Olhiom ẹmha dị aaleghaan
17
*Kụ oniin sịphe oḍual phọ ạruukpaany phọ ọmoogh bọ oḍual iḍukuru ạsigbagba phọ aru ụḅeni ịmi mọ, “Tue, mị kaḍeenaan nyịna ịdi kọliom oliom ẹmha phọ aalheghan bọ eboom ẹmha phọ etuman bọ ịbadi ạrumuum mọ. 2 *Ạbudaam aḅirini phọ upesiom ni ipesi ạnir phọ, kụ amiim aghiigh ni oomo awe aḅirini phọ ọphughol bọ miim ipesi phọ ọdi.”3 *Uwaloor phọ ụsiiny ni ịmi kụ ọokpaany phọ ụpheephom ịmi asiemi ẹdala. Ẹpe phọ mị ụmiin ni ạnir dị ạrolom ude ẹtogh-tọgh elhom ẹnam dị ọgeeghi siḍien ọopuom Ẹnaan okitonom oomo phọ ọdi. Elhom ẹnam mọ ịmoogh oḍual ạrumhu rꞌaḍioph ạraphaal. 4 *Ạnir phọ aanmenan oodor, ạdaaghian sigol, ạdia ịbekulari rꞌạrala. Ọdi ạpham ẹgo agol dị omuzeḍi ọdo kịrokiro ạraraar ẹenir rꞌumugholoor ipesi phọ ọdi. 5 Sịphe egbodo phọ ọdi ụge ḍien dị ạaghi ẹmhu phọ mọ, “Oboom ạBabilon, onhiin oomo abulhiom ẹmha rꞌugbini-ugbini aḅirini phọ.” 6 Kụ mị ụmiin ni mọ ịḅaal awe phọ Ẹnaan rꞌịḅaal ạbuphe ọtuan bọ mọ omeeraam Jịzos phọ kụ ọze bọ meghiigh ạnir phọ ịdipho amiim.
Mị ạmiin bọ nyọdi, iḍighi ni iboom iikia esi ạmi. 7 Kụ ọokpaany phọ upuru ịmi mọ, “Nạ raakia ghan eeghe? Mị kạḅeni ni nyịna ịbooghian ẹmhu ạnir phọ rꞌelhom ẹnam mọ ẹmoogh bọ oḍual ạrumhu rꞌaḍioph ạraphaal phọ ọdi ạrolom bọ. 8 *Elhom ẹnam mọ nạ ạmiin bọ ịrol ghan ni kụ nyịidipho ụ́miin mun; ẹḅile emite sịphe ooni phọ, pọ ẹḍua retu mọ ophiemi. Keḍighi ni iikia esi awe phọ orugh bọ sịen ade phọ kụ siḍien ạbidi ụ́geeghi aani bọ kꞌamem mọ aḅirini phọ kọ̋lhem bọ sịphe ạḍinya ạbuphe odi bọ. Keḍighi ni iikia esi ạbidi ophogh elhom ẹnam mọ ẹrol ghan bọ ni kụ ílho mun bọ kụ kẹḅile bọ ni emite.
9 “Ịphen phọ regbologh ghan olegheri ịyaar rꞌọnaghan ạḍughum. Oḍual ạrumhu phọ, pọ oḍual aroogbolom mọ ạnir phọ ạrolom bọ ude phọ. Bịdi phọ kẹn oḍual ạbudaam-ẹmha. 10 Mọka oogh ạbuno, oniin ạda ni nyịidipho, kụ ọphori phọ kőru, kụ katu bọ kạtol li mọony amem bịn. 11 Kụ elhom ẹnam mọ ẹpe mẹrol ghan bọ ni mem dị meten kụ ílho mun bọ nyịidipho kụ ọdaam amuneniom ọphaanya. Ẹnam mọ ẹphen phọ ẹlo kꞌạbuḅel oḍual ạbudaam mọ, kụ memite rẹki mọ ophiemi.
12 *“Ḍioph ạraphaal phọ nạ ạmiin bọ, pọ ḍioph ạraalha dị kőmiigh ịtooghi, kụ kọngo ịikpo mọ bịdi ọḅarama elhom ẹnam mọ ọda ghan oniin ạwa bịn. 13 Oomo aḍioph phọ ạbidi ọḅoph iniin ịitughian, ọḅile ọngo elhom ẹnam mọ ịnyaam rꞌịikpo phọ ạbidi. 14 Bịdi kotuphiom ni ẹgham Mọony Oyool-ọga phọ, kụ Ọony Oyool-ọga phọ rꞌạbuphe ọdi ạsaḅar bọ ạmagh kụ oseere ghan bọ ologhi phọ esi ọdi kọkpar ri opu bịdi, ịdi eḍighi bọ emuton nyọdi ọnon Ọmoogh-we rꞌỌdaam ólho ghan.”
15 Ọokpaany phọ ạḅile ni ụḅeniom ịmi mọ, “Ạrumuum mọ nạ ạmiin bọ ạnir phọ ạrolom bọ ude phọ, areelhe ni rꞌaḍita awe rꞌạramha rꞌạrunhu. 16 Ḍioph phọ ạraphaal phọ nạ ạmiin bọ rꞌelhom ẹnam mọ kọlogh ni ḍien oliom ẹmha phọ. Bịdi kọsighiogh ni oomo ạraraar lọ ọdi ạmoogh oseere nyọdi ẹdaḅa. Bịdi kọba ni iphulupul ọdi kụ opiemiom nyọdi nịan, 17 ịdi eḍighi bọ Ẹnaan ẹlogh ịitughian phọ ọdi ologhi ạbidi mọ oḍighinom ịpe ọno rạwa bọ, mọ ooḍikuan, ḅịle ọngo elhom ẹnam mọ ịikpo ọtooghiom ạraraar tụtu ikpo ọnhu phọ ọno emunughan.
18 “Ạnir phọ nạ ạmiin bọ, pọ eboom ẹmha phọ ẹpaghaghaam bọ bụdaam aḅirini phọ.”