4 “Nyịidipho ḅạanaan bịdi kụ ạḅeni bịdi ịpe mị Ọmoogh-we dị ạmoogh oomo ịikpo rạkaaph bọ kạḅeni bịdi: Tọrobo ọlo Ịzirel dị mạsighe loor ọdi ạkuom esi ọoḅereghi ịkaaghineen ạrumugh kụ ameera bịdi erorori nyọdi ẹlogh esi ịkaraph, kụ agbi oru opuru aḍipuru esi oyil, kạmoogh ni ọphagharanaan esi ạmi — ọphagharanaan phọ ọpo ẹkpianaan bọ ịkaaghineen ạrumugh phọ ọdi! 5 Oomo ịkaaghineen ạrumugh phọ ịpe mekiton we phọ Ịzirel ọḍua esi ạmi, kụ ọlo esi ọphagharanaan ạmi mị aḍuom ni ologhi oḅulemi ạbidi esi ạdol ọnaghanan ghan ạmi.

6 “Kụ nyịidipho ḅẹni Ịzirel ịpe mị Ọmoogh-we dị ạmoogh oomo ịikpo rạḅem bọ: Ikiton kụ ẹwile ịkaaghineen ạrumugh isa phọ anyina.

7 “Tọrobo amem lọ oniin ọlo Ịzirel phọ mꞌoniin ooruen phọ bụphe orugh bọ sịphe ẹmha phọ Ịzirel akiton ạḍua esi ạmi kụ aaseeny ịkaaghineen ạrumugh, kụ ạḅile ạghi ḍipuru esi oyil, mị Ọmoogh-we phọ kạngo ni nyọdi ọphagharanaan phọ ọdi. 8 Mị katuphiom nyọdi ẹgham. Mị kaḍighi nyọdi eḍeenaan. Mị kạsighe nyọdi ạḍuanam ẹmha awe phọ ạmi, ọbo nyina elegheri mọ mị kụ Ọmoogh-we phọ.

9 “Eḍighi mạar dị ookeleghi oyil kụ ạngo ọphagharanaan ọkpe, pọ ọdi aḍighi ịduon phọ loor esi dị mị Ọmoogh-we phọ kụ uukeleghi nyọdi. Mị kạsighe nyọdi ạḍua esi ookpomoghan awe phọ Ịzirel. 10 Ịyal phọ ạbidi, oyil phọ rꞌọpo aru bọ ḍipuru phọ esi ọdi kọmoogh ogina ạmalhiom. 11 Mị kaḍighi ịphen phọ okikimaam awe Ịzirel esi ọwile ạmi, rꞌọḅile ọsighiogh asiloor ạbidi esi ịkaraph phọ ạbidi. Bịdi koḍighi we ạmi, kụ mị kaḍighi Ẹnaan ạbidi.” Ọmoogh-we dị ạmoogh oomo ịikpo kụ mạḅem.

12 Ọmoogh-we phọ ụḅaanaan ịmi. 13 Ọdi ạḅem mọ, “Oye dị kamugh ni, eḍighi mạar dị eelhe eḍighi ịkaraph kụ ị́moogh omeeraam esi ạmi, mị kạgbuton amitiom ḍịghaagh ạmi kụ apiemi esi phọ rẹngo ghan bọ bịdi eḍien. Mị kạkiom ịgbakuro kụ ạze we rꞌịnam igina phọ. 14 Ghạlamo iḍighi mạar dị ịraar phọ awe phọ ạbuphe, aNoa, ạDaniel rꞌaJob, kụ orugh ẹpe, igey ạbidi kẹpel sighuḍum ạbidi bịn.” Ọmoogh-we dị ạmoogh oomo ịikpo kụ mạḅem.

15 “Ịdipho oḍighom ịyaar kụ mị arom ilhom ịnam ọze awe phọ, aḍighi ịdi ade phọ keḍighi iboom eegu dị rꞌoye kátue atelhe ạḅeeny nyọdi, 16 kụ ghạlamo iḍighi mạar dị ịraar phọ awe phọ ạbuphe orugh ẹpe — ọkaraghi igey ịduon mị Ọmoogh-we dị ạmoogh oomo ịikpo, mị Ẹnaan phọ edi ghan bọ — bịdi kótue ọpel ghạlamo ạnmuny ạbidi. Bịdi kọpel sighuḍum ạbidi bịn, ḅịle ade phọ keḍighi ẹdala.

17 “Ịdipho oḍighom ịyaar kụ mị aruom ẹgham sịphe eelhe phọ ẹpe kụ arom rẹenema ịlo ogbuurogh ọsighe awe rꞌịnam igina phọ, 18 kụ ghạlamo iḍighi mạar dị ịraar phọ awe phọ ạbuphe orugh ẹpe — ọkaraghi igey ịduon mị Ọmoogh-we dị ạmoogh oomo ịikpo, mị Ẹnaan phọ edi ghan bọ — bịdi kótue ọ́pel ghạlamo ạnmuny ạbidi, kọpel sighuḍum ạbidi bịn.

19 “Ịdipho oḍighom ịyaar kụ mị ạghiom ẹzegh sịphe eelhe phọ ẹpe kụ esi ọghagh ologhi ạsighe ịbadi asighuḍum, ạze we rꞌịnam, 20 kụ ghạlamo iḍighi mạar dị aNoa, ạDaniel rꞌaJob orugh ẹpe — ọkaraghi igey ịduon mị Ọmoogh-we dị ạmoogh oomo ịikpo, mị Ẹnaan phọ edi ghan bọ — bịdi kótue ọpel ghạlamo ạnmuny ạbidi. Igey ạbidi kẹpel sighuḍum ạbidi bịn.”

21 ^*Ịphen kụ ịpe Ọmoogh-we dị ạmoogh oomo ịikpo rạḅem bọ: “Mị kiruom inya ạmalhiom ạmi dị eeph igey sịphe Jeruselem — ẹgham, ịgbakuro, ilhom ịnam rꞌẹzegh — ophiemi awe rꞌịnam igina phọ. 22 Eḍighi mạar dị oniin akpetenaan kụ ạphel nmụny ọdi, pọ pogh bịdi mem lọ bịdi oru esi ạna. Mịin ịdi bịdi eeph, kụ alegheri mọ ạmalhiom mọ mị ratuom bọ sịphe Jeruselem aseleman ni. 23 Pọ kụ amem dị nạ kalegheri mọ egey ẹmhu ịrol li esi ạtorobo ịyaar dị mị aḍighi.” Ọmoogh-we dị ạmoogh oomo ịikpo kụ mạḅem.