Ọdaam mọ ạseph Ẹnaan loor esi ọkpar opu
144
Boom Ọmoogh-we phọ, eekpereghian ạmi!Ọdi ụtughemi ịmi ịlo elephiri
kụ ụkparami ịmi ịlo ẹgham.
2 Ọdi kụ eekpereghian ạmi rꞌọsuaram ạmi, aḍibuo ạmi,
oghophaam arisigh ạmi rꞌuba ạmi,
esi ọdi kụ ẹdi mị aḍuom ologhi pẹleeny.
Ọdi abinighiom reelhe dị edi eeḍian ạmi.
3 *Ọmoogh-we, oye phọ eeghe ịyaar dị nạ ạmanami bọ mạar,
oopho phọ oye dị nạ rạnaghanan ghan bọ!
4 Ọdi ạkigh ookuugh;
ariiḍio ọdi ẹkigh oogho dị ratelhe.
5 Ọmoogh-we, kughuron okuaḍio phọ aru asoor;
ḅọgh rạaḅaraph phọ bịn bịdi kemiteghom ni mụghi.
6 Tom ḍio dị rẹmepheghian ạawalamiom bụmulogh-ḍien ạna;
tạḅal ịkpina phọ ạna aḍighi ịdi bịdi kosumughu.
7 Ḍụa kꞌạke asoor ude,
uḍur ịmi amitiom esi aḍigher, ạḅile ụtagharan ịmi;
ụphel ịmi ạsighe rạghaagh aruuruen,
8 dị igey rọ́gba ghan
kụ rọgba ghan ọkpe mem dị oghunya.
9 Mị kạmooraan nyịna ḍimoom ạḍuor, Ẹnaan;
mị kati ọne ạmooraan nyịna ḍụor.
10 Nạ ạngo ọkpar opu rạalha
kụ ạtagharan otelhedom ạna, Devid.
11 Ụphel ịmi ạsighe esi ạbumulogh-ḍien ạmi;
ụtagharan ịmi esi ịikpo aruuruen
dị igey rọ́gba ghan
kụ rọgba ghan ọkpe mem dị oghunya.
12 Eḍighi ịdi alephiri ạnmuny ayoor mem ugheel ạbidi
kọkigh ịizupha dị eḍum kụ ẹmoogh ịnyaam.
Eḍighi ịdi ạnmanyaan ayoor
kọkigh ịma ạroko dị ogimi rụghulukul ọnighemiom ogiga.
13 Eḍighi ịdi arukue ayoor eḍien kịrokiro.
Eḍighi ịdi ạrutu-ịga phọ ayoor kẹmaraghi sịmuunir.
14 Eḍighi ịdi ạsinam ayoor kẹmaraghi
bịn eghun kẹ́ḍua ḅịle ịyaar képe.
Eḍighi ịdi emoghi ẹkaraph ẹmugh kẹ́tol reten ẹmha phọ.
15 Ọḅaal ologhi kụ odianaan eelhe dị ịphen kụ eru ịdi edi;
ọḅaal ologhi kụ odianaan we dị Ẹnaan ạbidi kụ eḍighi Ọmoogh-we phọ.