Mị káḅoorian tụtu ọdi ạmoogh pẹleeny,

Kụ ọkpar opu ọdi ạmu ịdipho ọtozi ḍughul.

2 Jeruselem, areelhe phọ kọmiin ni ịdi nạ mạkpar apu!

Oomo ạbudaam ạbidi kọmiin ni eegu phọ ạna.

Kụ ọta nyịna ḍimoom aḍien,

Ḍien dị Ọmoogh-we phọ rꞌaloor kụ aghol.

3 Nạ kạkigh ịma eghoony ọdaam esi Ọmoogh-we phọ.

4 Nyịna kọ́magh mun mọ “Akinom,”

Ḅịle mꞌoghol ade phọ ạna mọ “Ọkpagha.”

Kụ koghol nyịna ḍimoom aḍien mọ, “Ụḅeeraan.”

Kokol de phọ ạna mọ, “Ophineen,”

Loor esi dị nạ ạḅeeraan nị Ọmoogh-we phọ

Kụ kaḍighi ịdipho olhom sịphe ade phọ ạna.

5 Ịdipho onyugheel ọony dị rạsighe ophin esina ọnyani dị kọ̋ka,

Kụ ẹdi ọpo ạlhem bọ nyịna kaphin ni nyịna.

Ịdipho oye lọ rapin ạnir, ologhi rạḅaal ghan bọ ọmiin ạnir phọ,

Ịdipho kụ ẹdi ologhi Ẹnaan kạḅaal esi ạna.

6 Sịphe iikpe phọ ạna, Jeruselem, mị mạmeremi yogh we okori;

Bịdi kúkpomori ọnhu ootaany rꞌaḍughul,

Bịdi ọghiom ghan ologhi Ọmoogh-we phọ ruguanaan phọ ọdi

Bịdi kúmeera ọdi awula.

7 Bịdi kúmeera ọdi aphooghian

Kụ aḍighi ẹmha phọ ịdi oomo aḅirini kụ koboom.

8 Ọmoogh-we phọ maguan oguanaan dị ạḅaram oghunya

Kụ, esi ịikpo ọdi, kaḍighi ni amitiom:

“Ịbiakpa ạna kéḍighi mun eḍien ạbumulogh-ḍien ạna

Kụ aruuruen kọ́pughol mun miim ạna.

9 Kụ nyina ạbuphe ẹzuph bọ kụ ẹku bọ ịbiakpa phọ

Kele ni ạbred phọ kụ eboom Ọmoogh-we phọ.

Nyina ạbuphe eekonom bọ kụ ẹku bọ iimuma avain phọ

Kẹpughol li miim mọ sịphe ogiga Otu Ịiḅereghi phọ ạmi.”

10 Weye aJeruselem, ịḍua sịphe ẹmha phọ

Kụ ẹsamanaan eten we phọ anyina rotigheel bọ!

Iseleminaan bịdi oḅodo, ẹsighiogh sighiigh phọ eroḅologhi!

Ịkpo ạlagba oḍeenaan ọbo areelhe olegheriom

11 ^*Mọ Ọmoogh-we phọ magbeel raleenye oomo ade phọ:

“Ịḅeni weye phọ aJeruselem

Mọ Ọmoogh-we phọ ratu ọphel anyina;

ọdi ạpamam we phọ ọdi mạtagharan bọ.”

12 Kighol inyina mọ “Awe Iigbia Phọ Ẹnaan,”

“Awe Phọ Ọmoogh-we Phọ Mạphel Bọ.”

Kokol Jeruselem mọ, “Ẹmha Dị Ẹnaan Ẹphomoghian,”

“Ẹmha Dị Ẹnaan Íkinom.”