Rọ ata inu nyi ogwu ata inu ogbebe
12
Ire orọ ata inu, riọọn̄ ogwu orọbe inyi;ke mêtọn̄ owu me lek ata inu orọbe.
2 Rọ ata inu nyi ogwu òkekeke inye me lek Awaji,
ke owu môbọkọ mkpukpe;
ire ìkare me ubọk kan̄,
ìkpolọlọ irere me ubọk Awaji Ogwu Òbebene Ichit.
3 Ata inu geege ìkponu inyi ogwu òtetet lek inye ikirọ ijo inu,
mè ìre ogwu ìkakiche inu ìnyi ebi ugbọọn̄.
4 Che inu nyi ogwu òkekeke inye me lek Awaji,
ire, katap ubọk ìnyi ogwu ijo ene.
5 Rọ ata inu nyi ogwu òsisiki lek,
ire, kanyi ogwu ikariọọn̄ge Awaji inu geege;
jit ọmọ inorie, kanyi ọmọ geege me lek;
mije, môrie isan̄a, mè isa inye lek igak owu,
mè itolek inisa ijo inu ikpe owu mgbọ iba itoon̄ me inyọn̄,
mè useen̄ otutuuk ata inu orọbe inyi.
6 Mije, Ogwu Òbebene Ichit me lek kan̄ ìchacha ogwu ijo,
môsulu ogwu ikpak osusut.
7 Rọ inu nyi ogwu ata ene,
ire, katap ubọk ìnyi ogwu ijo ene.
Ata unene mè ijo unene
8 Kpekiriọọn̄ ogwu òrere ata unene mgbọ inu okije ijaan̄,
ire, ìkakiyọt irọriọọn̄ ogwu ochicha mgbọ inu isifieek.
9 Inu isikijaan̄ ene me lek, ebi ochicha kan̄ mîra ikana unene,a
inu isiyọt ene me lek, ikerere ebi unene kan̄, ekije agba agba.
10 Katoon̄ ejit me lek ogwu ochicha kwun̄ mgbọ geege,
mije, inu ikpak kan̄ ìfieek kubọk achiaan̄ òkitaka ekwe.
11 Ikerere ìsisiki lek kan̄, mè ije initobo ibot inyi owu,
gbala chieen̄ riọọn̄ lek kwun̄ me lek kan̄.
Rọ eru me lek kan̄ kubọk ogwu òkikwuk isi umọọn̄,
ogwu òkpọkpọ ikikwuk mgbọ geelek,
inyi mfuun̄ ikayaka ìchit isi.
12 Kato ọmọ ìriaak me lek kwun̄,
inyi ikada owu ìsan̄a,
mè ìbọkọ irek kwun̄.
Kachieek ibe ikup me ubọk agan̄ ulom kwun̄,
inyi ikaweek ikakana irek kwun̄ ikup.
Me òta kan̄, owu mônenimun̄ atikọ òkup me lek ikọ n̄a,
ikọ ntumube mônenikitaka owu lek.
13 Ekene okito njijin me lek ogwu ifit ulu ogwu ulu otọkbe,
mè ìre ogwu òjeje isi lek ijo anam oron?
14 Ikeya si, kpunu ogwu òkito nsan
me lek ogwu òkigọọk ogwu ijo ene ije,
mè ikigọọk ene ya itap ubọk me ijo inu.
15 Ogwu ijo ene môgọọk owu ikeke sọntiik mgbọ,
ire, ufialek isikeme owu, îra itọp owu ito.
16 Usem otu ogwu ochicha ìkininin̄i,
ire, me emen ejit kan̄, îkaan̄ ntọt itọtọp owu itap emen udọn̄.
Ogwu ochicha môto ito me ibot kwun̄,
ire, irek isisibi inyi, ìbofafiat eje kwun̄ isan̄a, mè iweek ofifi.
17 Ire ùrioon̄ isibi inyi owu,
owu mômun̄ ọmọ orebe ere ya me isi kwun̄,
môfiaan̄ irọ kubọk ọmọ ìkitatap ubọk inyi owu,
mè òto ukot onyi owu òrọn̄.
18 Mônenitọp ibot, mè ikwak ubọk;
mè otumu ikọ nweenweenween̄ enenen,
mè òsan̄a isi kan̄ osibi.