Ịiḅereghi ọnma ighirigiir
143
Ọmoogh-we, nạghanan ịiḅereghi phọ ạmi.Nạ oye aruukuan, nạghan ịlom ạmi;
nạ oye dị oguan rábi ghan, ụphagharanaan ịmi.
2 *Kúseere ịmi otelhedom ạna esi oḅiligha ophogh;
oye ólho dị mạar ụ́piom ghisigh ạna.
3 Ạmulogh-ḍien ạmi mụraph ịmi aler ude
kụ ạkar ạkpar upu ịmi.
Ọdi mụlhogh ịmi otu ikoli ufiri,
kụ mị ạkigh oye dị mamugh kꞌamem dị mebia.
4 Kụ iḍighi kụ mị mạnya omugh.
Oḍuom-ologhi ạmi mamuneen.
5 Mị ạatughian mem dị meten;
mị ạatughian ịlo oomo ịpe nạ maḍighi bọ,
mị ạḅile agbiighi oomo iiḍighi phọ ạna.
6 Mị apoophe rạghaagh ạmi aruom nyịna esi ịiḅereghi;
mụdi ade dị ẹgharaghar, uwaloor ạmi rạwa ghan nyịna.
7 Ụphagharanaan ịmi nyịidipho, Ọmoogh-we.
Oomo oḍuom-ologhi ạmi maphe.
Kạ́booghinaan loor ạna ịmi
ọbo mị kạkigh ghan bọ oye dị maḍigh ọmar iḍim.
8 Ụghiom ologhi ḍịroor ạḍiroor ịlo ẹphomoghian phọ ạna rémuneen ghan bọ,
loor esi dị mị ạkpasi emooph ạmi esi ạna.
Ịiḅereghi ạmi ẹki ạnyu ẹteeny nyịna.
Uḍeenaan ịmi eten lọ mị kạki.
9 Mị ạki esi ạna ọmoogh eekpereghian, Ọmoogh-we;
ụtagharan ịmi rạghaagh ạbumulogh-ḍien ạmi.
10 Nạ kụ Ẹnaan ạmi.
Ụtughemi ịmi oḍighi ghan ịpe nạ rạwa bọ.
11 Ụtagharan ịmi, Ọmoogh-we, ịdipho nạ maguanaan bọ;
esi ịma phọ ạna ụphel ịmi ạsighe esi ịiḅaghami phọ ạmi.
12 Loor ẹmhu ẹphomoghian phọ nạ ạmoogh bọ esi ạmi, zẹ bụmulogh-ḍien ạmi
kụ aagulemi oomo ạbuphe rụgbiphoghom bọ ịmi
loor esi dị mị otelhedom ạna.