Ạḍuor oboomiom
145
Mị kagbeelom ni igbogh phọ ạna, Ẹnaan rꞌọdaam ạmi;mị kạseph nyịna kꞌagee-pọ kꞌagee-pọ.
2 Tọrobo aḍio mị kạseph ghan nyịna;
mị kạseph nyịna kꞌagee-pọ kꞌagee-pọ.
3 Ọmoogh-we phọ ạbugh ni kụ ạkpe oboom agey;
igbogh phọ ọdi ẹpughan ọnaghan.
4 Koboom ni ịpe nạ maḍighi bọ ẹḍua oniin oghiil esi ọnon;
bịdi kogbeelom ni iboom iiḍighi phọ ạna.
5 Bịdi kọkaaph ni ịlo eegu rꞌigbogh phọ ạna;
kụ mị agim ẹmhu ịlo iiḍighi ịiḍaany phọ ạna.
6 Awe kọkaaph ni ịlo iboom iiḍighi phọ ạna,
kụ mị agbeelom igbogh phọ ạna.
7 Bịdi kọḅeni we oomo ịlo ẹnighe phọ ạna
kụ ọmoorom ịlo ạdol aruukuan phọ ạna.
8 Ọmoogh-we phọ oye ẹphomoghian rꞌọnma ighirigiir;
ịyaar ị́nuun ophin ologhi ọdi kụ ẹphomoghian ọdi rémunughan.
9 Ẹnighe ọdi ẹteeny ni tọrobo oye
kụ ọdi ạnma ighirigiir oomo ọlem mọ ọdi.
10 Oomo ọlem mọ ạna, Ọmoogh-we, koboom ni nyịna
ḅịle oomo awe ạna kọngo nyịna ḍịseph.
11 Bịdi kọkaaph ịlo eegu ạgada ịikpo phọ ạna
kụ ogbeelom ịlo igbogh phọ ạna oleenyemi,
12 ẹrol dị tọrobo oye alegheri ịlo iboom iiḍighi phọ ạna
rꞌegbogh eegu ọmar phọ ạna.
13 Ịtooghi ạna edi ghan bịn,
ḅịle nạ ọdaam kꞌagee-pọ.
Ọmoogh-we phọ rábi ghan ịpe ọdi aguanaan bọ
ḅịle ọnma ighirigiir odimom ni oomo ịpe ọdi aḍighi bọ.
14 Ọdi rạpel ghan ni bụlo odi esi ịiḅaghami;
ọdi rapoophe ghan bụlo omeel.
15 Oomo ạraraar lọ repooghu rephoghom nyịna oḍuom-ologhi,
kụ nạ ạngo bịdi eḍien mem dị bịdi ọwa.
16 Nạ ạngo bịdi ịdi ẹmanam
kụ ạperemi rụuphua oomo ạbidi.
17 Ọmoogh-we phọ raḍighinom ghan ruukuan oomo ịlo ọdi aḍighi,
rạnma ghan ighirigiir esi oomo eḍighinom ọdi.
18 Ọdi atuman bụphe rọmagh bọ nyọdi,
bụphe rọmagham bọ nyọdi rꞌoomo ologhi ạbidi.
19 Ọdi rạngo ghan ịlo ọwa bụphe ọlogh bọ nyọdi eghuan;
ọdi rạnaghanan ghan emoghi ạbidi kụ kạphel bịdi.
20 Ọdi raakpereghi ghan ni tọrobo oye lọ ạphomoghian nyọdi,
kụ ọlo, ọdi kaagulemi ni bụo ạsipioghom mọ.
21 Mị kaboom Ọmoogh-we phọ oomo amem.
Oomo ọlem mọ ọdi oboom ni ḍien iigbia phọ ọdi kꞌagee-pọ!