Abupoghom iyool-ịga phọ Ịzirel
34
Ọmoogh-we phọ ụḅaanaan ịmi. 2 Ọdi ạḅem mọ, “Oye dị kamugh ni, ḅạaghiom buḍiemiom mọ Ịzirel. Mịinaan bịdi kụ ạḅeni bịdi ịphen mị Ọkar Ogbogh Ọmoogh-we phọ ạḅeni bọ bịdi: nyina mepheeghu, nyina abupoghom iyool-ịga phọ Ịzirel! Nyina ẹpama siloor anyina kụ iyool-ịga phọ nyina ípogh. 3 Nyina ẹmoophi mạmaam ạnam mọ ẹkpologhian iinmenan dị ọkolom suphuugh ịnam, kụ ẹḅile ẹze ẹba ịkar igey iyool-ịga phọ, kụ ọlo iyool-ịga phọ nyina ípogh. 4 Nyina ípogh bụphe asiloor phọ medugh bọ, íikonom bụphe rꞌọorurughian bọ, ị́koroghiom ukpe bụphe oḍighima bọ rạraar phọ, ị́ḅile íḅulemi bụphe moyeela bọ, ị́ḅile ị́wa bụphe mopheeghu bọ. Kpạripe ghụn, nyina ịḅile kụ eḍighi bịdi ịdi ị́nighe. 5 *Loor esi dị iyool-ịga phọ ị́moogh bọ opoghom, bịdi ịwalala ni, kụ ilhom ịnam ẹze bịdi ạa. 6 Ịbadi iyool-ịga ạmi iyeela ẹpe aroogbolom mọ rꞌạraaḅaraph phọ. Bịdi ẹwalala oomo ịsien ade phọ, kụ rꞌoniin oye bịdi ọ́wa ọ́ḅile ọ́oḅaghamian loor ọmiin ạbidi.7 “Nyịidipho, nyina abupoghom mọ, iler rụru ịpe mị Ọmoogh-we phọ rịḅeni bọ inyina. 8 Agey ni ịduon mị aru bọ Ẹnaan dị edi ghan, ịmaar ịnaghanan ịmi. Iyool-ịga phọ ạmi, ilhom ịnam mezuom ẹze ẹba bịdi loor esi dị opoghom ọ́rol. Ị́iḅaghami bupoghom mọ ạmi ọwa ọmiin iyool-ịga phọ. Bịdi uphogha ghan siloor ạbidi bịn iyool-ịga phọ úpogh. 9 Kụ iler rụru nyina abupoghom. 10 Mị Ọmoogh-we dị ạmoogh oomo ịikpo mạghaaph amitiom mọ mị ạmulogh-ḍien anyina. Mị kạsighe ni iyool-ịga phọ ạmi ḍịghaagh anyina kụ mị kámeera mun nyina eḍighi bupoghom ạbidi; mị kámeera mun nyina ephogha siloor anyina. Mị kạtagharan iyool-ịga phọ ạmi ḍịghaagh anyina kụ mị kámeera mun nyina ạa bịdi.
Ooḅi opoghom iyool-ịga
11 “Mị Ọmoogh-we dị ạmoogh oomo ịikpo ịḅeni inyina mọ mị rꞌaloor kapogh iyool-ịga ạmi, ạmaar ạpam bịdi 12 ịdipho opoghom kạwa bọ iyool-ịga ọdi dị ẹwalala kụ ạḅile aakpomoghi oomo ariisi lọ bịdi ọwalala ḍio ufiri dị ị́nighe. 13 Mị kạsighiogh bịdi amiteghom iiruen ạramha, aakpomoghi bịdi, kụ aḅulemi bịdi de ạbidi. Mị katelhiom bịdi ạkimom ẹpe ạraaḅaraph phọ rꞌasikol ẹpe Ịzirel kụ ạngo bịdi ịma ạroogho ọraal. 14 Mị kaḍighi ịdi ịyaar bịdi kẹ́ḅogh mem dị bịdi rẹtaal rọogho ẹpe ạraaḅaraph phọ rꞌẹpe ariḍiiny phọ rꞌoomo ariisi ạroogho lọ ạghiima bọ ẹpe Ịzirel. 15 Mị rꞌaloor kaḍighi opoghom iyool-ịga ạmi kụ mị kạwaanaan bịdi esi ophooghian. Mị Ọmoogh-we dị ạmoogh oomo ịikpo kụ mạḅem.
16 “Mị kạwa ịpe mopheeghu bọ, aḅulemi ịpe meyeela bọ, ạkoroghiom ukpe ịpe eḍighima bọ rạraar phọ, aakonom ịpe rẹerurughian bọ; kụ ịpe ẹbugh bọ ekpo rꞌịnyaam mị kapiemi ni, loor esi dị mị opoghom dị raḍighi ghan ịlo eḍighi elhiom.
17 “Nyịidipho, ḍita awe, mị Ọmoogh-we dị ạmoogh oomo ịikpo ịḅeni inyina mọ mị kasoph ni ọoruen ạngo tọrotoro oye phọ kụ ạgbatan bugey phọ sịphe ạbukaraph phọ, iyool-ịga phọ sịphe ạrutu-ịga phọ. 18 Buniin anyina ị́gbaanyan ọraal ọkar ịma ạroogho; nyina ẹḅile kụ rẹezeghi kephiemi ịlo nyina rẹ́taal! Nyina ẹpughol mụum dị ạser-sẹr kụ egir mụlo nyina rẹ́pughol! 19 Ịpheri phọ iyool-ịga phọ ạmi kẹtaal li rọogho phọ nyina mẹezeghi bọ kụ ọpughol mụum mọ nyina megir bọ.
20 “Kụ iḍighi kụ nyịidipho mị Ọmoogh-we dị ạmoogh oomo ịikpo ịḅeni inyina mọ mị kisophonaan ni ọoruen inyina iyool-ịga phọ ẹmoogh bọ ịnyaam rꞌịpe ịnyaam ị́moogh bọ. 21 Nyina ekpor ịpe ímoon bọ ẹgbole kụ ekul ẹgbatan sịphe aḍita phọ. 22 Kụ ọlo mị kạtagharan ni iyool-ịga ạmi ḅịle mị kámeera ọmiine bịdi nịiniin. Mị kasophonaan ọoruen tọrobo oyool-ọga ạmi kụ ạgbatan igey phọ sịphe ịpe ị́nighe bọ. 23 *Mị kạngo bịdi ọdaam dị ạrol ịdipho aDevid otelhedom mọ ạmi oḍighi oniin opoghom ạbidi, kụ ọdi kạmaar ri ạpam bịdi. 24 *Mị Ọmoogh-we phọ kaḍighi Ẹnaan phọ ạbidi, kụ ọdaam dị ạrol ịdipho aDevid otelhedom mọ ạmi kụ kạda bịdi. Mị kụ mạḅem. 25 Mị kakiran ịyo rꞌạbidi dị kẹmeera enye mọ ịyaar bịdi kéḍighi. Mị kakune ịkaraph ịnam mọ edi bọ sịphe ade phọ, ẹrol dị iyool-ịga phọ ạmi ẹtol rꞌẹepho ẹpe arere phọ kụ ẹmina ẹpe ạruukpua phọ.
26 “Mị kạseph ni bịdi kụ aḍighi ịdi bịdi kọtol okoom eegbolom iigbia phọ ạmi. Sịphe mị kạsephom bịdi oyiririph ọlophia mem lọ bịdi ọwa. 27 Ireeny phọ kemuum iimuma, iizo phọ kemite eḍien kụ tọrobo oye kạtol rꞌẹepho de ọdi. Mem dị mị asoph izime awe phọ ạmi kụ aseere bịdi dọl ẹereegh esi ạbuphe oḍighi bọ bịdi rẹbene phọ, pọ kụ amem dị bịdi kolegheri mọ mị kụ Ọmoogh-we phọ. 28 Areelhe phọ ịpe Ẹnaan úlegheri bọ kóbum mun rạraar ạbidi, kụ ilhom ịnam kẹ́ze ẹ́ba bịdi. Bịdi kọtol rꞌẹepho, kụ rꞌoniin oye káḍighi bịdi ịlo aḍiigu. 29 Mị kạngo bịdi de ẹnuum kụ akunughi ọkoony sịphe ade phọ. Ịpheri phọ areelhe phọ kọ́kpin mun ópogh bịdi. 30 Tọrobo oye kalegheri ni mọ mị raakpereghi ghan Ịzirel esi ịkaraph ḅịle mọ bịdi awe ạmi. Mị Ọmoogh-we dị ạmoogh oomo ịikpo kụ mạḅem.
31 “Nyina, iyool-ịga ạmi, aḍita dị mị ạngo eḍien, nyina kụ awe phọ ạmi kụ mị Ẹnaan anyina,” Ọmoogh-we dị ạmoogh oomo ịikpo ạḅem.