Ooḅi ọghaaph ọtagharan phọ
61
**Ọkar Ogbogh Ọmoogh-we phọ mamuzeḍi loor ạmi uwaloor phọ ọdi.Ọdi mụsaḅar ịmi kụ urom ịmi
Oruomaan ooḅi ọghaaph rukulom mọ,
Ọngo oḍuom ologhi bụphe iloghi phọ eḅonyonu bọ,
Ọghaaph omitiom mọ bụlo ọrol ikoli ẹgham ọmoogh ni ẹereegh
Kụ ọtagharan bụlo odi ruutu ikoli.
2 *Ọdi murom ịmi mọ mị ugbeel
Mọ amem mọ mẹteeny
Dị Ọmoogh-we phọ kạpel we phọ ọdi
Kụ ạkpar apu bụmulogh-ḍien phọ ạbidi.
Ọdi murom ịmi ọodereghi ạbuphe odi bọ dọl ọto phọ,
3 Ọngo ạbuphe odimom bọ ọto sịphe Zạyon
Iboh rꞌọḅaal ologhi esi okururu,
Ḍụor oboomiom kꞌaḍio okururu.
Bịdi kọkigh ireeny
Dị Ọmoogh-we phọ rꞌaloor kụ ạzuph.
Oomo ạbidi koḍighi ghan ịdi ẹnighe,
Kụ oboom Ẹnaan loor ịpe ọdi maḍighi bọ.
4 Bịdi kọḅile oselemi yogh rạmha dị eegulaan kꞌaḍiodi.
5 Weye ạmi, aruuruen kụ kikumu inyina.
Bịdi kụ kotelhiom ghan ḍita ịnam anyina
Kụ oḅeph iizo anyina kụ opogh ghan ịizupha avain phọ.
6 Kilegheri inyina mọ ariil ạrikia Ọmoogh-we phọ,
Abutelhedom Ẹnaan phọ ayira.
Nyina kẹkelom ni ẹelha areelhe phọ
Kụ ebaga mọ meḍighi ẹlo anyina.
7 Umugholoor rꞌaroofola anyina mekureri.
Nyina ketugh de phọ anyina,
Kụ ẹelha anyina kẹbugh ịyal amem;
Iboh anyina kẹtol kꞌagee-pọ.
8 Ọmoogh-we phọ rạḅem ghan mọ,
“Mị ạpomoghian iiḅi ịiruen kụ akel ịkpiloghom rꞌạsipioghom.
Rꞌophooph ologhi kụ ẹdi mị kaanmoom ruunmo we phọ ạmi
Kụ akiran ịyo rꞌạbidi kꞌagee-pọ rꞌạbidi.
9 Bịdi kụ ạbudi aḍien keeleghaan ni sịphe ogbo areelhe phọ;
Tọrobo oye lọ ạmiin bịdi kalegheri
Mọ bịdi awe dị mị mạseph.”
10 *AJeruselem ạmoogh iboh loor ịpe Ọmoogh-we phọ maḍighi bọ;
Ọdi ạtol mụdi esina ọnyani dị oonmenemi ḍio dị rạbal ilhom.
Ẹnaan mẹkpologhiom nyọdi pẹleeny rꞌọkpar opu.
11 Ịdipho olegheri bọ ni mọ ịizupha resiighi ghan kụ kephoph,
kụ ịdi Ogbogh Ọmoogh-we phọ kạpel li we phọ ọdi,
Kụ oomo areelhe phọ koboom nyọdi.