Kakpọ ene me isi
11
Iriọọn̄-inu ogwu ugbọọn̄ ore gogolek kan̄,ọmọ ke îkisa igọọk ebi ilile igbaan̄ isiki iweek irek me ere ge.
2 Kasa me lek uja ìtọn̄ ene,
kakpọ ene chieen̄ ìsiki bak me lek ikajaan̄ge.
3 Akwọọk ìre inu òsisip me etete inu òkiwuwulu,
ire, inu îkisan̄a isibi onin̄i ichit me etete inu geelek òkininin̄i.
4 Kasa ujuja ekwut osabe ibala lek ìgugo lek,
kachieek ibe umin enyibe owu irọ inyi owu ògumu lek;
mije, ikwaan̄ Okumugwem ìkup uyeke uyeke,
ikwaan̄ kan̄ si ìlelet me chieen̄ ebilene.
5 Mîda owuwa ebi ubọọn̄ ito ibe esiki ekweek irek me ijọn̄,
ire, ogwu ekakpọkpọge chieen̄
okakana ogwu òkwukwuun̄ okpibot ubọọn̄.
6 Owuwa ebi mkpulu mîrie esip enenen,
mîkana si ebi ilile ene itap me irak ebi ofifi ife.
Igbagbala chieen̄
7 Kadasi ìtip ene oyerebet sabum ònoweek emen ikọ oriọọn̄;
dasi week emen ikọ kpọ kpan̄ sabum ònokan̄ inu onyi ene.
8 Gban̄ ikọ re ibot sabum ofọọk otu;
mgbọ ene isikitumu ikọ, katap otu.
9 Katap lek me lek ifan̄a eyi ìkagbaan̄ owu me lek,
kagọọk ijo ife ìkup ìsibi oyerebet.
10 Gwun̄ n̄a, katap ubọk me lek owuwa nninaan̄;
ire okirọ owuwa inu, ukwook ìkpolọlọ itetet owu.
Ire olibi igọọk, òkpolibi iraka,
okelilibi inan̄a itele, òkponwọnọ.
11 Îkaan̄ ogwu òkisi ikwaan̄,
mè ikikwukwulu,
mè itet lek inye ikije inyi isi,
ire, mè inimun̄ ibe ke ọmọ ìkikpekpebe inyi udun̄ enenen,
kpan̄asi îbokije inyi isi.
12 Ofifi ene òwa ògbegbeen̄ me lek ikwaan̄,
mè ikiweek ntap-ubọk,
ọmọ ìre ogwu ikakaan̄ge unye,
mè ire si atalek ugbọọn̄,
ire, Okumugwem onenikpọ ọmọ me ata ejit,
mè ijibi ọmọ ibene inan̄a me irek kan̄ òsisiki,
13 mè inibene ọmọ ito me irek umin,
ikeke owuwa ene chieen̄.
14 Ata inu mè ijo inu, melek ugwem mè mkpa,
melek ubọọn̄ mè ugbọọn̄, otutuuk ìnan̄a me ubọk Awaji.
melek ifuk-ibot ofolek Ikan ìnan̄a me ubọk Okumugwem;
imumechieen̄ mè irọrọ ata inu ìnan̄a si me ubọk kan̄.
16 Nrọ-nlọ melek udun,
egbaan̄ ema melek ebi ìkirọ ijo inu irom;
ebi ìkima irọrọ ijo inu ekirọrọ ijo inu mege isi ikan.]a
17 Uche Okumugwem ìkikukup ibia
me lek ebi ìkekeke inye me lek kan̄,
nnwọn kan̄ ìkirọ inu ikije ijaan̄ mgbọ geelek.
18 Ene môsi unye ikwaan̄, mè ituk lek, mè inin̄ ubọọn̄,
ire, mkpukpe kan̄ ìre ikeyi:
19 mgbọ isitumu ibe, “Jei, efuuk n̄a îsiki,
mgbọ keyi, mânirie ubọk ikwaan̄ n̄a!”
ìkariọọn̄ okike mgbọ ọmọ oboluk ugwem ire,
sabum ọmọ òkwu òtele mkpukpe kan̄ onyi ebi ofifi ife.
20 Inu geelek ochieekbe ibe ọmọ môrọ, keke nye me lek,
mè kup me lek kan̄.
21 Kachieek ibe inu ogwu ijo ene okirọ ike owu chieen̄,
ire, toon̄ ejit me lek Okumugwem, mè tet ikwaan̄ kwun̄ nye;
mije, îre mfufet inu me lek Okumugwem,
irọrọ ogwu ugbọọn̄ inin̄ ubọọn̄ mgbọ yaage me ekakpọge chieen̄.
22 Ugbana Okumugwem,
ọmọ ore mkpukpe ogwu òtetet ọmọ inye,
Awaji môkọt ida ugbana kan̄ igwook mgbọ yaage,
me ekakpọge chieen̄.
23 Katumu ìbe, “Keke ke mweek?
Kpasi oruru ke mbakaan̄ mgbọ ònu me isi?”
24 Katutumu si ibe, “Nkaan̄ inu iso ubọk,
kpasi uyọrọlek obotet emi mgbọ ònu me isi?”
25 Inu isikije ijaan̄, mîra iwuuk ijo mgbọ;
ijo mgbọ isinu, mîra iwuuk ata mgbọ.
26 Ire, îre mfufet inu me lek Okumugwem
ikpekpe ene mkpukpe me usen mkpa
igọọk me lek ubọk ikwaan̄ ene orọbe.
27 Inu ufieejit isirọrọ ene mbubak mgbọ ge gaalek,
mîra iwuuk utop eriebe;
me òta mgbọ me ugwem ene, inu ene orọbe îra ikikpọk mbum.
28 Kagwen ene geege ogwu ubelejit
me mgbọ ene ya ìkakwukwu-nu,
òta mgbọ ene ke ekisa iriọọn̄ ene.b
Kpọ ene kpan̄ sabum ogọọk òtet unene
29 Kasa ene geelek ìnitap me uwu kwun̄,
mije, ogwu ifiọk miwa ifiọk me lek.
30 Ejit ogwu ugumulek ìkileke ene itap me unan,
kubọk ekun̄kun̄ ekisa ileke ofut ikpan̄,
ìbet lek ogwu enun̄unun̄
òkiweek ere ubọk kan̄ môsoon̄be owu ibot.
31 Mije, ọmọ ìkilet ikup ikirọ ata inu ikana ikup kubọk ijo inu,
mè òkotumu ijo ikọ okeme inu ògbegbe ibe etọn̄.
32 Ntat ukan̄ ge gaalek
okirọ ukan̄ ibumu me lek èdọ mbubuuk ukan̄,
ogwu ijo ìkilileek ikpọ ibe irek isibi mè ọmọ ifiat eje ene.
33 Gwọk chieen̄ kpọ ogwu ikpak mè ijo nkeek kan̄,
inyi ikafiat erieen̄ kwun̄ ìre mgbọ geelek.
34 Ire obọkọ ogwu ichen itap me uwu kwun̄,
môto uyọrọlek inyi owu,
mè irọ owu òkana ogwu ichen
me emen ototun̄ ukan̄ kwun̄ gaalek.