Ạḍuor oboomiom Ẹnaan Oomo Ịikpo phọ
147
Iboom Ọmoogh-we phọ!Ẹnighe ni ọmoor ạsuor oboomiom Ẹnaan phọ ayira;
ẹkpe ni, ḅịle kẹn, edugh ni oboom ọdi.
2 Ọmoogh-we phọ mạḅile raḅulemi Jeruselem;
ọdi raḅulemi yogh bụphe osumughu bọ.
3 Ọdi raakonom ghan bụphe iloghi ẹphuughi bọ,
kụ ạghoroghiom rukpe riisi dị ị́nighe yogh.
4 Ọdi maseere ọnhu ạraanaan dị kẹtol
kụ akol ẹenaan ẹenaan ḍien ḍien.
5 Ogbogh dị ạmanam kụ Ọmoogh-we phọ ayira.
Ologhi ọdi kótue ọtooghi.
6 Ọdi rapoophe ghan bụlo osooromi loor,
kụ kaler buḍighinom ịkaraph phọ kꞌude.
7 Ịmoor sụor eboomiom Ọmoogh-we phọ;
itiom ọne sụor ẹngo Ẹnaan phọ ayira.
8 Ọdi aleenye ọotu oomo okuaḍio phọ;
ọdi ạngo ọlophia de phọ
kụ aḍighi ịdi ạroogho asi ạnyu aroogbolom mọ.
9 Ọdi aḍighi ịdi ịnam ẹḅal ịḅal,
kụ ạngo eḍien rịghiligho mem dị bịdi ẹlom.
10 Ọdi ọ́moogh ḍịḅeeraan loor ịnam-ạsu dị ẹmoogh ịnyaam
ḅịle rꞌaloor ịgbagara awe ẹgham.
11 Bụphe ọkpasi bọ emooph ạbidi esi ẹphomoghian phọ ọdi rémuneen ghan bọ
kụ ạbudi ọdi ạmoogh ḍịḅeeraan.
12 Boom Ọmoogh-we phọ, Jeruselem;
boom Ẹnaan phọ ạna, Zạyon.
13 Ọdi rakori ghan rụnhu-aḍibuo anyina rꞌịikpo
ọdi rạseph ghan we anyina.
14 Ọdi rakori ghan rụuku phọ anyina
kụ kịpheremiom inyina igey ịbiakpa.
15 Ọdi ạto ịyaar ạngo de phọ,
kụ ịpe ọdi ạto ọnuun ni oḍighi.
16 Ọdi ạde oopha ẹephoom mụdi ukpe ẹmina,
kụ ạawalami ibikpo mụdi ophugh.
17 Ọdi rạkimom ghan iiḅoghoḍi ibikpo ịdipho ilhom ịisaar;
rꞌoniin oye kátue ạkparam osipheeny dị ọdi amitiom.
18 Kụ ọdi rạto ghan ạngo kụ ibikpo phọ ẹgbenyenu;
ọdi atom ookuugh, kụ ạmuum akil.
19 Ọdi atom dom ọdi we ọdi,
ạngo ịtooghi rꞌiilogh ọdi we Ịzirel.
20 Ọdi kőḍighinaan ịphen phọ ịnon areelhe;
bịdi úlegheri iilogh ọdi.
Iboom Ọmoogh-we phọ!