3 Ịphen kụ ịdi Ọmoogh-we dị ạmoogh oomo ịikpo ạḅem: “Ariil elologhi phọ ạbuen mophe! Bịdi omitiom ịmiin ịlo ạbidi kụ ọlem uḍien ịlo ạbidi. 4 We Ịzirel, ariil anyina ụ́moogh mạar oḍighinom ịdipho ạruukpako-ako dị erugh sịphe ogbo ạraraar ẹmha dị mophiemi. 5 Bịdi rókori ghan riisi phọ ịpe iikpe phọ memeel bọ mꞌọḅile ọloghoḍi iikpe phọ, kụ esi ịduon phọ Ịzirel kọ́moogh oghoph mem dị ẹgham eru ḍio Ọmoogh-we phọ. 6 Uḍien phọ ạbidi ọkpe ni, ḅịle ịmiin phọ ạbidi kígey. Bịdi ọḅem ghan mọ bụno rọkaaph dom ạmi, kụ ọlo mị bịdi kőrom. Kụ ạri bịdi rọwa ni mọ ikpo ọnhu ạbuno emite ni! 7 Mị ạḅeni bịdi: Uḍien ịpe nyina ẹmiin bọ ítu igey, ḅịle kẹn ịmiin phọ nyina ẹmiin bọ ọkpe ni. Nyina ẹḅem mọ ịpe phọ ikpo ọnhu ạmi ni, kụ ạri mị inyina kị́ḅaanaan.”

8 Esi ịduon phọ Ọmoogh-we dị ạmoogh oomo ịikpo ạḅeni bịdi mọ, “Ikpo ọnhu phọ anyina ọkpe ni, ḅịle kẹn uḍien phọ anyina kígey. Mị rạle ni esi anyina. 9 Mị mạnya ọlhiom anyina ariil ạbuphe ọmoogh bọ uḍien ọkpe kụ rọgba ghan bọ ịmiin dị ítu igey. Nyina kẹ́tol sịphe mem dị awe ạmi ookpomoghan ọmoogh aruupuruan; siḍien anyina kọ́ḅaram esi ạḍikool phọ ạbuo Ịzirel; nyina kétigheel mun de phọ anyina. Pọ kụ amem dị nyina kelegheri mọ mị kụ Ọmoogh-we dị ạmoogh oomo ịikpo.

10 ^*“Ariil phọ mookeleghi we phọ ạmi esi ọḅem ghan mọ oomo ịdi edi ni igey. Agey ni, oomo ịdi ílho igey! Awe ạmi mọlhogh ọmeremi iikpe ipoḍi asighiigh dị ítulughan, kụ ariil phọ moru nụun ogbul ọphalaḅaal ạgba okpereghiom. 11 Ḅẹni riil phọ mọ iikpe phọ ạbidi kemeel li ude. Mị katom okiilia ọlophia. Ibikpo kemeel ạnyu ọdi, kụ ọokpara oghim apula ạkpaariom nyọdi. 12 Iikpe phọ kemeel, kụ tọrobo oye kapuru ni nyịna ọdo igey dị ọphalaḅaal ạgba phọ aḍighi.”

13 Nyịidipho ịphen kụ ịdi Ọmoogh-we dị ạmoogh oomo ịikpo ạḅem: “Esi ọghagh ologhi ạmi mị katom ọokpara oghim, okiilia ọlophia rꞌibikpo ophiemi iikpe phọ. 14 Mị kạbaay iikpe phọ bịdi ogbul bọ ọphalaḅaal ạgba phọ oler ude, ịlo oḅomoghi ọdi, kụ ọwile asighiigh ephighiom mọ oopho. Iikpe phọ kemeel li kụ ẹze oomo anyina. Pọ kụ amem dị tọrobo oye kalegheri mọ mị kụ Ọmoogh-we phọ.

15 “Iikpe phọ rꞌạbuphe ogbul bọ ọphalaḅaal ạgba phọ ookpereghiom nyọdi kologhoma ni ịikpo ọghagh ologhi phọ ạmi. Reru reten, mị kịḅeni inyina mọ iikpe phọ meten kụ ịduon kẹn kụ ịdi bụphe ogbul bọ nyọdi ọphalaḅaal ạgba phọ koten — 16 ariil bụphe ọkpoomi bọ ologhi aJeruselem mọ oomo phọ ịdi edi ni igey mem dị oomo ịdi ị́tol ịdi ẹnighe!” Ọmoogh-we dị ạmoogh oomo ịikpo kụ mạḅem.

17 Ọmoogh-we phọ ạḅem, “Nyịidipho, Oye dị kamugh ni, pogh nmạriir phọ ogbo awe anyina bụphe rọkaaph ghan bọ komitiom ịmiin. Ḅạaghiom bịdi 18 kụ ạḅeni bịdi ịpe Ọmoogh-we dị ạmoogh oomo ịikpo phọ rạḅeni bọ bịdi:

“Nyina ạnmariir mephe! Nyina ẹkolonaan rạla ịiḍaany tọrobo oye ịlo ọlogha ạraghaagh ạbidi kụ eḍighinaan sịloko ịiḍaany tọrobo oye ịlo ozua ạrumhu ạbidi, ọbo bịdi ọmoogh ịikpo esi ọsighenom asighuḍum ạbunon awe. Nyina rẹwa ọmoogh ịikpo aghuḍum rꞌaḍuugh esi awe ạmi ḅịle kẹn rꞌoḍighinom ịikpo phọ ịlo ạsuo anyina. 19 Nyina iifolomi ịmi esomanan awe phọ ạmi ịlo ọmoogh ẹphurukpu ạruuzua ịbiakpa abali rꞌẹphurukpu ipoḍi ạbred. Nyina ẹze we dị ụ́kpianaan omugh, kụ nyina eseere we ọmoogh aghuḍum bụdi ụ́kpe ọrol. Esi ịduon phọ nyina rẹgba ghan ọkpe kẹḅeni we phọ ạmi, kụ bịdi imeeraam inyina.”

20 Nyịidipho ịphen kụ ịdi Ọmoogh-we dị ạmoogh oomo ịikpo ạḅem: “Mị akel rạla phọ ịpe nyina reḍighinom ghan bọ esi ọkparagha ịlo ọphamaghan aghuḍum rꞌaḍuugh. Mị kạkporion bịdi ạsighe sịphe ạraghaagh phọ anyina kụ aseere we phọ ẹereegh bụphe nyina ẹpham bọ. 21 Mị kạkarion ạsighe sịloko phọ anyina kụ ạbile awe phọ ạmi okpetenaan esi ịikpo phọ anyina mem bịn ílho mun. Pọ kụ amem dị nyina kelegheri mọ mị kụ Ọmoogh-we phọ.

22 “Esi ọkpe phọ anyina, nyina mekikima igey awe, bụdi mị ụ́wa ọkan. Nyina ekikima bụkaraph awe ọḍua esi ịkaraph kụ ọphelom asighuḍum mọ ạbidi. 23 Esi ịduon phọ nyịidipho uḍien ọkpe phọ anyina rꞌịkaraph ịmiin phọ anyina meten. Mị rạtagharan we ạmi kạsighe esi ịikpo phọ anyina, ọbo nyina elegheri mọ mị kụ Ọmoogh-we phọ.”