Gọọk ebi melek kwun̄ ekembe je
13
Ogwu ichak ubọk me lek agba, agba môken ene ya ubọk;ogwu igọọk ogwu ugumulek ije, ìbobet lek ogwu ugumulek.
2 Kaben akpan òlolobo igak owu,
kagọọk ogwu òkakaan̄ unye igak owu
mè ibọọn̄ ubọọn̄ igak owu ìgbaan̄ ìje.
Kayik otin̄ ibat ìriaak me agba lek ugọn̄ ekwe;
otin̄ ibat môtọbọ me lek ugọn̄ ekwe, mè ibum.
3 Ogwu òbọbọọn̄ ubọọn̄ isirọ ene ilọ,
ìkinyenye chieen̄ isọkọ me lek;
esirọ ogwu ugbọọn̄ ilọ,
ìkirariaak ene isọkọ me lek.
4 Ogwu òbọọn̄ ubọọn̄ môyaka owu ubọk,
ire imun̄ ibe ke owu okaan̄ oruru inyi ọmọ,
ire, owu osinikup me una, mè ikiweek ntap-ubọk,
môtọp owu ito.
5 Ire okaan̄ inu, môgọọk owu iluk;
môrie owu irak, eya ìkposisaak ọmọ kubọk ge.
6 Ire iweek owu, môkichak imọm ikweek owu,
isa ifiaan̄ owu, inyi owu òkaan̄ ukarajit;
môtumu ikọ utop utop inyi owu ibe,
“Keke okup owu me uyọt?”
7 Mônyi owu inorie mege esip òtet owu;
isichimi owu imem mgbọ iba mè ìre mgbọ ita,
me òta kan̄,
mônenikichak owu ochak.
Isimun̄ owu ofifi mgbọ, môdadaan̄ chieen̄ isan̄a owu me lek,
mè ikisisik ibot iraka.
8 Gbala chieen̄, inyi ekafiaan̄ owu,
mè esip ikatet owu mgbọ okinwọọn̄ lek kwun̄.
9 Ogwu òsibi isi isigwen owu iboriak owu ichen,
kagwat lek ìchieek isisi,
môkpọkpọ ikigwen owu isi ge isi ge.
10 Kabebieen̄ lek kwun̄ ìtap me lek kan̄,
inyi ikabieen̄ owu ìkpebe;
kakekeke si nsọn nsọn,
ìnyi ikawuuk owu.
11 Karọ kubọk owu melek kan̄ ìre ìkike,
kasa ujọn̄ọ ukpatu kan̄ ìtoon̄ ejit;
mije, ìbosa ujọn̄ọ ukpatu cha itọ owu ikpọ,
mè ikisa imọm imọm ibene owu ikpọ.
12 Ogwu ìkakitet otu kan̄ ìkaan̄ ìre ogwu nnaan̄,
ìkpotele inyinyi owu unan, mè ìre itatap owu me mkpọn.
13 Mun̄ ibe ke chieen̄ kwun̄ îre ijọn̄,
mè gbagbala chieen̄,
mije, inu òboda owu ito
òkije ikana me lek kwun̄.
nan̄a keke!
Me otutuuk ugwem kwun̄, ma Okumugwem,
riaak uriaak gwen ọmọ, inyi inyan̄a owu.]a
15 Inu geelek Awaji orombe ìkima mbet lek kan̄,
ikeya si, ogwu ebilene ìkima ogwu ebilene ogbo kan̄.
16 Inu geelek òkifuuk efuuk ugwem,
ìkigọọk ebi melek kan̄ igbaan̄ ije,
ikeya si, ogwu ebilene ìkiyaka lek iriaak
me lek ogwu òbet lek kan̄.
17 Keke ke egbe ikiko melek gwun̄ arọọn̄ egbaan̄ ekaan̄?
Ikeya si, ogwu ijo ene mè ogwu òkekeke inye me lek Awaji
kpekaan̄ mgbaan̄-nrọ.
18 Kpasi esuuk okup inyi ibo oron melek ata ibo?
Kpasi esuuk okup inyi ogwu òbọọn̄ ubọọn̄ melek ogwu ugbọọn̄?
19 Inyinya akpan eyi oron ìre inorie inyi egbe àtat,
ikeya si, ebi ubọọn̄ ekisa ebi ugbọọn̄ ibọọk lek.
20 Isiki-lek ìre mbuban inu me lek ogwu ugumulek,
ikeya si, ogwu ugbọọn̄ ìre mbuban inu
me lek ogwu òbọọn̄ ubọọn̄.
21 Ogwu ubọọn̄ isiborọn̄,
ebi unene kan̄ ekibebieen̄ ikeke;
ire, ogwu ugbọọn̄ isirọn̄,
ikerere ebi unene kan̄,
ekibebieen̄ ọmọ isan̄a me oniin̄.
22 Ogwu ubọọn̄ isikwaak iborọn̄,
owuwa ene mîra inu inibieen̄ ọmọ ikaan̄;
ire itumu ikọ ebot ebot,
ekibọbọkọ ikọ kan̄ ibala itop.
Ogwu ugbọọn̄ isikwaak iborọn̄,
ekigagana ere inyi,
iketutumu ikọ òtatat,
kpebegban̄ utọn̄ me lek.
23 Ogwu ubọọn̄ itumu ikọ, otutuuk ene ekirariaan̄ ere igban̄,
mè ikitọn̄ ikọ kan̄ mege ire akpabin inyọn̄.
Ogwu ugbọọn̄ isitumu ikọ, mîra ikibe, “Ekene ire ogwu?”
Ire ilululuk ikwaak iborọn̄, mîra ibieen̄ ọmọ itọbọ me ijọn̄.
24 Ibọbọọn̄ ubọọn̄ înwọn, ire kpesa ijo oniin̄ ibọọn̄;
ugbọọn̄ ìre ijo inu me chieen̄ ogwu ikariọọn̄ge Awaji gaalek.
25 Inu òkup me ejit ene ìkinwene ene isi,
môkọt isibi ata, môkọt isibi ijo.
26 Isi òtọtọn̄ọ ìre iman̄ ekisa iriọọn̄ ejit òbebele;
isasan̄a urọk isibi ìkido ibe ekeek ekiket edọk.