Ata nkeek mè iriọọn̄-lek
8
Kasi ìtọ lek ìkpọ me lek ogwu unye,inyi owu okarọn̄ ìnin̄ me ubọk kan̄.
2 Kagọọk ogwu ubọọn̄ ìbaak ibaak,
môkọt irie udun̄ isa irọ ikeme owu.
Alata araran̄ îra ifiat owuwa ene,
mè inwunween̄ ejit owuwa ebi ubọọn̄.
3 Kawut ifan̄a melek ogwu òkimalek itumu ikọ,
ìbore iye ke okitap me ukan̄ inyi.
4 Karọ inu ochak me lek ogwu ijo eru,
môgama ebi nte nte kwun̄ me isi kwun̄.
5 Kachak ogwu òkigwu ikom me ijo inu ochak,
keek ibe ke itip-oyerebet òwa me ibot kiji otutuuk ene.
6 Kakpọ ogwu oka ugane chieen̄ ìsiki,
mije, usini kiji si mêkikan.
7 Kabele ejit ibe ene îkwu mkpa,
keek ibe ke otutuuk kiji ebekwukwu.
8 Kadaan̄ utọn̄ ìsan̄a mgbọ ebi ìriọọn̄ inu ekitumu ikọ,
kween̄ urọk ema etobe cha;
mije, inan̄a me lek kiban̄, owu môkween̄ ata eru,
mè irọọn̄ ubọk ekisi ikwaan̄ inyi ebi ilile.
9 Kakpọ chieen̄ ìlọ me lek ikọ ebi ugane,
mije, ema me lek kiban̄ ekween̄ me ubọk ebi nte kiban̄;
inan̄a me lek kiban̄, owu môkween̄ ngobo-ntet,
mè iriọọn̄ ubọk ekifọọk ikọ mgbọ îkupbe me uyọt.
10 Kanyi ogwu ijo ene irek ibe ikirọ ijo inu,
inyi ijo inu kan̄ ikaseme kubọk unye alọm ukan̄ ìtaka owu.
11 Kanan̄a ìkeke ìje ìgọọk ogwu ugumulek ìsi ìwut ifan̄a,
inyi ikasa ikọ kwun̄ ìtap owu me ufe.
12 Kafọọk inu ìnyi ogwu ònyenye lek igak owu,
ire ofọọk, fuk ibe ìre ichep.
13 Kakeke nsọọn̄ ìraka inu ubọk kwun̄ obokọt isoon̄,
ire okeke nsọọn̄, bem lek ikpekpe isan̄a.
14 Karọ ikọ ìkeme ogwu ibot oyerebet,
mije, oyerebet mônwọn ọmọ bak me lek irek kan̄.
15 Kagọọk ogwu wuruwuru ìje ije,
môkana ufialek inyi owu;
mije, môrọ inu ubọk òneme ọmọ,
owu melek kan̄ mêgbagbaan̄ ikwaan̄.
16 Kagọọk ene geelek òrere ogwu uyok-ejit ìbaak ibaak;
kagọgọọk ọmọ si ìgbaan̄ ìje ije me ere ònọnọọn̄;
mije, ifafiat eje ene ìkare inu geege me lek kan̄.
Ere chieen̄ ene kpunube,
môbọn̄ owu ikpan̄.
17 Kagọọk ogwu mbubut ìnin̄ oru,
mije, inu okpabe inyi, ìkpokọt isun̄ me okwu.
18 Karọ inu òbokup nlelet me isi ogwu ichen,
mije, òkariọọn̄ inu ìbosa isi ikpa.
19 Kachili ejit kwun̄ ìnyi ene,
kabeek nnwọn me ubọk ene geelek.