2 Ọnma ighirigiir rꞌẹphomoghian rꞌẹepho ẹbalabala ni ịrolonaan inyina!

3 Iiḅi asiya, ịrol ghan ni ologhi ạmi ọge anyina ịlo ạpeleeny phọ yira ọḅophoghan bọ ọmoogh, kụ mịkpaariom bọ ịmi nyịidipho ọge ọkparamiom iloghi phọ anyina lọ nyina kẹmerenyan ebianaan igey phọ ịpe Ẹnaan ẹngo bọ we phọ ọdi mem bịn ḅeer ẹmadan mọ omeeraam ghan phọ. 4 Buniin awe dị Ẹnaan úlegheri momian oḍigh ogbo phọ ayira. Bịdi mọsighe dom mọ Ẹnaan ẹḅem bọ mọ yira mokpetenaan iilogh phọ otene dọl ipesi rokel ghan Jịzos Kraist ogina Ọmoogh-we phọ rꞌỌde-otu phọ ayira. Mebia ni Ạḍinya Iigbia phọ ẹghaaph bọ emitiom ịlo ạghelhe phọ ạkuen mạteeny bọ bịdi.

5 ^*Nyina melhegheri ni ịphen phọ etene igbaany, kụ mị rạwa ni ọghiom anyina ologhi mọ Ọmoogh-we phọ kụ aako bọ ni weye phọ Ịzirel amitiom eelhe phọ Ijipt, kụ amem ẹḅile bọ ẹman mem ọ́wile ophiemi ạbuphe úmeeraam bọ. 6 Ịitughian buniin ạruukpaany phọ Ẹnaan, bụphe ụ́tuugh bọ ịikpo phọ ọngo bọ bịdi kụ ọrolom, kụ ọḅile bọ oghelogh marugh phọ ạbidi. Ẹnaan mẹsighe izime dị kẹtol li kꞌagee-pọ ẹkasaghiom bịdi, ẹlogh ọkikiph ufiri okoriom ghan aḍigbogh aḍio ịiruen phọ. 7 ^*Ịitughian Sọdom rꞌaGomora rꞌạramha phọ etuman bọ bịdi. Bịdi phọ kẹn ọman úpogh ọminian ạriiniom rꞌipesi kịrokiro. Ịikpia phọ ạbidi ọmiinom ịminimiin ạnian dị kéḍim kꞌagee-pọ, ịlo ọphurom ạruru oomo awe.

8 Igina phọ ịduon phọ kẹn kụ edianaan we phọ ạbuen. Bịdi rọmiin ghan uḍien koghol ọphuenaan loor ạbidi, ọḅitonaan iilogh Ọmoogh-we phọ, ọopu bụo aghuḍuul phọ. 9 ^*RꞌạMaikel uwo ẹmhu ạruukpaany phọ Ẹnaan bịn kőḍighi ghan ịphen phọ. Mem mọ Eru phọ rꞌọdi ọokonoghian bọ oye lọ kạmoogh ḍizu phọ aMozis, ạMaikel ómighirom osoph ọoruen oronyonom nyọdi ạḅem ghụn ni mọ, “Ọmoogh-we phọ kụ ạliom nyịna!” 10 Kụ awe phọ ạbuen phọ rotonyon ghan rạraar lọ epelom olegheri ịyaar phọ ạbidi. Ạruuphua ạdol ịnam mọ ạbidi kụ ọkaraghi ạraraar phọ repiemi bọ bịdi. 11 ^*Pọ eeghe ọdo ịminimiin dị kẹtolonaan bịdi. Bịdi mọlhogh ẹmhu rọdaph ghan dọl phọ aKen ạrol bọ. Bịdi mọtuan ikpoki ọkuom loor ạbidi iigbegheḍiom ịdipho ạBelam aḍighi bọ. Ịgbagharan phọ ạbidi ịghigh ịpe aKora kụ mophiemi aani bịdi. 12 Mem lọ nyina eekpomoghan olhe eḍien adulhe Ọmoogh-we phọ, bịdi ọkigh ẹenir dị ẹbiphogh bụo ạmuḅoph phọ, ḅịle kẹn bịdi umugholoor rókiil ghan oogborion osughugha amalhe phọ. Bịdi ọkigh ọotu dị oghim rakimom kụ ọlophia ụ́ḅaram. Bịdi ọkigh ireeny dị iimuma ímuum ghạlamo rꞌamem osoor ri, dị emuughu ḅeer ẹmadan kụ mọdenyon olereghi. 13 Aloor ạbidi ị́po, ẹkigh oologh ọphiiny. Eḍighinom ịyaar umugholoor phọ ạbidi ẹkigh oopha phọ ọpo oologh phọ rafugh ghan bọ. Bịdi ọkigh ipelom ịkasi dị Ẹnaan meekolobian ọkikiph ufiri dị kạtol kꞌagee-pọ eseenaan.

14 ^*Bụen phọ kẹn kụ ẹdi Ẹnok, ọpo amuneniom bọ oḍual oghiil phọ emiigh kꞌọrugh Ạdam, ạmiin bọ ni ịmiin ịlo ạbidi mọ, “Ịnaghan! Ọmoogh-we phọ kạpam ni sịmuunir ạruukpaany phọ ọdi atumom, 15 oogboonaan ịiruen oomo awe, ophume yogh oomo abuḍighinom ịkaraph phọ Ẹnaan úlegheri bọ loor oomo ịkaraph elegheri Ẹnaan phọ ạbidi, rꞌoomo ịkaraph phọ bịdi mọghaaph bọ ọphuenom Ẹnaan.”

16 Awe phọ ạbuen phọ roohuum ghan oomo amem kọnughe ẹka bụnon awe. Ịkaraph ạruuphua kụ ịmoogh ghuḍum mọ ạbidi. Bịdi rootuma ghan, ḅịle kẹn roophughemi ghan bụnon ọmooghom ạsuo.

17 Iiḅi asiya, ịitughian ịpe abutelhedom mọ ạJizos Kraist Ọmoogh-we phọ ayira ịḅeni ghan bọ inyina mem dị meten, 18 ^*mọ, “Ẹteeny ruukuna phọ, awe dị kịgilaam inyina, ḅịle kẹn ịkaraph ạruuphua kụ ẹmoogh ghuḍum mọ ạbidi, komite ni.” 19 Bụen phọ kụ rọgbarion ghan bọ we ạsiosi phọ kosereghi rụuku kịrokiro phọ. Ịkaraph ạruuphua kụ ịmoogh, Uwaloor Iigbia phọ kụ ọ́moogh ghuḍum mọ ạbidi. 20 Kụ nyina, iiḅi asiya, ịsighe omeeraam mọ anyina aakuan bọ aseleman, ẹeneghiom ghan ghuḍum mọ anyina. Uwaloor Iigbia phọ kụ aḍiemiom ghan ịiḅereghi phọ anyina! 21 Iḍuraan etuman Ẹnaan, ọbo ẹphomoghian phọ ọdi ịteeny inyina. Ikoriom ghan ni ḍio phọ ạJizos Kraist Ọmoogh-we phọ ayira kạtuan bọ ighirigiir phọ ọdi ịngo inyina ghuḍum kꞌagee-pọ phọ.

22 Ịkparami ni eḍighi ịdi bụphe odi bọ ịisoku phọ komeeraam aani igey phọ. 23 Izin buniin emitiom sịphe ạnian phọ ẹphel ẹsighe. Ịnma ni buniin ighirigiir, kụ ọlo igona ni loor ọbo ịkaraph kịbiphogh ghan bọ inyina, ẹloghom ḍien ghạlamo rꞌukpe-ologhi phọ ẹenir aloor phọ ạbidi mẹbiphogh bọ.

24-25 Egina Ẹnaan phọ ẹtuan bọ Jịzos Kraist Ọmoogh-we phọ ayira kụ rịphel ghan bọ inyina, kụ riiko ghan bọ ni inyina mọ kẹ́korom emeel phọ, kẹḅile ni ịmeremi ghan inyina rꞌọḍe ghisigh igbogh phọ ọdi, dị nyina keseleman. Kꞌẹḅel egbiom mọ igbogh phọ rꞌeegu phọ rꞌịikpo phọ rꞌịnyaam mọ ịlo ọdi ni, kụ kẹtolonaan ni nyọdi nyịidipho kꞌagee-pọ kꞌagee-pọ. Ẹrol li ịdipho!