Ạḍimagh mọ aḅirini phọ oboom Ẹnaan.
148
Iboom Ọmoogh-we phọ!Iboom Ọmoogh-we phọ ẹpe kꞌạke,
nyina ạbuphe odi bọ ẹpe ạnyu phọ.
2 Iboom nyọdi, oomo ạruukpaany phọ ọdi,
oomo ạbuo ẹgham mọ ọdi kꞌạke.
3 Iboom nyọdi, erumuḍio rꞌụnwanyu;
iboom nyọdi, ạraanaan phọ rẹmuanan bọ.
4 Iboom nyọdi,
rẹekela ariisi okuaḍio rꞌạrumuum mọ edi bọ ạnyu ạke phọ.
5 Oomo ạbidi oboom ḍien Ọmoogh-we phọ!
Ọdi bọ ạto, kụ ọlemogh bọ bịdi;
6 esi ịto ọdi kụ osereghi bọ bịdi riisi kịrokiro phọ kꞌagee-pọ,
kụ bịdi kọ̋ḅaar ẹmhu.
7 Iboom Ọmoogh-we phọ kꞌịsien ade phọ,
igbogh ịnam ạmuum rꞌoomo aḍigher otu-ḅualhe;
8 ọmepheghian aḍio rꞌookuugh, ibikpo rꞌọotu,
ọokpara oghim dị rạnaghanan ghan ịto ọdi.
9 Iboom nyọdi, roogbolom rꞌạraaḅaraph,
ịghol rꞌạrasaga ẹekpua;
10 oomo ịnam, ịlo ookonom rꞌịlo edi eḍum,
ạraraar lọ rẹkogha rꞌịnun lọ rẹpeeph.
11 Iboom nyọdi, rạalha rꞌareelhe,
ịkpana ạraalha rꞌoomo ạbunon lọ ọdaaghi;
12 nmạnyaan rꞌugheel ạnmuny,
ikumoor awe rꞌịbam ạnmuny.
13 Oomo ạbidi oboom ḍien Ọmoogh-we phọ!
Aḍien ọdi kụ ipu oomo ịnon asiḍien;
eegu ọdi epeleghom de rꞌạke phọ.
14 Ọdi ạkparami ni eelhe phọ ọdi.
Pọ kụ ịyaar phọ oomo awe phọ ọdi roboom bọ nyọdi,
awe Ịzirel oḍighi bọ ẹekaany esi ọdi.
Iboom Ọmoogh-we phọ!