10
Ogwu ibot oyerebet òrọriọọn̄ inu ìkekijeen̄ ebi kan̄ inu;mkpulu ogwu òkaan̄ ifuk-ibot ìkije me onineen̄ me onineen̄.
2 Ike ogwu ibot oyerebet okupbe ke ebi ibot ikwaan̄ kan̄ ekikup;
ike ogwu ibot mkpulu ama okupbe,
ikeya ke otutuuk ebi ama kan̄ ekikup.
3 Welewele ogwu ubọọn̄ ìkijijijaka ebi kan̄ isan̄a;
ebi ibot mkpulu isikaan̄ ngobo-ntet, ama îra ikitop iluluk.
4 Mkpulu eyi linyọn̄ ìkup me ubọk Okumugwem,
ọmọ okito ogwu ibot ògbegbe me mgbọ îgbebe.
5 Inu ijeje ijaan̄ me lek ebilene ìkinan̄a me ubọk Okumugwem,
ọmọ okirọ ogwu ònyi ikan ikaan̄ umin.
Ugumulek
6 Kakinaan̄ ejit me lek inu geelek ene orọbe owu ilọ,
mè kasa me ugumulek ìrọ inu unyechieen̄ me lek ene.
7 Ugumulek ìre inu Awaji mè ebilene echabe,
isi mè udun̄ echacha oyerebet mfeen̄.
8 Mfeen̄ mè ugumulek mè inu ubọọn̄
okirọ ibe mkpulu ikinan̄a me ubọk ido ge
inin̄ me ubọk ofifi ido.
9 Ogwu ebilene ìre gaalek mfuun̄ mè ntọn̄, ìbosa keke igumu lek?
Mije, ikerere me ògat ugwem, akpalek ebilene ìkijọjọ.
10 Kọbọkọbọ orukan̄ ìkitap ogwu ofia me afuk,
ogwu òrere ubọọn̄ chereyi môre nkwukwu ene iyakwut.
11 Mije, ene isikwu,
ìrot kan̄ ìkire mkput, mè anam òtaka njijọ inu, mè akọkọọk.
12 Ugumulek ogwu ebilene ìkibene me ijijit Okumugwem,
mgbọ ene osan̄abe ejit isan̄a me lek Ogwu Òrorom ọmọ.
13 Ugumulek ìkibene me lek ijo inu,
ogwu òtetet ugumulek inye me ubọk ìbokirọ ijo inu ijo inu.
Eya orọ Okumugwem okisa ùrioon̄ òkup nke nke initoon̄ ema,
mè ijijaka ema isan̄a kpai.
14 Okumugwem okigbugbọ ebi ubọọn̄
me inyọn̄ ogboon̄ kiban̄ igwook,
mè ikibene ebi ìsisiki lek itoon̄ me irek kiban̄.
15 Okumugwem okijibi ido geelek
melek ugwun̄-ijọn̄ kiban̄ isan̄a,
mè ikiwop ebi ìsisiki lek me irek kiban̄.
16 Okumugwem okijijaka ijọn̄ ebi ido geelek,
mè ikijijaka ema ire lek ugwun̄-ijọn̄ kiban̄.
17 Ìkekisan̄a usini kiban̄ isan̄a, mè ijijaka ema igwook,
mè itutuku erieen̄ kiban̄ ichep dìp dìp me linyọn̄.
18 Awaji ìkarom ugumulek ìnyi ebilene,
ìkatoto si unaan̄-ejit afa ìnyi ebi ebibaan̄ emaan̄be.
Ebi ìgbegbe umin
19 Bọn owot iman ebi owa ke umin ogbe?
Ìgbe bọn owot iman ebilene.
Ebi owa ke umin ogbe?
Ìgbe ebi ìkitet ukpook Okumugwem.
Bọn owot iman ebi owa ke umin ikagbege?
Ìkagbe bọn owot iman ebilene.
Ebi owa ke umin ikagbege?
Ìkagbe ebi ìkifiat Ikan Awaji.
20 Me etete bọn ulọk, umin ìgbe ogwu ibot me lek kiban̄,
ire, ebi ìkitet ukpook Okumugwem,
ebiba ke umin ogbe me isi Okumugwem.
ire, itọtọbọ ilọ ìkibene me lek unye-ibot mè ugumulek.]a
22 Itetet ukpook me lek Okumugwem ore umin,
isa inyi ogwu òbọbọọn̄ ubọọn̄,
mè ogwu ilile, mè ogwu ugbọọn̄.
23 Ìkatat ibe ekanyi ogwu ugbọọn̄ òkakaan̄ ifuk-ibot umin,
ìkagbegbe si ibe enyi ogwu ijo ene umin.
24 Mêsa umin inyi ogwu ibot ikwaan̄,
mè ogwu ibot oyerebet, mè ogwu ibot mkpulu,
ire, kpunu ene geege me lek kiban̄
òmimin igak ogwu òkitet ukpook Okumugwem.
25 Bọn owot mêsi ikwaan̄ inyi ogwu usun̄ òrọriọọn̄ inu,
ogwu òkaan̄ ifuk-ibot ìkponunuun̄.
Isiki-lek
26 Osikirọ ikwaan̄ kwun̄, karọ kubọk owu oriọọn̄ ifiat,
kakup me emen una ìkibene lek.
27 Ogwu òkisi ikwaan̄ isa ikaan̄ inu iwa,
înwọn igak ogwu ugumulek òkup me uraafiọọn̄.
28 Gwun̄ n̄a, siki lek kaan̄ umin nyi lek kwun̄,
mè mọnọ lek kwun̄ ike okupbe.
29 Ogwu òkifieek lek kan̄ ikọ, ekene obotumu ata ikọ ibak?
Ogwu ìkanyi lek kan̄ umin, ekene obonyi ọmọ umin ni?
30 Ekinyi ogwu ugbọọn̄ umin bak me lek iriọọn̄-inu kan̄,
mè ikinyi ogwu ubọọn̄ umin mije inu ubọọn̄ îkaan̄be.
31 Ogwu ugbọọn̄ ogwu ekimin,
ire more ogwu ubọọn̄,
ìre ebenimimin?
Ogwu ubọọn̄ ogwu kpekinyi umin,
ire more ogwu ugbọọn̄,
ìre ìbokukup?