògwugwuun̄ uwu ọfọ kan̄ me agba lek iriọọn̄-inu,
mè isa me ikeya ikaan̄ ata ere iluluk;
26 ogwu òkisun̄ bọn kan̄ me irak ogugo iriọọn̄-inu,
mè ikiluk me irak otu agọọk kan̄;
27 ọmọ ke iriọọn̄-inu okikwek uyok me lek,
ọmọ si obosa uja eyi iriọọn̄-inu irọ uwu kan̄.