5 “Nyina iḍighi ghan mụlogh-ḍien Ịzirel oomo amem kụ emeera mọ ọkanyan we phọ ọdi mem ịiḅaghami phọ ọdi, mem ọliom ọdi okureri loor ạsipioghom mọ ọdi. 6 Loor ịphen phọ, agey ni ịduon mị Ọmoogh-we dị ạmoogh oomo ịikpo aru bọ Ẹnaan dị edi ghan — aḍuugh kụ edi risigh anyina, kụ nyina kékpetenaan. Nyina mẹko bọ enu, pọ ọko enu kịdaph ni inyina. 7 Mị katene eelhe aroogbolom mọ Idom oopho ade kụ ạze oomo ạbulo orelhe ọḅeeny. 8 Mị kaleenye rạaḅaraph phọ rꞌiḍim, kụ aruzu ạbuphe ọze bọ ẹgham keleeny roogbolom mọ rꞌariḍiiny phọ. 9 Mị kiigulemi inyina kꞌagee-pọ, kụ oye kátugh mun rạmha phọ anyina. Kụ nyina egbi olegheri mọ mị kụ Ọmoogh-we phọ.

10 “Nyina ịḅem mọ ịyal phọ areelhe phọ, aJuda rꞌỊzirel ḅịle rꞌarere phọ ạbidi, eḍighi ịlo anyina kụ nyina kẹmoogh bịdi ghạlamo mị Ọmoogh-we phọ kụ uḍighi Ẹnaan ạbidi. 11 Loor ịphen phọ, agey ni ịduon mị Ọmoogh-we dị ạmoogh oomo ịikpo aru bọ Ẹnaan dị edi ghan — mị kiḅulemian inyina esi ophin ologhi phọ anyina, igbeghian phọ anyina, rꞌạmulogh-ḍien phọ nyina ẹmooghaan bọ we phọ ạmi. Bịdi kolegheri ni mọ mị rịlhiom inyina esi ịpe nyina eḍighi bọ bịdi. 12 Kụ nyina egbi olegheri mọ mị Ọmoogh-we phọ ụnaghan ni ịdi nyina ẹḅem ghan ẹgilaam mọ ạraaḅaraph phọ Ịzirel meegulaan, ḅịle mọ bịdi eḍighi bụo anyina ophiemi. 13 Mị mạnaghan ni ẹkaraph ẹghaaphom oobagaam mọ nyina ẹghaaph bọ ọgilaam ạmi.”

14 Ọmoogh-we dị ạmoogh oomo ịikpo ạḅem mọ, “Mị kiphiemi ni inyina ịdi oomo aḅirini phọ kọḅaal ologhi esi emeel phọ anyina, 15 ịdipho nạ ạmoogh bọ iboh mem oogulemi phọ Ịzirel, eelhe ẹmoogh phọ ạmi. Ạraaḅaraph phọ aSeir, ii, oomo ade phọ Idom, keegulaan ni. Kụ tọrobo oye agbi olegheri mọ mị kụ Ọmoogh-we phọ.”