Ọmoogh-we phọ ạkpar apu reelhe phọ
63
*“Ạnhian kụ ọphon phọ ạḍua bọ ẹmha aBozra ẹpe Idom kụ ratu? Ạnhian kụ ọphon phọ ạkpologhian bọ ịma iinmenan dị ẹtogh kụ agiriph bọ raten rꞌịikpo rꞌịnyaam?”“Ọmoogh-we phọ ạmoogh bọ ịikpo ọphel phọ kụ ratu ogbeelom ọkpar opu ọdi.” 2 “Eeghe kụ iinmenan phọ ọdi ẹtogh bọ mụdi ịlo oye dị rạzeer ghan iimuma avain oḍighi amiim?”
3 *Ọmoogh-we phọ ạpagharanaan mọ, “Mị mạzeer reelhe phọ ịdipho iimuma avain, kụ oye óru ọloghonaan ạmi ḍịghaagh. Mị ụzeerom bịdi rꞌophin ologhi, kụ ịḅaal ạbidi mẹphueghi oomo iinmenan ạmi. 4 Mị aloghoma mọ amem ọphel awe phọ ạmi mẹteeny; pọ kụ amem ọliom ạbumulogh-ḍien phọ ạbidi. 5 *Iḍigh ḍiigu esi ạmi mem dị mị aphogh kụ ạmiin mọ oye ọloghonaan ạḍighaagh ịmi ólho. Kụ ophin ologhi ạmi ụkparami ịmi, kụ ọkpar opu aḍighi ọlo ạmi rꞌaloor. 6 Rꞌophin ologhi ạmi, mị ạzeer bọ reelhe ạwalawalami. Mị azu ịḅaal aghuḍum mọ ạbidi ude.”
Ịdi Ọmoogh-we phọ ạmaar ạrolom Ịzirel
7 Mị kạkaaph ni ịlo ẹphomoghian Ọmoogh-we phọ amabi úlho ghan bọ;
mị aboom nyọdi esi oomo ịpe ọdi muḍighinaan bọ iyoor.
Ọdi mạngo ḍịseph phọ ọdi dị ẹbugh iboom we Ịzirel
loor esi ọnma ighirigiir ọdi rꞌẹphomoghian dị edi ghan bịn.
8 Ọmoogh-we phọ ạḅem mọ, “Bịdi awe ạmi; bịdi ịmi kúukeleghi.” Kụ iḍighi kụ ọdi ạphel bịdi ạsighe 9 esi oomo ịminimiin phọ ạbidi. Kọ́okpaany kꞌạke, kụ Ọmoogh-we phọ rꞌaloor kụ ạphel bịdi. Esi ẹphomoghian rꞌọnma ighirigiir ọdi kụ ẹdi ọdi ạtagharan bịdi. Ọdi ạmaar ghan ni aphogh bịdi mem dị meten, 10 kụ ọlo bịdi ụḅaar ẹmhu kụ oḍighi ịdi Uwaloor phọ ọdi akururu. Loor ịduon phọ Ọmoogh-we phọ aten mụlogh-ḍien ạbidi kụ eenan bịdi.
11 Pọ kụ amem dị bịdi ọotughian igbaany phọ, ọrugh phọ aMozis otelhedom Ọmoogh-we phọ, kụ bịdi opuru mọ, “Odi ẹghen nyịidipho Ọmoogh-we phọ, ọpo ạphel bọ buḍiemiom awe phọ ọdi ạsighe sịphe ọphiiny phọ? Odi ẹghen Ọmoogh-we phọ, ọpo ạngo bọ uwaloor phọ ọdi Mozis? 12,13 *Odi ẹghen Ọmoogh-we phọ, ọpo esi ịikpo phọ ọdi aMozis aḍighinom bọ ni iboom ạraraar, adi bọ mụum ọphiiny phọ kụ aḍiemiom we ọdi ạḅeenye mụum dị ạkel li ude, ọmooghom aḍien dị kẹtolom rꞌọdi kꞌagee-pọ?”
Ọmoogh-we phọ aḍiemiom bịdi kụ ạkparami ruwol phọ ạbidi ịdipho ịlo ilhom ạrusu ọbo bịdi kokpetaan ghan bọ owol loor aḍighiigh ọnmighima. 14 Ịdipho abupoghom rọkimom ghan bọ sịnam eḍiiny dị ẹnuum, ịduon kụ ịdi Ọmoogh-we phọ ạngo we phọ ọdi ophooghian. Ọdi aḍiemiom ni we phọ ọdi kụ aghueniom ḍien phọ ọdi.
Ịiḅereghi ọnma ighirigiir rꞌẹloghonaan
15 Ọmoogh-we, tọl kꞌạke kụ uphogh iyoor, ẹpe nạ odi ghan bọ rꞌiigbia rꞌeegu phọ ạna. Odi ẹghen oseere ologhi phọ ạna esi ayoor? Ịikpo phọ ạna edi ẹghen? Edi ẹghen ẹphomoghian phọ ạna rꞌigbiririph phọ ạna? Kụ́ḅitonaan iyoor. 16 Nạ kụ ọde ayoor. Ebraham rꞌạJekob ạburude phọ ayoor iyoor ụ́logh elegh, kụ nạ, Ọmoogh-we, kụ ọde ayoor, ọpo oomo amem rụtagharan ghan bọ iyoor. 17 Eeghe kụ nạ ameera bọ mọ yoor ọgbol ghan reten phọ ạna? Eeghe kụ nạ ạngo bọ ọgel dị yoor kọḅaar ẹmhu dị kọgumom nyịna ọman? Ḅịle aḅula ẹphen loor esi ạbuphe rokumu bọ nyịna, loor esi awe phọ oomo amem oḍighi bọ bụo ạna.