Ịiḅereghi ọnma ighirigiir
142
Mị ạmagh Ọmoogh-we phọ ọphel ạmi.Mị ạaḅereghian nyọdi.
2 Mị atumom esi ọdi oomo ịiḅaghami phọ ạmi;
mị ạḅeni nyọdi oomo ịkunuma phọ ạmi.
3 Mem lọ mẹphughan esi ạmi,
ọdi alegheri ni ịdi ẹkpe dị mị kaḍighi.
Sịphe eten phọ mị ratelhe bọ,
ạbumulogh-ḍien ạmi mụkpaminaan ịmi ḍiphil.
4 Mem lọ mị aphogh ọogaany ạmi,
mị ạmiin mọ oye ọphel ạmi ólho,
oye ookpereghi ạmi ólho.
Oye lọ ruphogh ịmi ólho.
5 Ọmoogh-we, mị amoghiom nyịna mọ tue ụlhoghonaan ịmi ḍịghaagh;
nạ Ọmoogh-we kụ ọpelia ạmi,
nạ bịn kụ oomo ịdi mị rạwa sịen mị odi bọ eye phọ.
6 Nạghanan emoghi ạmi ụphel ịmi
loor esi dị oḍuom-ologhi ạmi mamuneen.
Ụphel ịmi ạsighe esi ạbumulogh-ḍien ạmi;
ịnyaam ạbidi epu ịlo ạmi.
7 Ḍighi ịdi mị kakpetenaan ịiḅaghami phọ ạmi;
kụ mem dị awe phọ ạna ookpomoghan mị kạseph ni nyịna
esi ịma phọ ạna esi ạmi.