Nteme ofolek ebibaan̄
9
Kakaan̄ mba-ejit me lek nwa omabe,inyi okajeen̄ ọmọ ijo inu ìsa ìtap unan me lek kwun̄.
2 Kasa ugwem kwun̄ ìnyi enenwaan̄,
môtun̄ unye kwun̄ imem.
3 Da lek san̄a me lek enenwaan̄ barabat,
inyi okanin̄ me ufe kan̄.
4 Kagọọk enenwaan̄ òkikọt okwa ìmuman̄a,
inyi ikasa ifiọk kan̄ ìkpebe owu.
5 Kagwuun̄ chieen̄ ìkikpọ obaak enenwaan̄,
inyi okanan̄a ìrọn̄, mè ìkpe mkpukpe ibot kan̄.
6 Kasa ugwem kwun̄ ìnyi ebi òje oyet,
inyi ìrot geelek okaan̄be ikachep owu.
7 Kakiriraan̄ chieen̄ ìkana lek oniin̄ me emen ama ile,
kajijijen̄e si me agan̄ òkinọnọọn̄ me emen ama ya.
8 Da chieen̄ kwun̄ san̄a me lek ukama ukama ujuja enenwaan̄,
mè kagwuun̄ chieen̄ ìkikpọ uja enenwaan̄ ofifi ene okaan̄be.
Uja eyi enenwaan̄ îra isa owuwa ebirieen̄ itap me ijo oniin̄,
ìkibene ene ulọk me lek, eyi òkiyok kubọk ukan̄.
9 Kagọọk nwa ofifi ene ìgbaan̄ ìkup ìrie inorie,
kagọgọọk si ìkup ìnwọ miin̄,
egwurugwu lek kan̄ môleke owu ifiin̄,
ulọk ebek môsasa owu ijet mkpa.
Itetet unene
10 Katele oka unene okaan̄be,
mije, eyi ayaya ìkpore ìkike melek kan̄.
Aya unene ìre aya miin̄,
isikup ifiin̄, îra ikitop inwọnwọ.
11 Inu isikije ijaan̄ me lek ogwu ijo ene, kato mba,
mije, òkariọọn̄ ubọk mgburudun̄ usen kan̄ obokup.
12 Kachieek ibe inu òkitop me lek ogwu ikariọọn̄ge Awaji
itop owu me lek;
kawuuk ibe ke osusut òwa me ibot kan̄
otutuuk usen ugwem kan̄.
13 Je jọn̄ọ ere me lek ogwu òkaan̄ unye ikpakpan̄ ene,
ukpook mkpa ìkpokitet owu.
Ire, ire oje iriaak me lek, kato ukot ìlọ,
mije, oto ilọ, môsan̄a ugwem kwun̄ isan̄a.
Riọọn̄ ibe ke òkije me emen uko ufe ufe ojotbe;
òkije me inyọn̄ mgban akọn̄,
eyi òrere, ukot ikwala, ibot obum.
14 Mun̄ ibe ke owu oriọọn̄ lek ebi melek kwun̄ egbaan̄be iluk,
ke okibọkọ nteme me otu ebi ìriọọn̄ inu.
15 Obokpa ukpatu, kigọọk ebi ìkaan̄ ifuk-ibot kpa;
tele mè Ikan Awaji Ogwu Òbebene Ichit ire ibot ukpatu kinyi.
16 Gobo ebi ata ife, inyi egọọk owu egbaan̄ ekerie inorie;
tele mè ukpook Awaji ire ibot gogolek kwun̄.
Ebi ibot mkpulu
17 Ekitọn̄ ikwaan̄ ikpọ me lek ubọk ogwu òrọrọ orọbe ijaan̄;
ikeya si, ekisa ikọ ogwu ibot mkpulu
iriọọn̄ ibe ke ọmọ ìre ogwu òriọọn̄ inu.
18 Ogwu òkimalek itumu ikọ,
ekitetet ukpook me lek me emen ama kiban̄,
Ogwu otu ìkakikeke, ekichacha.