Ạḍuor oboomiom Ẹnaan ọpelia phọ
146
Boom Ọmoogh-we phọ!Boom Ọmoogh-we phọ, nạ uwaloor phọ ạmi!
2 Mị kaboom ghan nyọdi tụtu mị amugh;
mị kạmooraan ni Ẹnaan ạmi oomo aghuḍum ạmi.
3 Kạ́kpasi emooph ạna loor abuḍiemiom awe;
oye ịsien aḅirini phọ ólho dị kạphel nyịna.
4 Mem dị bịdi omugh, bịdi oḅula sịphe ọposo phọ;
ḍio phọ ạḍiphe oomo igbiighi ạbidi mekunughian.
5 Ọḅaal ologhi kụ odianaan oye phọ ọpo ạmoogh bọ Ẹnaan ạJekob ọphel ọdi
kụ aḍuom bọ ologhi Ọmoogh-we Ẹnaan phọ ọdi,
6 *ọlemia ạke rꞌade rꞌọphiiny phọ
rꞌoomo ịlo edi ologhi ạbidi.
Ọdi rábi ghan ịpe ọdi maguanaan bọ.
7 Ọdi rasoph ghan ooruen kagheelemi bụphe awe rọgbiphoghom bọ,
kụ ạngo eḍien bụdi ọkoony rasiph.
Ọmoogh-we phọ ramiteghom ghan we ikoli
8 kụ ạḅarion riḍien awe dị eten ụ́miin.
Ọdi rapoophe ghan bụlo momeleghu;
ọdi ạpomoghian we aruukuan phọ ọdi.
9 Ọdi ạmaar ghan rạpam ruuruen lọ odi de ayira;
ọdi rạpel ghan rukpukele ạnmariir rꞌạbunyigo ạnmuny
kụ kaphiemi we ạsipioghom.
10 Ọmoogh-we phọ kụ ọdaam kꞌagee-pọ.
Ẹnaan phọ anyina ạbuo ạZayon kẹtol li oomo amem.
Iboom Ọmoogh-we phọ!